בעזרת ה' יתברך
יום ד' פרשת פנחס, ט"ז תמוז, שנת תש"פ לפרט קטן
מרת ... תחי'.
איך האב ערהאלטן אייער בריוו.
כיבוד אב ואם איז זייער הארב; א שאד מען לערנט נישט מיט קינדער איבער די הארבקייט פון כיבוד אב ואם, אז זיי זאלן זיין געווארנט צו מכבד זיין טאטע און מאמע.
מענטשן זענען זייער צעמישט, מען ווייסט נישט וואס איז יא כיבוד אב ואם און וואס איז נישט כיבוד אב ואם; פון איין זייט דארף מען זיי מכבד זיין, רעדן שיין און חס ושלום נישט ענטפערן מיט חוצפה. זאל זיין וואס זאל זיין, אפילו די עלטערן זענען נישט געזונט און נישט נארמאל - דארף מען רעדן צו זיי מיט דרך ארץ, אבער פון די אנדערע זייט דארף מען נישט און מען טאר נישט לאזן אז נישט געזונטע עלטערן זאלן צעברעכן די שטוב.
איר זאלט רופן אייער מאמע, רעדן שיין צו איר און איר דערציילן פון די אייניקלעך; אויך זאלט איר זארגן פאר איר זי זאל האבן עסן און אלע לעבנס געברויכן.
אפילו זי האט אייך וויי געטון אין אייערע יונגע יארן, און איך פארשטיי אז די ווייטאג איז זייער גרויס ווען מען דערמאנט זיך וואס מען איז אריבער; די בזיונות און דרוק וכו' - מיט דעם אלעם דארפט איר וויסן אז דער אייבערשטער פירט די וועלט און דאס וואס איז אריבער אויף אייך איז נאר געווען לטובה, אז איר זאלט היינט שטיין דארט וואו איר שטייט.
אז איר וועט גוט קוקן וועט איר זען אז דיקא די אלע איבערגייעכצער - דאס האט געברענגט דערצו אז איר זאלט וויסן פון הייליגן רבי'ן; ווען איר וואלט ווען נישט אריבער אלע אייערע שוועריקייטן וואלט איר נישט גענומען דעם רבי'ן פאר אייער לעבן, קומט אויס אז נאר ווייל עס איז אריבער אויף אייך א שווערע לעבן האט דאס אייך געברענגט צום גן עדן, דארפט איר נאר דאנקען דעם אייבערשטן אויף אלעס ביז אהער.
דער אייבערשטער זאל העלפן איר זאלט האבן הצלחה אין אלע ענינים.