בעזרת ה' יתברך
יום ה' פרשת וארא, כ"ו טבת, שנת תשפ"ב לפרט קטן
טייערער ... נרו יאיר
איך שיק דיר נאך א מעשה פאר די קינדער, צעטייל די מעשה פאר צוויי וואכן; די מעשה פון רבי'ן מיט'ן אראבער.
ראטעוועט!!!!
ער האט א מעסער!!!!!!
עס איז אנגעקומען אן אראבער, ער שרייט: "אאאאללללאא הואאאאאקבבאאאאררר!!!"
קיינער פארשטייט נישט וואס ער זאגט, קיינער ווייסט נישט וואס ער רעדט, ער שטייט מיט א כעס, ער פאכעט מיט זיין שווערד, ער וויל נאר רעדן צום רבי'ן.
טייערע קינדער, די מעשה האט פאסירט ווען דער רבי איז געווען אין ארץ ישראל, דער רבי איז אנגעקומען אין די שטאט חיפה, דעמאלט האט פאסירט די מעשה. עס איז געקומען א יונגער אראבער רעדן מיט'ן רבי'ן, דער רבי האט נישט פארשטאנען וואס ער רעדט, דער אראבער איז געקומען יעדן טאג, סיי אינדערפרי און סיי ביינאכט, יעדע סעודה וואס דער רבי איז געזעצן מיט די געסט איז דער אראבער געקומען, ער האט זייער ליב געהאט דעם רבי'ן.
ביז איינמאל קומט ער אריין זייער אויפגערעגט מיט א מעסער, ער האט זיך גענומען שרייען שרעקליכע קולות, דער רבי האט נישט געוויסט וואס ער וויל; דארט איז געווען א פרוי פון די שטאט וואלחיי, ווען דער אראבער איז אוועקגעגאנגען האט זי געזאגט פאר'ן רבי'ן: "למען השם זאלט איר אוועקלויפן, דער אראבער שרייט אז ער וויל מאכן א מלחמה מיט אייך, אנטלויפט...!"
דער רבי איז גלייך אנטלאפן צום שטוב פון רבי זאב וואלף מטשערני-אוסטראה; דער צדיק האט דעמאלט געוואוינט אין חיפה, דער רבי האט זיך באהאלטן ביי אים אין שטוב, אזוי איז דער רבי געראטעוועט געווארן.
קינדער איר ווייסט וואס דער אראבער האט געוואלט? און ווער ער איז געווען?
דער אראבער איז געווען דער סמ"ך מ"ם, ער האט זיך פארשטעלט ווי אן אראבער, ער האט געוואלט הרג'ענען דעם רבי'ן, ווייל ער האט זייער פיינט דעם רבי'ן. דער רבי האט דערציילט, דער סמ"ך מ"ם האט געזאגט פאר'ן אייבערשטן: "אויב דער רבי'ס נשמה קומט אראפ אויף די וועלט, פארוואס האסטו מיך באשאפן? מיין זאך איז אוועקנעמען מענטשן פונעם אייבערשטן, און דער רבי - ער האט א כח צוריק צו ברענגען יעדן איינעם צום אייבערשטן"; דער רבי ווייזט אונז די רחמנות פונעם אייבערשטן, מיר זאלן תשובה טון.
די קומענדיגע וואך:
טייערע קינדער, מיר האלטן אינמיטן דערציילן, ווען דער רבי איז געווען אין ארץ ישראל אין חיפה און דער אראבער איז געקומען מלחמה האלטן מיט'ן רבי'ן, דער רבי האט זיך באהאלטן; לאמיר דערציילן נאך פון די מעשה.
אוי וויי! דער אראבער איז שוין ווייטער דא! ער זוכט דעם רבי'ן, ער פרעגט: "וואו איז דער רבי?!" ער לאכט און ער זאגט: "איך האב זייער ליב דעם מענטש (דעם רבי'ן), איך וויל אים אוועק געבן מיינע אייזלען, אויך געב איך אים אוועק מיין פערד, ער זאל קענען גיין קיין טברי', ער דארף נישט מורא האבן פון מיר".
אזוי איז טאקע געווען, ווען דער רבי איז צוריק געקומען צו זיין אכסניא איז דער אראבער געקומען און זיך אראפגעזעצט, און ער האט געלאכט און געלאכט צום רבי'ן.
די גאנצע מעשה מיט'ן אראבער אין חיפה איז זייער אן אינטערעסאנטע געשיכטע; וואס האט דער אראבער געוואלט פון רבי'ן...? אין אנהייב האט ער געוואלט מלחמה האלטן מיט'ן רבי'ן, שפעטער האט ער ליב געהאט דעם רבי'ן; מיר ווייסן נישט די סודות פון דעם.
דער רבי האט געזאגט: "איך האב געהאט מער יסורים פון די ליבשאפט פונעם אראבער ווי פון די פיינטשאפט פונעם אראבער".
קינדער, מיר נעמען ארויס פון די מעשה זייער אכטונג צו געבן פון שלעכטע מענטשן; ווען זיי קומען מיט א שמייכל, זיי ווילן זיין א חבר, זיי געבן מתנות, זיי לאכן - זאל מען זיך זייער היטן פון זיי! עס איז מער סכנה ווען דער שלעכטער מענטש מאכט זיך ווי א חבר, ווי ווען א מענטש קומט זיך קריגן, מען דארף אוועקלויפן פון שלעכטע מענטשן וואס ווילן טון עבירות.
(די עלטערן קענען דא אביסל שמועסן מיט די קינדער, זיי זאגן: "אויב איינער וויל דיך קיצלען אונטער דיינע קליידער אדער אויף די קליידער אויף פריוואטע פלעצער, יענער מאכט זיך פאר א חבר, ער זאגט דיר ער האט דיך ליב - זאלסטו געדענקען די מעשה פונעם הייליגן רבי'ן, פונעם אראבער וואס האט זיך אויך געמאכט ווי ער האט ליב דעם רבי'ן").
דער אייבערשטער זאל העלפן זאלסט האבן הצלחה אין אלע ענינים .