בעזרת ה' יתברך
יום ג' פרשת עקב, י"ח מנחם-אב, שנת תשפ"א לפרט קטן
לכבוד מיין טייערער ... נרו יאיר, קרית ברסלב
איך האב זייער הנאה צו זיין זומער דא אין שטעטל, איך האב זייער הנאה צו זען ווי דו דאווענסט און לערנסט, ממש א מחי' דאס צו זען, אינגעלייט וואס ארבעטן ביטער שווער כאפן זיך אריין יעדן טאג אין בית המדרש דאווענען און לערנען, דאס געבט מיר צו געזונט און פרישע כחות.
איך זע דו שלעפסט זיך אראפ דאווענען ביי מיר די שבת'דיגע תפילות אן דיינע קינדער, וויל איך דיר אויפמערקזאם מאכן, ענדערש זאלסטו דאווענען נעבן דיין שטוב מיט דיינע קינדער ווי איידער קומען צו מיר דאווענען אן די קינדער.
מען מוז נעמען די קינדער שבת אין שול דאווענען, מען מוז זיי מחנך זיין צו דאווענען; א גאנצע וואך דאווענען זיי אין חדר די וואכעדיגע דאווענען, די שבת'דיגע דאווענען דארף דער טאטע אויסלערנען, אז מען לאזט זיי שבת בלייבן אין שטוב זיך שפילן וועלן זיי נישט קומען אין שול ווען זיי וועלן ווערן עלטער.
דעריבער וויל איך דיר מחזק זיין זאלסט נעמען דיינע קינדער מיט דיר; ענדערש דאווען נעבן דיין שטוב מיט דיינע קינדער ווי איידער קומען צו די ווייטע שול אליין. האלט זיי נעבן דיר א גאנצן דאווענען, נעם מיט דיר קענדיס, נאש וכדומה, און ווען זיי זאגן שיין "אמן", "ברוך הוא וברוך שמו", "נקדישך", "קדוש", "כתר", וכדומה – זאלסטו זיי געבן נאך א צוקערל און נאך א צוקערל, אזוי וועלן זיי זיך צוביסליך אויסלערנען דאווענען, זיי וועל באקומען א געשמאק אינעם דאווענען.
געדענק, די גרעסטע זאך איז חינוך הבנים והבנות; גרעסער פון די גרעסטע עבודה.
איך שרייב דיר דאס נאר ווייל איך האב דיר ליב, איך וויל דיין טובה.