בעזרת ה' יתברך
יום ג' פרשת שלח, כ"ב סיון, שנת תשפ"ב לפרט קטן
לכבוד מיין ליבער ... נרו יאיר
איך האף דו טאנצט יעדן טאג א טענצל אז דו ביסט עוסק אין אזא הייליגע ארבעט, דו ביסט מחי' אידישע קינדער בכל קצוי תבל, איך בין מקנא דיינע זכותים. איך ווייס נישט וויפיל מענטשן זענען זוכה צו וואס דו ביסט זוכה, דו ביסט מגלה ומפרסם דעם אייבערשטן מיט אזא שטארקייט, די קונטרסים וואס דו דרוקסט איז מחי' יעדן איינעם, יונג און אלט; מענטשן באקומען פון דעם לופט צו אטעמען, וואויל איז דיר און וואויל איז דיין חלק.
דא שיק איך דיר א מעשה פאר די "עצתו אמונה פאר קינדער", די מעשה הייסט "אה מחי' קאפל, אה מחי' איך האב א קאפל".
מאך א בילד ווי פרוי נייט א קאפל; בעט דעם מעלער ער זאל ארויסגיין פון זיין קטנות הדעת, ער מאלט אזוי קליין; ווייז אים די בילדער פון די "דערציילונגען פון צדיקים", שיינע גרויסע פנימ'ער, שיינע גרויסע לופטיגע בילדער; הלואי זאל ער קענען מאכן אזעלכע שיינע בא'טעמ'טע בילדער.
בעט אים א בילד פאר די מעשה, ווי א פרוי אנגעטון מיט א טיכל (געבינדן אזוי ווי מען גייט ביי אונז) - שטריקט א קאפל; אין יעדע האנט האלט זי א גרויסע נאדל, מיט א פעקל שטריק און זי מאכט א שיינע גרויסע קאפל, אין די זייט זאל מען זען א וויגעלע וואו עס ליגט א קינד אנגעטון מיט א קאפל.
טייערע קינדער, ווער ווייסט ווי אזוי די מאמע פון רבי'ן האט געהייסן?
פייגא! פייגא איז געווען א טאכטער פון די גרויסע צדקת אדל, דעם הייליגן בעל שם טוב'ס טאכטער.
פייגא איז געווען זייער א גרויסע צדקת, זי האט געוואלט אירע קינדער זאלן מורא האבן פונעם אייבערשטן און לעבן מיט'ן באשעפער, זיי זאלן האבן יראת שמים, דערפאר האט זי געשטריקט א קאפל פאר איר קינד נאך איידער ער איז געבוירן געווארן, ווייל זי האט געוואלט גלייך ווען איר קינד וועט געבוירן ווערן - אים קענען אנטון א קאפל, ווייל א קאפל ברענגט יראת שמים.
א לאנגע צייט האט פייגא געשטריקט א שיינע קאפל; זי פלעגט בעטן דעם אייבערשטן אז דער קינד וואס גייט געבוירן ווערן זאל אויסוואקסן א גרויסער צדיק, און ווען דער קינד איז געבוירן געווארן האט זי אים גלייך אנגעטון מיט די שיינע קאפעלע, און דאס קינד איז אויסגעוואקסן דער הייליגער רבי.
דערפאר ווען מיר בעטן דעם אייבערשטן בזכות דעם רבי'ן - דערמאנען מיר דאס מיט זיין מאמע'ס נאמען, מיר זאגן "בזכות רבינו נחמן בן פיגא", באשעפער העלף אונז בזכות דעם צדיק רבינו נחמן א זון פון פיגא; ווייל זי האט אריינגעלייגט אין אים יראת שמים ביז ער איז געווארן א גרויסער צדיק.
טייערע קינדער, ווען מען שפילט זיך, מען לויפט, מען שפרינגט און מען טאנצט - אסאך מאל פאלט אראפ די קאפל פון קאפ; וואס טוט אן ערליכער אינגל? מען שטעלט זיך גלייך אפ, מען גייט נישט ווייטער שפילן - ביז מען טוט אן די קאפל, און אז די קאפל פליט אוועק - דעקט מען זיך צו דעם קאפ מיט די העמד; א איד טאר נישט גיין מיט א בלויזע קאפ אפילו פאר איין סעקונדע.
לאמיר אינאיינעם זינגען: "אה מחי' קאפל! אה מחי' איך האב א קאפל! שכוח באשעפער אז איך גיי מיט א קאפל, העלף מיר איך זאל אייביג גיין מיט די קאפל, נישט פארגעסן אנצוטון די קאפל און זיך אייביג פרייען מיט די קאפל!"
דער אייבערשטער זאל העלפן זאלסט האבן הצלחה אין אלע ענינים.