בריוון פונעם ראש ישיבה שליט"א

בעזרת ה' יתברך - יום ד' פרשת כי תצא, י' אלול, שנת תשפ"ה לפרט קטן

לכבוד ... נרו יאיר

מיר פירן זיך צו זאגן דעם קאפיטל לדוד ה' אורי וישעי (תהילים, כז) - ביי תפילת שחרית נאכן יום, און ביי תפילת מנחה נאך הויכע שמונה עשרה, פאר קדיש תתקבל.

זאג די קאפיטל מיט כוונה, און ביי די ווערטער: "אִם תַּחֲנֶה עָלַי מַחֲנֶה" אויב וועלן קומען אויף מיר א באנדע רשעים, "לֹא יִירָא לִבִּי" האט מיין הארץ נישט מורא, "אִם תָּקוּם עָלַי מִלְחָמָה" אויב וועלן זיי מאכן א מלחמה מיט מיר, "בְּזֹאת אֲנִי בוֹטֵחַ" פארלאז איך מיך אויפן אייבערשטן; די ווערטער זאלסטו זאגן מיט גרויס כוונה. ווייל דער זוהר זאגט (תיקוני זוהר, תיקון כא), "זאת" דאס מיינט מען די שכינה; אז מען האט א שטארקע אמונה, מען איז צוגעקלעבט צו די שכינה - האט מען נישט פון קיינעם מורא. דער זוהר זאגט (שם), דוד המלך, מיט אמונה אינעם אייבערשטן - האט ער מנצח געווען אלע זיינע פיינט דאס זאגט דוד "אִם תַּחֲנֶה עָלַי מַחֲנֶה" וגומר, "בְּזֹאת אֲנִי בוֹטֵחַ"; און דאס זאלסטו שטענדיג בעטן, און נאר אויף דעם: "הייליגער באשעפער איך וויל געדענקען פון דיר, איך וויל נישט פארגעסן קיין איין רגע אז דו ביסט מיט מיר און אלעס ביסטו".

מיר הייבן היינט אן לערנען א פרישע מסכתא, מסכת הוריות; איך בעט זיך ביי דיר זאלסט יעדן טאג לערנען די הייליגע גמרא, א בלאט גמרא, דער בלאט וועט דיר באשיצן פון אלע דיינע פיינט און פונעם גרעסטן פיינט, דער סמ"ך מ"ם וחיילותיו - וואס ווילן אויסרייסן דעם מענטש, אים אוועק נעמען פונעם אייבערשטן; נאר דורך תורה קען מען בלייבן א איד.

ברוך ה' אונזערע אינגלעך האבן א חדר וואו מען פרעדיגט אמונה, די קינדער וואקסן געזונט, און ברוך ה' די מיידלעך ווערן נתחנך מיט א ליבשאפט צו איידלקייט. אויך די בחורים האבן מגידי שיעורים וואס האבן זיי ליב, זיי האבן ליב צו לערנען מיט זיי פון רבי'ן; נאר איין זאך וואס מיר דארפן, א נס מען זאל האבן שפע זיי צו קענען באצאלן, מיינע אויגן קוקן צום אייבערשטן, נאר ער איז מיין האפענונג, איך פארלאז זיך נישט אויף קיינעם.

דער אייבערשטער זאל העלפן זאלסט האבן הצלחה אין אלע עניינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ג' פרשת נצבים, כ"ג אלול, שנת תשפ"ה לפרט קטן

לכבוד ... נרו יאיר

מארגן פארן מיר קיין אומאן, דאס הארץ בענקט, דאס הארץ גליסט, עס זינגט זיך שוין "צום ציון, צום ציון, איך פאר צום רבינ'ס ציון, דארט וועל איך נישט רוען ביז דער רבי וועט זיך מיען..."

בעט ביי די קרן הדפסה א פעקל ספרים מיט צו נעמען קיין אומאן פאר די מפיצים, נעם א חלק אין הפצה, נעם א חלק אין מזכה זיין נאך אידן מיטן זיי געבן די עצות פון רבי'ן.

היינט הייבן מיר אן א נייע מסכתא, מען הייבט אן סדר קדשים, מסכת זבחים. הייב אן לערנען היינט די הייליגע גמרא, א איד קען מען זיין נאר מיט די הייליגע גמרא, אז מען לערנט די הייליגע גמרא ווערט מען נאנט צום אייבערשטן און מען איז אפגעהיטן פון אלע שלעכטס.

איך וויל דיר בעטן זאלסט מיר העלפן אין אומאן צוריק מאכן די קהילה פאר א משפחה, איך וויל זייער זאלסט קענען אלעמען ביי די נעמען און דו זאלסט יעדן איינעם באגריסן, איך וויל זייער די קהילה זאל בלייבן א משפחה, זאלסט יעדן געבן שלום, צו יעדן רעדן ווייך, קיינעם נישט געבן א שטופ, און אז דו האסט א טיש מיט וועם דו עסט די סעודות און איינער האט זיך דארט אראפגעזעצט - זאלסטו יענעם נישט אוועק שטופן, נישט אויפהייבן, נאר יעדן איינעם ליב האבן.

איך פאר אם ירצה ה' מארגן מיט די טשארטער, דאנערשטאג וועל איך זיין אין ליזענסק ביים הייליגן רבי ר' אלימלך זכותו יגן עלינו, אוי דאס הארץ בענקט... און פרייטאג ערב שבת די אונטערשטע שבת פון יאר וועלן מיר זוכה זיין אנצוקומען צום הייליגן רבי'ן אין אומאן, אוי דאס הארץ בענקט... מי יתן לי אבר כיונה...

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ג' פרשת כי תצא, ט' אלול, שנת תשפ"ה לפרט קטן

לכבוד ... נרו יאיר

היינט ענדיגן מיר מסכת עבודה זרה און מארגן הייבן מיר אן א פרישע מסכתא, מסכת הוריות; יעצט איז א גוטע צייט דו זאלסט מאכן א פרישע התחלה צו לערנען די הייליגע תורה. דער רבי זאגט (שיחות הר"ן, סימן קלז), 'מעות' איז די ראשי תיבות ו'אין ע'בירה מ'כבה ת'ורה (סוטה כא.), עבירה לעשט נישט אויס די תורה; דורך לערנען בקביעות תורה יעדן טאג איז מען זוכה צו שפע.

לעת עתה בין איך אין וויליאמסבורג, איך האב יא זייער געוואלט בלייבן אין שטעטל. איך בין יעצט זייער געדרוקט, מאך א תפילה פאר מיר, מיין קאפ דרוקט מיר, מיין הארץ דרוקט מיר, איך בין שולדיג פאר די מלמדים ניינציג טויזנט דאלער, און פאר די טיטשערס מיט די אפיס בין איך שולדיג הונדערט פופציג טויזנט דאלער, מען האט נישט געצאלט פון פסח פאר די טיטשערס און פאר די אפיס, איך גלייב דער אייבערשטער וועט מיר מאכן נסים.

שכר לימוד זאלסטו צאלן פאר אלעס, פון שכר לימוד פארלירט מען נישט.

דער אייבערשטער זאל העלפן זאלסט האבן הצלחה אין אלע עניינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ב' פרשת נצבים, כ"ב אלול, שנת תשפ"ה לפרט קטן

לכבוד ... נרו יאיר

היינט זענען מיר מסיים מסכת הוריות און מארגן הייבן מיר אן מסכת זבחים; איך וויל זייער זאלסט אנהייבן מארגן סדר קדשים, מסכת זבחים, און נעם פון די מפיצים א בית נצחי; אזוי וועסטו קענען מיט האלטן די דפים ביי די נסיעה, וועסט נישט ארויספאלן די אלע טעג וואס מיר פארן צום רבי'ן. אשרינו אז מיר האבן דעם סדר דרך הלימוד פון רבי'ן, אז מען זאל זאגן די ווערטער אפילו בלי הבנה, אפילו אן פארשטיין (שיחות הר"ן, סימן עו); דאס קען מען טון אונטערוועגנס אויך.

היינט נאכט איז דא א פארברענג פאר די פרויען, זיי מחזק זיין פארן שיקן די מענער קיין אומאן; גיי אהיים, בלייב מיט די קינדער, לאז דיין ווייב זיך אנשעפן פרישע כוחות, לאז איר נישט מיט נעמען די בעבי, בלייב מיט די קינדער אין שטוב, (א גאנץ יאר זאלסטו אזוי טון, מעגסט בלייבן די צוויי שעה מיט די קינדער, מעגסט געבן דיין ווייב איינמאל א וואך די מעגליכקייט אביסל ארויסגיין זיך אנשעפן פרישע כוחות).

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום א' פרשת עקב, ט"ז מנחם-אב, שנת תשפ"ה לפרט קטן

טייערער ליבער ... נרו יאיר, קרית ברסלב

איך האב הנאה יעצט זומער ווען איך בין אין שטעטל דיך צו זען, איך האב דיך ליב, איך וועל זיך נאך מער פרייען אז דו וועסט קומען אינדערפרי צום גמרא שיעור, עס איז א מחי' אנצוהויבן דעם טאג מיט לערנען גמרא; אלעס איז אנדערש, ווייל מיט תורה איז די לעבן א לעבעדיגע זאך, מען באקומט א רוח חיים דורך לערנען תורה.

שטארק זיך, הויב שוין אן האלטן פון זיך, ביסט א גוטער מענטש, ביסט א גוטער אינגערמאן, נאר איין חסרון האסטו, אז דו האלסט נישט פון זיך, און דאס לאזט נישט וואקסן.

שרייב מיר דיינע סיומים, שרייב מיר דיינע שיעורים; וועסט מיך מחי' זיין.

בעזרת ה' יתברך - יום ה' פרשת עקב, כ' מנחם-אב, שנת תשפ"ה לפרט קטן

לכבוד ... נרו יאיר

זע צו זיין שטארק מיט לערנען יעדן טאג גמרא, ווען מען לערנט די הייליגע גמרא ווערן די קליפות ומשחיתים פארברענט, זיי ווערן בטל ומבוטל כעפרא דארעא. מוהרא"ש ברענגט אן א שיעור מאל אין די בריוו די ווערטער וואס די הייליגע חכמים זכרונם לברכה זאגן (ירושלמי ראש השנה ד, ח): "כֵּיוָן שֶׁקִּבַּלְתֶּם עֲלֵיכֶם עוֹל תּוֹרָה", ווען א מענטש איז מקבל אויף זיך צו לערנען די הייליגע תורה, דאס מיינט ווען מען הויבט אן זאגן די ווערטער פון די תורה, מען נעמט א גמרא און מען זאגט די ווערטער פון די גמרא - "מַעֲלֶה אֲנִי עֲלֵיכֶם כְּאִילוּ לֹא חֲטָאתֶם מִיְמֵיכֶם", רעכנט אים דער אייבערשטער אזוי ווי ער האט קיינמאל נישט געזינדיגט.

הויב היינט אן לערנען גמרא, זאג די ווערטער אפילו אן פארשטיין. היינט נאכט איז די יארצייט פון הייליגן בעלזא רב, הרב הקדוש רבי אהרן זכותו יגן עלינו, מיר האבן דא ביי אונז אין שטעטל אן אייניקל פונעם גבאי פון הרב הקדוש מבעלזא זכותו יגן עלינו, זאגט ער מיר אלץ אז זיין זיידע דער גבאי האט אלץ געזאגט אז ווען מען פלעגט זאגן פארן רב א גוטע וואך, האט דער רב געענטפערט: "א גוטע וואך איז א בלאט גמרא"; אן גמרא קען מען נישט לעבן א גוטע וואך.

מיר גרייטן זיך שוין צו אונזער נסיעה קיין אומאן, צו זיין ביים רבי'ן ראש השנה, אין פינף און דרייסיג טעג פארן מיר קיין אומאן, מען דארף אין אומאן אויך רחמי שמים צו אויסניצן די פלאץ ריכטיג, נישט טרעפן קיין לצים; די וואס דרייען זיך אין ברסלב און פאררופן זיך ברסלב און שפעטן פון די דרך הלימוד און מאכן ליצנות פון צדיקים. איך ווייס נישט דיינע פלענער וואו דו גייסט איינשטיין אין אומאן, ביי אונז אין בנין איז שוין נישטא קיין פלאץ; אלע בעטן אין אלע שטאקן זענען אנגעפולט, איך בעט דיך זייער, גיי נישט ביי די לצים, גיי נישט ביי די וואס שפעטן פון מוהרא"ש, ווייל וואס וועסטו טון אז עס וועט אריינגיין אין דיר ליצנות? וועסטו שוין נישט קענען לערנען און דאווענען, וועסט ווערן אפגעשניטן.

איך געדענק מיינע ערשטע יארן ווי מען האט נאכנישט געהאט קיין אייגענע ד' אמות, אנשי שלומינו תלמידי היכל הקודש האבן זיך געוואלגערט אומעטום, און איך בין געווען אין קרית ברסלב אויף די גאס פושקינא, און מען האט געשפעט פון מיר ראש השנה אז איך בין נישט יוצא די קיבוץ, נאר די וואס דאווענען אין קלויז זענען יוצא די קיבוץ, עס איז מיר געווען גוט שווער, ברוך השם במשך די יארן האבן מיר געמאכט אייגענע דירות נאר מיט תלמידי היכל הקודש, די באהאלטענע צדיקים פון דור, אזוי האבן מיר נישט געהערט אין די הייליגע טאג ראש השנה ליצנות.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ב' פרשת ואתחנן, י' מנחם-אב, שנת תשפ"ה לפרט קטן

לכבוד ... נרו יאיר

דעם זומער בין איך אין קרית ברסלב, עס איז ממש א מחי' צו זיין דא מיט אנשי שלומינו. אינדערפרי לערנען מיר דעם בלאט גמרא אינאיינעם, צווישן די ביימער און די גראז, הינטן פון שול; עס איז אזוי געשמאק, עס איז נישטא עפעס בעסערס, הלואי וואלסטו אויך געלערנט יעדן טאג די בלאט גמרא, דאס וועט זיין א גוטע הכנה פאר די הייליגע טעג, ווייל די בעסטע הכנה פאר די הייליגע טעג איז לערנען גמרא. אזוי ווי מוהרא"ש זכותו יגן עלינו האט דערציילט, דער הייליגער רבי אלימלך פון ליזענסק זכותו יגן עלינו האט באשטימט זיין תלמיד דער הייליגער רבי מענדעלע מרימנוב זכותו יגן עלינו זאל זיין בעל תפילה ראש השנה ביי אים אין שול, און איין יאר האט דער צדיק רבי מענדעלע זכותו יגן עלינו זיך באהאלטן, ער האט נישט געוואלט זיין דער בעל תפילה, און דער הייליגער רבי אלימלך פון ליזענסק האט נישט געוואלט מען זאל צושיקן א צווייטן, ער האט געזאגט מען וועט נישט דאווענען ביז מען וועט אויפזוכן דעם רבי מענדעלע.

אלע תלמידים האבן זיך ארויסגעלאזט זוכן דעם רבי מענדעלע, ביז מען האט אים געטראפן, מען האט אים געזאגט: "דער רבי לאזט נישט קיינעם צוגיין צום עמוד, דער רבי זאגט ער ווארט אויף דיר"; דער רבי ר' מענדעלע האט נישט געהאט קיין ברירה, ער איז צוגעגאנגען צום עמוד, און נאכן דאווענען האבן אלע זייער געמוטשעט דעם רבי מענדעלע ער זאל זאגן פארוואס ער האט נישט געוואלט צוגיין צום עמוד. האט ער געזאגט, ער האט מקובל, ווער עס ווערט אויסדערוועלט צו זיין בעל תפילה אין די ימים נוראים מוז לערנען גמרא יעדן טאג פון ט"ו באב, און היות די יאר איז אים געווען זייער שווער די נסיעה פון פריסטיק קיין ליזענסק, און ער האט נישט געלערנט יעדן טאג גמרא, האט ער נישט געוואלט צוגיין צום עמוד, ביז דער רבי אלימלך האט אים געהייסן האט ער געדארפט פאלגן; זעט מען ווי גרויס און הייליג איז לערנען גמרא.

דאס וואס מען קריגט אויפן רבי'ן הויבט זיך נישט אן יעצט, אזוי גייט עס, אלע יארן האט מען גערעדט אויף ברסלב'ע חסידים, אויך אויפן רבי'ן האט מען געקריגט, ווען באמת קריגט קיינער נישט אויף ברסלב, אזוי ווי דער רבי זאגט (שיחות הר"ן, סימן קפב): "עָלַי אֵין חוֹלְקִים כְּלָל, רַק הֵם חוֹלְקִים עַל מִי שֶׁעָשָֹה כַּךְ כְּמוֹ שֶׁבּוֹדִים הַחוֹלְקִים עָלָיו, וְעַל אִישׁ כָּזֶה בְּוַדַּאי רָאוּי לַחֲלֹק", אויף מיר קריגט מען נישט, מען קריגט אויף אזא איינעם וואס האט געטון דאס וואס זיי זאגן אויף מיר אז איך האב עס געטון, און אויף אזא איינעם דארף מען טאקע קריגן.

מניעות דארף זיין, מען קען נישט קומען צום רבי'ן נאר אז מען ברעכט דורך די מניעות, דער רבי האט דאס געברענגט, דער רבי האט געוואלט עס זאל זיין מחלוקת. ווען דער רבי איז צוריק געקומען פון די הייליגע נסיעה קיין ארץ ישראל האט ער געזאגט פאר אנשי שלומינו, איך האב פאר אייך געברענגט א מתנה – "מחלוקת", פון היינט אן וועט מען קריגן אויף אונז. דער רבי האט געזאגט (חיי מוהר"ן, סימן תב): "איך האב די כח אראפצונעמען פון מיר אלע מחלוקת, איך האב בכח צו מאכן אז די גאנצע וועלט זאל קומען צו מיר און זינגען 'יחי אדונינו מורינו ורבינו', אבער איך וויל דאס נישט ווייל עס איז דא מדריגות וואו מען קען נישט אנקומען דערצו נאר דורך בזיונות", דורכדעם וואס מען טשעפעט און מען שפעט - איז דער מענטש ביי זיך צעבראכן, עס פאלט אוועק דער 'איך', עס איז נישטא דער 'מיך', 'זיך'; דאס האט דער רבי געוואלט.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת דברים, ד' מנחם-אב, שנת תשפ"ה לפרט קטן

לכבוד ... נרו יאיר

אויף די וועלט דארף מען האבן אסאך סבלנות, יעדער איינער גייט אריבער וואס ער גייט אריבער, מען דארף אייזערנע געדולד נישט אויפצוגעבן, נישט ווערן אויפגערעגט וכו' וכו'. דער רבי דערציילט, ווען ער איז געווען א קליין קינד און זיין מאמע די צדיקת פיגא האט געקעמט זיינע האר, עס האט אים וויי געטון, ער האט געוואלט שרייען אזוי ווי די סדר ביי קינדער וואס שרייען און וויינען ווען מען קעמט זיי די האר, דער רבי האט אבער נישט געשריגן, דער רבי האט געזאגט: "איך האב שוין דעמאלט פארשטאנען אז אויף די וועלט דארף מען ליידן".

אז דו וועסט אריינעמען אמונה אין דיר וועט דיר אלעס גיין גרינגער. דער הייליגער רבי זאגט (שיחות הר"ן, סימן קצד): "אַחַר כָּל הַיִּסּוּרִים, אַף עַל פִּי כֵן הַשֵּׁם יִתְבָּרַךְ מֵטִיב עִמָּנוּ", נאך אלע יסורים וואס גייט אריבער אויפן מענטש געבט דער אייבערשטער אויך אסאך גוטע זאכן, "רַק שֶׁאֵין אָנוּ רוֹצִים לְהַקְטִין אֶת הַיִּסּוּרִים", נאר דער מענטש אליין וויל זיך נישט גרינגער מאכן מיטן אויפזוכן דאס גוטס וואס דער אייבערשטער טוט מיט אים. אפילו מען גייט אריבער באמת שווערע ביטערע יסורים, "אֲבָל נֶגֶד דְּבֵקוּת אֶחָד לְהַשֵּׁם יִתְבָּרַךְ מַה שֶּׁזּוֹכִין לְאֵיזֶה בְּחִינָה שֶׁל דְּבֵקוּת בְּמַחֲשָׁבָה אוֹ בִּבְחִינָה אַחֶרֶת", אבער ווען דער מענטש ווערט נענטער דורכדעם צום אייבערשטן, ער הויבט אן לעבן מיטן אייבערשטן, "כָּל הַיִּסּוּרִים אֵינָם כְּלוּם נֶגֶד זֶה", איז אלע יסורים גארנישט אנטקעגן דעם, "וְעַל יָדָם בְּעַצְמָם מִתְקָרְבִים וּמִתְדַּבְּקִים אֵלָיו יִתְבָּרַךְ", ווייל דורכדעם ווערט א מענטש נענטער צום אייבערשטן. "כִּי נוֹטְלִין מִמֶּנִּי הַבְּרִיאוּת גּוּפִי, מִי נוֹטֵל מִמֶּנִּי הַבְּרִיאוּת, הַשֵּׁם יִתְבָּרַךְ, אִם כֵּן אֲנִי נִדְבָּק בּוֹ יִתְבָּרַךְ", מען הויבט אן פארשטיין 'ווער מאכט מיר די אלע ווייטאג? ווער נעמט מיר אוועק מיין געזונט? דער אייבערשטער אליין ברענגט מיר דאך די יסורים, אויב אזוי ווער איך נענטער צו אים'. "וְכֵן כְּשֶׁלּוֹקֵחַ חַס וְשָׁלוֹם, אֵיזֶה בֵּן, מִי לוֹקֵחַ, הַשֵּׁם יִתְבָּרַךְ, אִם כֵּן אַדְּרַבָּא עַתָּה הוּא סָמוּךְ יוֹתֵר אֵלָיו יִתְבָּרַךְ, כִּי בָּעוֹלָם הַבָּא סְמוּכִין יוֹתֵר לְהַשֵּׁם יִתְבָּרַךְ", אויב חס ושלום מען פארלירט א קינד און מען הויבט אן פארשטיין 'ווער האט דאס מיר אוועק גענומען? דער אייבערשטער, אויב אזוי ווער איך דאך נענעטער צו אים', עיין שם.

מוהרא"ש זאגט, דער וואס וויל נישט ליידן אביסל - ליידט אסאך, און דער וואס בייגט איין דעם קאפ פארן אייבערשטן, ער איז גרייט צו ליידן דאס ביסל, און אז מען פארשעמט אים איז ער דאס מקבל באהבה - ליידט מען נישט.

איך וויל דיך נאכאמאל מחזק זיין זאלסט יעדן טאג לערנען גמרא. לערן א בלאט גמרא, אז דו קענסט גיין מיטן טעגליכן בלאט - איז גוט, און אז דו פאלסט ארויס און דו שפירסט ווי דו קענסט נישט גיין די וועג מיט גיין יעדן טאג א בלאט - זאלסטו זיך מאכן דיין אייגענע סדר אין ש"ס; הויב אן מסכת ברכות, לערן א בלאט נאך א בלאט יעדן טאג, דאס וועט מכפר זיין אויף אלע דיינע חטאים.

היינט איז די יארצייט פון הרב הקדוש רבי בנציון פון באבוב זכותו יגן עלינו. מוהרא"ש דערציילט, ער פלעגט זאגן פאר זיינע תלמידים: "אויב וועל איך ענק זאגן צו פאסטן און צו מאכן סיגופים, עבודות קשות - וואלט איר מיך געגלייבט אז דאס איז מתקן דעם מענטש פון אלע חטאים, און אז איך זאג ענק איר זאלט לערנען א בלאט גמרא - דאס גלייבט איר נישט אז דאס איז מתקן דעם מענטש, עס זעט אויס צו פשוט"; ער האט זיי געזאגט אז דאס איז נאך מער מתקן פון אלע סיגופים.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - ערב שבת קודש פרשת קרח, ב' דראש חודש תמוז, שנת תשפ"ה לפרט קטן

טייערער ... נרו יאיר

איך פריי זיך זייער צו הערן פון דיר אז דו ביסט פרייליך און צופרידן, און אז דו לערנסט יעדן טאג די בלאט גמרא פונעם טאג, אז מען לערנט גמרא ווערט מען פרייליך און צופרידן. מען דארף חיזוק זיך אוועק צו זעצן לערנען, אבער איינמאל מען לערנט תורה ווערט מען פרייליך און צופרידן.

טייערער ..., איך וויל דיר זייער בעטן זאלסט זיך פארלייגן מיט אלע דיינע כוחות צו גיין אין שול דאווענען די דריי תפילות, ווייל דאס איז די פארעם פון זיין א איד און בלייבן א איד, און איך בין זיכער, אויב דו וועסט זיין שטארק אין דאווענען די דריי תפילות – וועסטו האבן גרויס הצלחה.

בעזרת ה' יתברך - ערב שבת קודש פרשת שלח, מברכין תמוז, כ"ד סיון, שנת תשפ"ה לפרט קטן

לכבוד ... נרו יאיר

היינט הויבן מיר אן מסכת עבודה זרה, איך וויל דיר בעטן זאלסט אנהויבן די מסכתא און לערנען יעדן טאג די בלאט גמרא. עס איז גאר אנדערש א טאג וואס מען לערנט תורה, עס איז גאר אנדערש; עס איז אן אנדערע טאטע, מען איז אן אנדערע מאן, אן אנדערע מענטש ביי די ארבעט, עס איז כרחוק מזרח צו מעריב; א טאג וואס מען לערנט גמרא, וואס מען זאגט גמרא - איז מען הייליג און נאנט צום אייבערשטן.

איך ווייס אז דו ווילסט נישט אנהויבן נאך א מסכתא ווייל דו האסט שוין אזויפיל מאל אנגעהויבן און עס האט נישט אנגעהאלטן, דו ביסט מיואש, דו ווילסט אפילו נישט פרובירן, אבער טייערער ברודער, וואס וועסטו דערלייגן? וואס קענסטו דערלייגן אז דו וועסט לערנען? וועסט דאך נאר פארדינען; וואלט איך געקומען צו דיר בעטן געלט צו אינוועסטירן קען זיין עס וועט פארלירן און עס קען זיין דו וועסט פארדינען, און אפילו עס וועט פארדינען - וואס וועט זיין מיט די רווחים? דאס וועט מען פון פריש אינוועסטירן, און ווער זאגט אז דעמאלט וועט עס מאכן רווחים... אבער ביי די הייליגע תורה, אז דו וועסט לערנען די הייליגע תורה - וועסטו נאר מרוויח זיין.

די וואך שבת בענטשט מען שוין ראש חודש תמוז, עס געבט א קיצל, מען האלט שוין דא, עס קומען שוין כמעט די הייליגע טעג, בעט איך דיר זייער זאלסט שבת זיין זייער פרייליך אז דו ביסט א איד. דער רבי האט זייער אסאך גערעדט פון זיין פרייליך שבת, איינמאל פרייטאג צו נאכטס איז רבי נתן געווען ביים רבי'ן, דער רבי האט אים געפרעגט: "ביסט פרייליך שבת?" האט רבי נתן געענטפערט: "איך ווער אסאך מאל זייער ערנסט", האט אים דער רבי געזאגט: "לֹא כָּךְ הוּא, הָעִקָּר הוּא שִׂמְחָה", שבת דארף מען זיין נאר פרייליך, און דעמאלט האט דער רבי געזאגט די תורה (לקוטי מוהר"ן חלק ב', סימן יז): "צָרִיךְ לִזָּהֵר מְאֹד לִהְיוֹת שָׂמֵחַ וְטוֹב לֵב בְּשַׁבָּת", שבת דארף מען זיין זייער פרייליך און גוטמוטיג, "כִּי מַעֲלוֹת וּקְדֻשּׁוֹת שַׁבָּת גְּדוֹלָה וִיקָרָה מְאֹד", ווייל שבת איז זייער הייליג און זייער טייער, עיין שם.

אויך וויל איך באזונדער שרייבן פאר מיינע טייערע ברידער אין ארץ ישראל, יעצט ביי די מלחמה מיט איראן. מען הערט אז אידישע קינדער זענען געשעדיגט געווארן פון די באמבעס, און בעיקר מיט די פחד מיט וואס מען לעבט שוין א גאנצע וואך, פון די שרעק פון די אלארעמס, און פון די קולות פון די באמבעס; וויל איך ענק בעטן, געבט אכטונג אויף ענקערע משפחות, געבט אכטונג אויף די קינדער, מאכט זיי פרייליך, מאכט ווערטלעך, און ווען ענק לויפן צו די בונקערס זאלן ענק חס ושלום נישט לויפן מיט שרעק און פאניק, ווייל דאס איז זייער שעדליך, עס קען בלייבן אויף די לעבן, ענק דארפן זינגען ניגוני אמונה, לעבעדיגע ניגונים. יעצט איז נישט קיין צייט פאר שטייטע ווארעמע ניגונים, מען דארף פרייליך מאכן די משפחה, די קינדער זאלן זיין רואיג.

א גוט שבת.

בעזרת ה' יתברך - יום ה' פרשת שלח, כ"ג סיון, שנת תשפ"ה לפרט קטן

לכבוד ... נרו יאיר

היינט ענדיגן מיר אינאיינעם מסכת שבועות און מארגן הויבן מיר אן מסכת עבודה זרה. איך וויל דיך מחזק זיין זאלסט לערנען יעדן טאג דעם בלאט גמרא, און אז דו קענסט נישט לערנען דעם בלאט גמרא - זאלסטו זאגן די ווערטער, גורס זיין די הייליגע אותיות התורה. די תורה וועט דיר געבן רוח חיים, דער רבי זאגט (לקוטי מוהר"ן חלק א', סימן ח), אין די תורה ליגט באהאלטן די רוח חיים פונעם אייבערשטן, און דורך לערנען תורה באקומט מען א לעבעדיגע גייסט, מען הויבט אן לעבן, מען הויבט אן הנאה האבן פון די לעבן.

איך ווייס נאכנישט וועגן די שיעור היינט נאכט, היות עס איז דא א חתונה אין ישיבה און איך ווייס נאכנישט אויב איך וועל דארפן אונטערפירן די חתן וכו', וועט נישט זיין קיין שיעור; אויב זאכן וועלן זיך טוישן - וועט מען שפעטער מודיע זיין וואו די שיעור וועט זיין.

וואס זאל איך דיר זאגן, וואס דארפסטו מער ווי די וואכעדיגע סדרה, ווען די תורה זאגט אויף די מרגלים (במדבר יג, ג): "אֲנָשִׁים רָאשֵׁי בְנֵי יִשְׂרָאֵל", און רש"י זאגט: "וְאוֹתָהּ שָׁעָה כְּשֵׁרִים הָיוּ", זיי זענען געווען ערליכע אידן דעמאלט, און וואס האט זיך אזוי שלעכט געענדיגט, מיט רעדן קעגן דעם אייבערשטן און קעגן משה רבינו; עס כאפט א שרעק ווען מען לערנט די פרשיות, ווי גרויסע מענטשן וואס די תורה איז מעיד אז זיי זענען געווען ערליכע, זענען אויך אזוי אוועק געפאלן, צו אוועק פירן גאנץ כלל ישראל פונעם אייבערשטן און צו מאכן א בכי' לדורות, איז דאך זיכער אז אונז קליינע מענטשלעך דארפן זיך זייער אכטונג געבן נישט צו גיין קעגן צדיקים.

איין עצה איז דא, די וואך זעט מען אין די פרשה איין עצה, רש"י זאגט (שם, טז): "הִתְפַּלֵּל עָלָיו, קָהּ יוֹשִׁיעֲךָ מֵעֲצַת מְרַגְּלִים", משה רבינו האט געדאווענט צום אייבערשטן אז זיין תלמיד יהושע זאל נישט אנקומען צו די עצה פון די מרגלים, און אויך כלב בן יפונה איז געלאפן צו קברי אבות מתפלל זיין (רש"י שם, כב), דארפן מיר אויך דאס טון, בעטן דעם אייבערשטן נישט צו הערן לשון הרע און נישט צו האבן מיט מחלוקת אויף קיינעם נישט, און אודאי און אודאי נישט אויף צדיקים.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת תזריע מצורע, ב' דראש חודש אייר, ט"ז לעומר, שנת תשפ"ה לפרט קטן

מיין טייערער ... נרו יאיר

איך פריי זיך זייער צו הערן אז פסח ווען דו האסט געגעסן מצה האסטו געבעטן דעם אייבערשטן דאס זאל זיין א רפואה פאר דיין מאגן, און ברוך השם עס טוט דיר מער נישט וויי, ביסט געזונט און שטארק.

איך וויל דיר בעטן זאלסט קומען יעדע נאכט אין שול צום שיעור וואס דער דיין שליט"א לערנט פאר. מען מוז זיך קובע זיין עתים לתורה, מען מוז האבן א שיעור אין תורה; דאס הייסט אויסער דיינע שיעורים כסדרן וואס דו לערנסט אין מקרא, משנה, גמרא, מדרש, הלכות וכו' - זאלסטו זיך קובע זיין צו גיין צום שיעור גמרא.

דער אייבערשטער זאל העלפן זאלסט האבן הצלחה אין אלע ענינים.

א גוטן חודש.

בעזרת ה' יתברך - יום א' פרשת אחרי קדושים, ו' אייר, כ"א לעומר, שנת תשפ"ה לפרט קטן

לכבוד ... נרו יאיר

די וואך גייט צוויי פרשיות, אחרי קדושים, זאלסטו שוין היינט אנהויבן לערנען די פרשה. זיי מעביר סדרה איינגעטיילט לויט די וואך, זונטאג ביז שני, מאנטאג ביז שלישי, דינסטאג ביז רביעי און אזוי ווייטער. אין שולחן ערוך ווערט גע'פסק'נט (אורח חיים סימן רפה, סעיף ג): "מִיּוֹם רִאשׁוֹן וְאֵילַךְ חָשׁוּב עִם הַצִּבּוּר", פון זונטאג קען מען שוין אנהויבן מעביר סדרה זיין. דער משנה ברורה ברענגט אראפ (שם, סעיף קטן ח), פונעם הייליגן ווילנער גאון זכר צדיק לברכה, אז ער האט זיך אזוי געפירט, יעדן טאג האט ער מעביר סדרה געווען אביסל; זונטאג ביז שני, מאנטאג ביז שלישי, דינסטאג ביז רביעי און אזוי ווייטער.

זיי מעביר סדרה מיט רש"י, דאס וועט דיר ברענגען אמונה און יראת שמים. עס איז ידוע ביי סאטמער חסידים אז דער הייליגער קדושת יום טוב זכותו יגן עלינו האט געשיקט זיינע צוויי קינדער דער הייליגער עצי חיים און דער סאטמער רבי זכותם יגן עלינו, ווען זיי זענען נאך געווען גאר קליין, אז זיי זאלן גיין נעמען א ברכה פון דעם הייליגן צדיק רבי מרדכי'לע מנאדבורנא זכותו יגן עלינו. רבי מרדכי'לע האט זיי געבענטשט און זיי געזאגט די ווערטער: "קינדערלעך, פילעוועט זיך אין חומש רש"י (לערנט אסאך חומש רש"י), ווייל איך האב געקענט גרויסע גאונים וואס האבן נישט געוואוסט וואו דער אייבערשטער וואוינט ווייל זיי האבן נישט געלערנט חומש רש"י".

אויך זאלסטו אנהויבן מסכת שבועות, מיר האבן נעכטן אנגעהויבן לערנען מסכת שבועות, א שאד פאר די טעג און די יארן זיי זאלן אריבערגיין אן לערנען יעדן טאג גמרא, אז מען לערנט תורה ווערט מען ריין פון עבירות. חכמינו זכרונם לברכה זאגן (ירושלמי ראש השנה פרק ד, הלכה ח): "כֵּיוָן שֶׁקִּבַּלְתֶּם עֲלֵיכֶם עוֹל תּוֹרָה, מַעֲלֵה אֲנִי עֲלֵיכֶם כְּאִילוּ לֹא חֲטָאתֶם מִיְמֵיכֶם", ווען א מענטש איז מקבל אויף זיך דעם עול תורה, דאס הייסט ער נעמט זיך פאָר צו לערנען יעדן טאג די הייליגע תורה – זאגט דער אייבערשטער: "רעכן איך אים כאילו ער האט קיינמאל נישט געזינדיגט".

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - ערב שבת קודש פרשת תזריע מצורע, ד' אייר, י"ט לעומר, שנת תשפ"ה לפרט קטן

לכבוד ... נרו יאיר

שבת זאלסטו זיין פרייליך און חס ושלום נישט זיין בעצבות ומרה שחורה, דער אייבערשטער האט פיינט דער וואס איז בעצבות ומרה שחורה, בפרט שבת קודש דארף מען זיין נאר פרייליך, זינגען און טאנצן און פאטשן.

אמאל ווען רבי נתן איז געקומען צום רבי'ן און דער רבי האט אים געפרעגט: "ביסטו פרייליך שבת?" האט רבי נתן געזאגט: "צומאל בין איך פרום"; האט אים דער רבי געזאגט: "ניין, שבת דארף מען זיין נאר פרייליך".

דעמאלט האט דער רבי געזאגט די תורה (לקוטי מוהר"ן חלק ב', סימן יז): "צָרִיךְ לִזָּהֵר מְאֹד לִהְיוֹת שָׂמֵחַ וְטוֹב לֵב בְּשַׁבָּת", מען דארף זיין זייער פרייליך שבת, "כִּי מַעֲלוֹת וּקְדֻשּׁוֹת שַׁבָּת גְּדוֹלָה וִיקָרָה מְאֹד", ווייל שבת איז זייער הייליג און טייער, "וְהַכְּלָל, שֶׁצָּרִיךְ לִנְהֹג שִׂמְחָה גְּדוֹלָה בְּשַׁבָּת קֹדֶשׁ, וְלִבְלִי לְהַרְאוֹת שׁוּם עַצְבוּת וּדְאָגָה כְּלָל, רַק לְהִתְעַנֵּג עַל ה'", מען טאר נישט זיין טרויעריג שבת און נישט זיין פארזארגט שבת, נאר פרייליך.

היינט ענדיגט מען מסכת מכות און מארגן שבת קודש הויבן מיר אן מסכת שבועות. הייב אן מסכת שבועות, כאפ זיך מיט מיטן באן, מיט אלע וואס לערנען יעדן טאג א בלאט גמרא, וועסטו זוכה זיין צו זיין אפגעהיטן פון שלעכטס. גמרא היט אפ פון שלעכטס, גמרא איז די ראשי תיבות פון די פיר מלאכים פון די מרכבה עליונה: מיכאל, גבריאל, רפאל און אוריאל; אז מען לערנט גמרא ציט מען צו זיך די פיר מלאכים, מען האט א שמירה עליונה.

איך האב זוכה געווען צו עסן אמאל א סעודה אין יבנאל ביי מוהרא"ש, און דארט איז געקומען נאך א גאסט, און ביי די סעודה שבת אינדערפרי פרעגט מוהרא"ש יענעם גאסט אויב ער האט געלערנט דעם בלאט גמרא, און מוהרא"ש זאגט אים מיט א געבעט, מיט רחמנות: "פארוואס האסטו אפגעלאזט די סדר דרך הלימוד? דערמאן זיך די צייטן וואס דו האסט יארן צוריק געלערנט אין ישיבת היכל הקודש, ווי זיס עס איז דיר דעמאלט געווען, פארוואס זאלסטו נישט צוריק ארויפקומען אויפן באן, רכבת היכל הקודש?"

איך האב דעמאלט געזען און פארשטאנען אז ביי מוהרא"ש איז די בלאט גמרא אזא הייליגע זאך, אזא וויכטיגע זאך, עס איז אים געגאנגען בנפשו אז יעדער איד זאל לערנען די הייליגע תורה.

עס איז נישט שווער צו לערנען יעדן טאג א בלאט גמרא, היינט איז דא גמרות מיט שיינע נקודות, הערליך אויסגעשטעלט, מען דארף נאר מחליט זיין אז מען הויבט אן לערנען, און בעטן דעם אייבערשטן מען זאל זוכה זיין צו לערנען תורה.

א פרייליכן שבת.

בעזרת ה' יתברך - יום ג' פרשת ויקרא, ג' ניסן, שנת תשפ"ה לפרט קטן

לכבוד ... נרו יאיר

וויפיל דארפן מיר דאנקען דעם אייבערשטן אז מיר האבן מוסדות פאר אונזערע זין און טעכטער וואס לערנען די הייליגע תורה, די הייליגע אמונה - אזוי ווי מיר האבן מקבל געווען פון מוהרא"ש וואס האט מקבל געווען פון רבי'ן ווי אזוי צו מחנך זיין די קינדער. וויפיל דארפן מיר דאנקען דעם אייבערשטן אויף דעם, "אילו פינו מלא שירה כים ... אין אנחנו מספיקים להודות לך", פאר די מוסדות, אז די קינדער וואקסן אויף מיט א ריינע אמונה, מיט שמחת המצוות, מיט אמונת צדיקים וכו'.

איך בין אסאך אריבער במשך די יארן, פון אנהויב, ביים עפענען די חדר און בית פיגא האב איך אסאך מיטגעמאכט, ביטערע שווערע רדיפות פון אינדרויסן, און בעיקר פון אינעווייניג, און מיט די חיזוק פון מוהרא"ש האב איך געהאט די כוחות צו קענען ווייטער אנהאלטן און ווייטער ממשיך זיין, ביז היינט האבן מיר שוין מוסדות אויך אין ארץ ישראל און אויך אין אמעריקע אין אפאר שטעט, און איך האף צום אייבערשטן בקרוב עפענען אין לעיקוואד א תלמוד תורה און א בית פיגא.

איך וויל דיר נאכאמאל דערמאנען א וויכטיגע זאך פאר די טובה פון דיינע קינדער, אויב דו ווילסט זען הצלחה ביי דיינע קינדער - דארפסטו מיט שטימען און מיט זינגען די זעלבע ניגון וואס מען רעדט און מען זינגט אין אונזער מוסד, און אפילו דו פארשטייסט אנדערש, דו האסט אנדערע השקפות וכו' - זאלסטו מיט זינגען די זעלבע ניגון, ווייל אויב מען מאכט אוועק אין שטוב די מוסד און ווי אזוי מיר לערנען מיט די קינדער - ווערן די קינדער צעמישט און זיי זענען נישט מצליח.

ביי אונז אין בית פיגא לערנט מען וואס א פרוי דארף וויסן נאך די חתונה, מיר לערנען נישט צו ווערן קיין דאקטוירים, לויערס וכו', מיר לערנען ווי אזוי מען איז א גוטע מאמע און א ווארעמע ווייב, און צו לעבן מיט אמונה, זיין פרייליך, און אין תלמוד תורה און אין ישיבה באקט מען אריין אמונה, מען באקט אריין קדושה וטהרה, תפילה והתבודדות, און אז מען לאכט אפ פונעם מנהל, מלמד וכו' - ווי אזוי ערווארט מען אז די קינדער זאלן מקבל זיין פון זיי?

זיי שטארק מיטן בלאט גמרא אזוי ווי לייגן תפילין; מוהרא"ש ברענגט פון דעם גרויסן גאון רבי שעפטיל זכר צדיק לברכה, דער זון פונעם של"ה הקדוש זכותו יגן עלינו, וואס ער שרייבט אין זיין צוואה (בסוף ספר יש נוחלין), אז לערנען א בלאט גמרא יעדן טאג דארף זיין א חיוב פארן מענטש אזוי ווי אנטון תפילין יעדן טאג.

דער אייבערשטער זאל העלפן מיר זאלן זוכה זיין צו (פסחים קטז:): "וְנֹאכַל שָׁם מִן הַזְּבָחִים וּמִן הַפְּסָחִים"; און צו (מיכה ז, טו): "כִּימֵי צֵאתְךָ מֵאֶרֶץ מִצְרָיִם אַרְאֶנּוּ נִפְלָאוֹת", אמן.

בעזרת ה' יתברך - ד' פרשת תרומה, כ"ט שבט, שנת תשפ"ה לפרט קטן

מיין טייערער ... נרו יאיר, קרית ברסלב

איך וויל האבן מיט דיר א נאנטע שייכות, איך טראכט פון דיר אסאך. איך האף דו זעסט מיינע בריוו, איך הער נישט צוריק פון מיינע בריוו, איך ווארט צו הערן פון דיר און אויך וויל דיך זען מער.

אויך וויל איך דיר בעטן זאלסט גיין יעדע נאכט לערנען דעם בלאט גמרא ביי די שיעור פונעם דיין שליט"א אין שטעטל, ווייל נאר אז מען לערנט תורה ווערט מען פרייליך, נישטא נאך א זאך וואס מאכט פרייליך דעם מענטש - ווי לערנען די הייליגע תורה.

קום אריין קיין וויליאמסבורג יעדע שטיק צייט, איך וויל רעדן מיט דיר פנים בפנים.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת תרומה, כ"ה שבט, שנת תשפ"ה לפרט קטן

לכבוד ... נרו יאיר

באניי זיך, הויב אן צוריק לערנען יעדן טאג א בלאט גמרא, עס וועט דיר ליכטיג ווערן צוריק דיין לעבן, וועסט זען גלייך א חילוק אין יעדע פרט פון דיין לעבן.

מוהרא"ש זאגט פשט אין די ווערטער וואס חכמינו זכרונם לברכה זאגן (סנהדרין כד.) אויפן פסוק (איכה ג, ו): "בְּמַחֲשַׁכִּים הוֹשִׁיבַנִי כְּמֵתֵי עוֹלָם, 'זֶה תַּלְמוּד בַּבְלִי'"; ווען איינער וויינט און קלאגט 'בְּמַחֲשַׁכִּים הוֹשִׁיבַנִי, מיין לעבן איז מיר טונקל, כְּמֵתֵי עוֹלָם, מיין לעבן איז מיר טויט', קומען די הייליגע חכמים און מען טרייסט אים, 'זֶה תַּלְמוּד בַּבְלִי', עס איז דא אן עצה פאר דיר, נעם די הייליגע גמרא און לערן גמרא, די הייליגע גמרא וועט דיר ליכטיג מאכן, דאס וועט דיר געבן לעבן.

נעם א גמרא לערן דעם בלאט גמרא, (היינטיגע בלאט איז סנהדרין דף סח), וועסט באקומען א פנים פון א מענטש, אן גמרא זעט מען אויס ווי א הונט; פארפאלן, אזוי האבן צדיקים געזאגט, נאר אז מען לערנט תורה האט מען א צורת אדם, און נאר די פרקים משניות און בלעטער גמרא וועלן אונז באשיצן אויף די וועלט און אויף יענע וועלט. אזוי ווי חכמינו זכרונם לברכה זאגן (אבות ו, ט): "אֵין מְלַוִּין לוֹ לָאָדָם ... אֶלָּא תוֹרָה וּמַעֲשִׂים טוֹבִים בִּלְבַד", וואס בלייבט דען פונעם מענטש? וואס נעמט מען מיט אין קבר? נאר די בלעטער גמרא, די מצוות און מעשים טובים; א שאד דער טאג זאל אריבערגיין אן לערנען גמרא, גמרא באשיצט דעם מענטש אויף די וועלט און אויף יענע וועלט.

מיטן אייבערשטנ'ס הילף וועל איך זיין דעם קומענדיגן שבת אין קרית ברסלב.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת שמיני, אסרו חג פסח, כ"ג ניסן, ח' לעומר, שנת תשפ"ה לפ"ק

לכבוד ... נרו יאיר

חסדי השם יתברך אז עס איז אריין אין אונז אזא הייליגע יום טוב פסח, מיר האבן זוכה געווען צו טון די מצוות פון אויסרוימען די חמץ און עסן די הייליגע מצה און אזוי ווייטער, יעצט דארפן מיר נעמען די יום טוב אויף א גאנצע יאר, מיר דארפן זיך פרייען מיט די מצוות, דאס וועט זיין א שמירה פאר אונז פאר די גאנצע יאר.

היינט הויבן מיר אן די דריטע פרק אין מסכת מכות, דף יג, בעט איך דיר מיין טייערער ליבער ברודער כאפ זיך מיט, כאפ זיך ארויף אויפן וואגן און לערן דעם בלאט גמרא, זאג די ווערטער אפילו אן פארשטיין. אויך זאלסטו מעביר סדרה זיין, ווייל נאר די תורה בלייבט פונעם מענטש און נאר די תורה מאכט גליקליך. אויך זאלסטו גיין א שפאציר יעדן טאג אינדערפרי זיך מתבודד זיין, הויב אן מיט דאנקען דעם אייבערשטן און זיי ממשיך מיט בעטן פאר דיר און פאר דיינע דורות.

היינט אסרו חג איז די טאג וואס מיר האבן זוכה געווען צו עפענען ברסלב'ע מוסדות אין אמעריקע, מוסדות היכל הקודש, און אפילו עס זענען שוין טאקע אריבער אזויפיל יאר דארפן מיר יעדן טאג דאנקען דעם אייבערשטן אז מיר האבן מוסדות וואו צו שיקן אונזערע קינדער זיי זאלן אויפוואקסן מיט אמונת חכמים.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת צו, י"א ניסן, שנת תשפ"ה לפרט קטן

לכבוד ... נרו יאיר

היינט ענדיגן מיר מסכת סנהדרין און מארגן הויבן מיר אן מסכת מכות, איך וויל דיר בעטן זאלסט אנהויבן מסכת מכות, דאס איז דיין הצלחה בזה ובבא, דאס וועט דיר ברענגען שפע און הצלחה, דו וועסט ארויסגיין פון דיינע חובות. אזוי ווי דער רבי האט דערציילט (שיחות הר"ן, סימן קלז), עס זענען געווען צוויי אינגעלייט זייער נאנטע חברים, און איינער פון זיי האט געזען אויף זיין חבר אז ער האט געטון נישט קיין שיינע זאך, ער האט געטון א גרויסע עבירה, און נאך א שטיק צייט זעט ער ווי דער חבר הויבט אן מצליח זיין, און ער איז גאר געווארן א גרויסער ארעמאן, האט ער אנגעפאנגען האבן קשיות אויפן אייבערשטן 'פארוואס איז יענער רייך, יענער איז דאך א בעל עבירה?'

איינמאל האט ער געזען ווי עס שטייען א קופקע און עס הערט זיך ארויס פון דארט א גערודער ווי מען ציילט געלט, איז ער אהין געגאנגען און ער איז צוגעגאנגען צו די געלט, ווען ער האט געוואלט קומען נאנט האט מען אים אפגעשטעלט, מען זאגט אים: "ריר נישט צו צו די געלט, די געלט באלאנגט פאר דיין חבר", האט ער זיי געפרעגט: "איך פארשטיי נישט, פארוואס קומט אים אזויפיל געלט, איך האב דאך געזען מיט מיינע אויגן ווי ער טוט אן עבירה?" האט מען אים געענטפערט אזוי: "דיין חבר האט זיך קובע געווען צו לערנען יעדן טאג תורה, ער האט זיך פארגענומען חק ולא יעבור אז ער גייט לערנען יעדן טאג, אבער דו לערנסט גארנישט, דערפאר געבט מען פאר דיין חבר געלט אפילו ער האט געטון אן עבירה, ווייל 'מעות' איז די ראשי תיבות ו'אין ע'בירה מ'כבה ת'ורה (סוטה כא.), עבירה לעשט נישט אויס די תורה", קוק נאך די מעשה דארט.

דער אייבערשטער זאל העלפן מיר זאלן זוכה זיין צו (פסחים קטז:): "וְנֹאכַל שָׁם מִן הַזְּבָחִים וּמִן הַפְּסָחִים"; און צו (מיכה ז, טו): "כִּימֵי צֵאתְךָ מֵאֶרֶץ מִצְרָיִם אַרְאֶנּוּ נִפְלָאוֹת", אמן.

בעזרת ה' יתברך - יום ג' פרשת וארא, כ"א טבת, שנת תשפ"ה לפרט קטן

לכבוד מיין טייערער ... נרו יאיר

א שאד אז דו קומסט מער נישט אין ישיבה; דאס ביסל וואס מען קען זיצן אין ישיבה, ביז די חתונה, קען מען זיך אנזאפן אזויפיל חכמת החיים, אזויפיל עצות און חיזוק פארן לעבן.

קום צוריק, איך ווארט אויף דיר, איך וויל דיר אנטראגן א גוטע שידוך, דיינע טייערע עלטערן ווילן דיך שוין א חתן מאכן, א שאד דאס ביסל צייט וואס דו קענסט נאך הערן די שיינע דיבורים פון רבי'ן – זאלסטו דאס פארפאסן.

איך האף דו ביסט שטארק אין לערנען יעדן טאג א בלאט גמרא. מיר האבן דאך געמאכט א געשעפט, אז דו וועסט יעדן טאג לערנען דעם בלאט גמרא און דו וועסט קומען צום סיום הש"ס מיט א ווייב און א קינד; איך האף דו ביסט שטארק אין דעם.

אויך זאלסטו נישט מוותר זיין אויף דאווענען די דריי תפילות מיט מנין דוקא.

בעזרת ה' יתברך - יום ה' פרשת וישב, י"ח כסליו, שנת תשפ"ה לפרט קטן

לכבוד ... נרו יאיר

היינט איז די יארצייט פון הייליגן רבי ברוכ'ל פון מעזיבוז זכותו יגן עלינו; ער איז געווען דעם רבינ'ס פעטער, און ביי די ברית ווען מען האט א נאמען געגעבן דעם רבי'ן 'נחמן' האט רבי ברוכ'ל זיך אנגערופן און געזאגט: "'נחמן' על שם (בראשית ה, כט) 'זה ינחמנו ממעשנו ומעצבון ידינו מן האדמה אשר אררה ה', און די הייליגע חכמים זאגן אויף דעם פסוק (סנהדרין קיג:) 'צדיק בא לעולם, טובה באה לעולם'"; דער רבי איז דאס גוטס פון די וועלט, אשרינו מה טוב חלקינו אז מיר זענען מקורב צום רבי'ן, דער רבי טרייסט אונז, דער רבי ווייזט אונז אז מיר האבן נאך א וועג צוריק צו קומען צום אייבערשטן, ממש וואס דער פסוק זאגט, "זה י'נחמנ'ו", דער רבי טרייסט אונז.

דער צדיק רבי ברוכ'ל זכותו יגן עלינו איז געווען ביים רבינ'ס ברית, און פיגא עליה השלום, דעם רבינ'ס מאמע האט געבעטן איר ברודער דער הייליגער צדיק רבי ר' ברוכ'ל: "ברוכ'ל - אזוי האט זי אים גערופן - וואונטש אן פארן קינד אז מען זאל נישט קריגן אויף אים", האט דער הייליגער צדיק רבי ברוכ'ל איר געענטפערט: "פייגעלע דאס קען נישט זיין, עס איז פארפאלן, מען מוז קריגן אויף אים (קוקט נאך אין ספר פעולת הצדיק, אות כא), ווייל דער צדיק וואס האט די כוחות צוריק צו ברענגען אידישע קינדער צום אייבערשטן - אויף אים מוז זיין מחלוקת, ווייל נאר אזוי איז עס מיט אן אמת, אזוי ווי די הלכה איז, מען וועט נישט מקבל זיין קיין גרים בימות המשיח, ווייל ווען עס איז שלחן מלכים איז די גירות נישט מיט ליבשאפט צום אייבערשטן, (עיין לקוטי מוהר"ן חלק א, סימן רכח).

מען הויבט היינט אן מסכת סנהדרין. זיי נישט קיין בטלן, הויב אן די מסכתא, לערן יעדן טאג א בלאט גמרא, אפילו אן פארשטיין, זאג די ווערטער. דאס איז ברסלב'ע חסידות, לערנען און דאווענען, אלעס אנדערש איז דמיונות. דער רבי שרייבט פאר זיין איידעם (מכתבי רבינו ז"ל, בריש ספר עלים לתרופה): "בַּקָּשָׁתִי מֵאֲהוּבִי חֲתָנִי, שֶׁתִּלְמוֹד בְּכָל יוֹם שִׁיעוּר גְמָרָא וּפוֹסֵק, שֶׁלֹא תַּעֲשֶׂה חַס וְשָׁלוֹם מִטָּפֵל עִיקָר, רַק אֶת הָאֱלֹקִים יְרֵא וְכוּ', כִּי זֶה כָּל הָאָדָם", מיין ליבער איידעם, איך בעט דיר זייער זאלסט לערנען יעדן טאג גמרא און שולחן ערוך, זאלסט חס ושלום נישט מאכן פונעם טפל אן עיקר און פון עיקר א טפל.

היינט וועט נישט זיין די וועכנטליכע ליל שישי שיעור, מיין טאטע שליט"א מאכט חתונה די יונגסטע קינד.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת ויחי, ח' טבת, שנת תשפ"ה לפרט קטן

לכבוד ... נרו יאיר

אז דיין ווייב איז צעקלאפט וכו', זי וויינט וכו' - זאלסטו איר נישט מער צעקלאפן, נאר בוי איר אויף. דאס וואס דו זאגסט דיין ווייב איז א גולם, די גמרא זאגט שוין דאס; חכמינו זכרונם לברכה זאגן, אין די היינטיגע בלאט, (סנהדרין כב:): "אשה גולם היא", און זי איז "כורת ברית", זי ווערט איינס - "אלא למי שעשאה כלי", נאר מיט דעם מאן וואס מאכט איר פאר א כלי; ווייסט די פשט וואס מוהרא"ש זאגט, ווער עס בויט אויף די ווייב און מאכט איר פאר א כלי, פון א שברי כלי מאכט ער איר פאר א גאנצע זאך, ער רימט איר כסדר אז זי איז אזוי חשוב און אזוי גוט - נאר צו אים איז זי כורת ברית, זי ווערט איינס מיט אים.

מארגן נאכט איז די יארצייט פון אונזער הייליגער רבי ר' נתן; רבי נתן האט געזאגט: "אויף שלום בית, אויף דברים שבינו לבינה - וואלט איך געדארפט שרייבן נאך א גאנצע סעט ליקוטי הלכות"; די סוד איז אויפבויען, אויסהערן, ווייזן אינטערעס; אז מען זיצט מיט די טעלעפאן און מיט איין אויער הערט מען איר רעדן, און מיט די אנדערע אויער הערט מען די וויצן פון די סטעטוס וכדומה - איז נישט גוט, מען ווערט נישט איינס.

לערן יעדן טאג דעם בלאט גמרא. מוהרא"ש ברענגט פון דעם גרויסן גאון רבי שעפטיל זכר צדיק לברכה, דער זון פונעם של"ה הקדוש זכותו יגן עלינו, וואס ער שרייבט אין זיין צוואה (בסוף ספר יש נוחלין), "לערנען א בלאט גמרא יעדן טאג דארף זיין א חיוב פארן מענטש אזוי ווי אנטון תפילין יעדן טאג".

מארגן נאכט וועט זיין א יארצייט סעודה, איך וויל דיך פערזענליך לאדענען. אויך וועט דאס זיין אינאיינעם מיט א מסיבה פאר די ארץ ישראל'דיגע מוסדות, די מוסדות אין ארץ ישראל איז מיר זייער חשוב, און איך וועל זיך זייער פרייען אז דו וועסט קומען מיט האלטן און מחזק זיין די הייליגע מוסדות בארץ הקודש.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - ערב שבת פרשת מקץ, כ"ו כסליו, ב' דחנוכה, שנת תשפ"ה לפרט קטן

לכבוד מיין טייערער ... נרו יאיר, לעיקוואד

לערן יעדן טאג א בלאט גמרא, אז דו קענסט לערנען דעם דף וואס מיר אלע לערנען – מה טוב ומה נעים, אז נישט – לערן אויף דיין סדר; אבער זע עס זאל נישט אריבערגיין דעם טאג אן לערנען א בלאט גמרא.

דער צדיק וקדוש רבי שלמה'קע מזוויל זכותו יגן עלינו האט געזאגט: "ווער עס לערנט נישט גמרא, יענעם טאג האט ער א פנים ווי א בהמה"; ער פלעגט זאגן: "אוי... איך האב מורא פון א בהמה..." ווען ער פלעגט זען איינער וואס לערנט נישט, ער פלעגט ברומען: "אוי... איך ציטער פון די בהמה..."

דאס לעבן איז גאר אנדערש ווען מען לערנט גמרא, עס ווערט זיס און צוקער.

בעזרת ה' יתברך - יום ה' פרשת מקץ, כ"ה כסליו, א' דחנוכה, שנת תשפ"ה לפרט קטן

לכבוד מיין טייערער ... נרו יאיר

מזל טוב פאר דיין חתונה, דער אייבערשטער זאל העלפן זאלסט אויפשטעלן ערליכע אידישע דורות, די שכינה הקדושה זאל רוען ביי ענק אין שטוב.

זיי נישט מוותר אויף לערנען גמרא, לערן יעדן טאג גמרא, גיי צו א שיעור גמרא; ווייל נאר אז מען לערנט תורה – לעבט מען א גוט לעבן.

אויך זאלסטו אויסלויבן דיין ווייב פאר די הייליגע זאך וואס זי האט געטון, זיך אפגעשוירן איר האר נאך די חתונה; בזכות די הייליגע זאך זאלן ענק זוכה זיין צו אלע ברכות.

בעזרת ה' יתברך - יום ה' פרשת וישלח, י"א כסליו, שנת תשפ"ה לפרט קטן

לכבוד ... נרו יאיר

בעט דעם אייבערשטן מען זאל דיך נישט אוועק שלעפן פון הייליגן רבי'ן, מען דארף אסאך בעטן אויף דעם, דער סמ"ך מ"ם לאקערט אויף יעדן מקורב אים אוועק צו שלעפן פון צדיק; איינעם שלעפט ער אוועק מיט ליצנות, א צווייטן מיט חלישות הדעת; אזוי פרובירט מען מיט אלע וועגן אוועק צו שלעפן.

מען דארף רחמי שמים צו בלייבן ביים צדיק. מוהרא"ש דערציילט, דער רבי האט געהאט א תלמיד ר' ליפא, א גרויסער סוחר. אמאל איז ער געפארן צום יריד מאכן געשעפטן, ער האט געטראכט אז ער וועט קודם גיין צום רבי'ן נעמען א ברכה, ער איז געפארן צום רבי'ן אויף שבת. ביי שלש סעודות האט ער געווארט אז דער רבי זאל שוין ענדיגן די תורה, ער זאל קענען פארן צום יריד פארדינען געלט. דער הייליגער רבי האט דאך אלעס געזען, האט ער מרמז געווען ביי די תורה וואס שטייט אין זוהר (תיקוני זוהר תיקון ג' מהתיקונים האחרונים): "חֲיֵיכִת בְּהוֹן בְּעוּתְרָא בְּהַאי עָלְמָא, וּלְּבָתַר, קְטִילַת בְּהוֹן", געלט לאכט צום מענטש אין די יונגע יארן, און שפעטער הרג'עט עס דעם מענטש; דער רבי האט געוואלט מיט דעם מרמז זיין פאר ר' ליפא אז נישט אלעס איז געלט וכו', ר' ליפא האט זיך באליידיגט פון דעם, ער איז אוועק געגאנגען פון רבי'ן און מער נישט געקומען.

יארן שפעטער האט אים רבי נתן געטראפן, ער האט אים געפרעגט: "ליפא, וואו ביסטו אנטלאפן, פארוואס ביסטו אוועק פון הייליגן רבי'ן? עמנו הייתם!" האט אים ר' ליפא געזאגט: "דער רבי האט מיך פארשעמט", מיינענדיג די תורה וואס דער רבי האט דעמאלט געזאגט און אים מרמז געווען אין די תורה, זאגט אים רבי נתן: "ליפא! פון אזא רבי גייט מען אוועק?! זאל דער רבי נעמען א דראנג (א דיקע האלץ) און מיך שלאגן - וועל איך אויך נישט אוועק גיין", ווייל ווען מען מאכט זיך א חשבון, מען איז זיך מתבודד - קומט אויס אז 'פון אזא רבי וועל איך קיינמאל נישט אוועק גיין, אפילו ער וועט מיך שמייסן מיט א דראנג'.

אז מען רעדט צו דיר קעגן דעם צדיק זאלסטו טון וואס דער שני למלכות האט געטון, ער האט געוויינט זייער שטארק און געבעטן דעם אייבערשטן זאל אים העלפן טרעפן די גאלדענע בארג מיט די פערלנעם שלאס. מוהרא"ש זאגט (נהרי אפרסמון), דאס איז די עצה ווען מען האט בלבולים און חלישות הדעת, מען זאל שרייען: "רבונו של עולם דא האב איך א צדיק וואס האט מיר געגעבן אזויפיל גוטס, זיך מוסר נפש געווען פאר מיר, פאר מיין שטוב, מיר אויסגעלערנט א וועג צו לעבן מיט דיר, זיין נאנט צו דיר, א וועג צו לערנען די הייליגע תורה, א וועג ווי צו לעבן מאן און ווייב בשלום, א צדיק וואס בלאזט אריין אין מיר א חיות, און דא בין איך אזוי צעמישט ווייל מען רעדט צו מיר ליצנות און איך האב חלישות הדעת וכו' וכו', אנא השם ראטעווע מיך איך זאל בלייבן ביים הייליגן רבי'ן מיין גאנץ לעבן".

קומענדיגע וואך ענדיגן מיר מסכת בבא בתרא, און מיר הויבן אן מסכת סנהדרין, וויל איך דיר בעטן זאלסט אויך אנהויבן לערנען יעדן טאג א בלאט גמרא. אז מען לערנט א בלאט גמרא ווערט מען ארום גענומען מיט די שכינה הקדושה, מוהרא"ש זאגט, גמרא איז די ראשי תיבות פון די פיר מלאכים ג'בריאל, מ'יכאל, ר'פאל און א'וריאל; ווען מען לערנט גמרא ציט מען צו זיך די פיר מלאכים, מען האט א שמירה עליונה (ספר החיים לאחי מהר"ל, ספר זכיות, פרק ב).

דער אייבערשטער זאל העלפן זאלסט האבן הצלחה אין אלע ענינים.