בעזרת ה' יתברך - יום ב' פרשת אמור, י' אייר, שנת תשפ"ו לפרט קטן
לכבוד ... נרו יאיר, וזוגתו שיחיו
מזל טוב פאר די אפשערן און מאכן פיאות פאר ענקער בכור, דער אייבערשטער זאל העלפן ענק זאלן זוכה זיין צו אידיש נחת, ערליכע דורות אינאיינעם.
האסט מיר געבעטן איך זאל דיר שרייבן די מנהגים וואס מען פירט זיך ביי אונז ביים אפשערן די האר און מאכן די הייליגע פיאות; ווען מען שערט אפ א קינד, מען מאכט אים די הייליגע פיאות - דארפן די עלטערן די ערשטע זאך דאנקען דעם אייבערשטן אז מען איז זוכה צו דעם, מען האלט שוין דא; וויפיל אידישע קינדער ווארטן אויף שידוכים, מען קען זיך נישט פארשטעלן די צער וואס בחורים און מיידלעך גייען אריבער, און נאכדעם וואס מען האט שוין חתונה; וויפיל אידישע קינדער ווארטן אויף קינדער, אזויפיל אידישע קינדער דארפן ישועות; און אז מען האלט שוין דא, מען פירט א קינד אין חדר לעקן די האניג וואס דער מלמד שמירט אן אויף די הייליגע א"ב - דארפן די עלטערן דאנקען דעם אייבערשטן, ארויס זאגן מיטן מויל: "שכוח אייבערשטער אז מיר זענען זוכה צו קענען פירן אונזער קינד צום מלמד זאגן די הייליגע א"ב", און די עלטערן דארפן געבן צדקה און אויך געבן דעם קינד זאל געבן צדקה, און בעטן: "הייליגער באשעפער העלף אונזער קינד זאל זיין גאנץ לעבן זיך פרייען מיט די פיאות, ער זאל קיינמאל נישט שניידן בארד און פיאות, ער זאל בלייבן ערליך און הייליג".
דאס זענען מער ווייניגער אונזערע מנהגים, עס זענען דא וואס פירן זיך צו מאכן א סעודה פאר די משפחה, עס זענען דא וואס מאכן נאר א לחיים; דאס האט שוין יעדע משפחה מיט זייער וועג, דער עיקר האב איך דיר געשריבן - דאנק און לויב דעם אייבערשטן און געב צדקה מיט בכיות נוראות אז דיין קינד זאל בלייבן מיט די פיאות, קיינמאל נישט שניידן די בארד און פיאות.
דער אייבערשטער זאל העלפן זאלסט האבן הצלחה אין אלע ענינים.