בעזרת ה' יתברך - יום ג' פרשת פקודי, כ"ה אדר, שנת תשפ"ה לפרט קטן
לכבוד מיין ליבער ... נרו יאיר, מנהל תלמוד תורה היכל הקודש קרית ברסלב
איך האב ערהאלטן דיין בריוו.
דו וועסט זיך מוזן שטארקן מיט אלע דיינע כוחות ווייטער ממשיך זיין מיט דיין הייליגע ארבעט פון מחנך זיין אונזערע קינדער שלא על מנת לקבל פרס, נישט צו ווערן באצאלט און באלויבט, אלא על מנת להסקל באבנים, נאר מיטן ציל אפילו מען וועט דיך באווארפן מיט שטיינער, וועסטו ווייטער האבן סבלנות פאר די יונגע שעפעלעך, זיי אויפציען מיט רחמנות און מיט אסאך געדולד.
איך ווייס אז דער יצר הרע פארלייגט זיך זייער אויף דיר, ער וויל דיך צעברעכן, ווייל ווער עס טוט מיטן כלל גייט אריבער אויף אים שווערע ביטערע נסיונות, מען שפירט ביי זיך ווי מען איז א דורכפאל, מען שפירט ביי זיך ווי מען טוט נישט די ארבעט, און נאכדעם קומט נאך צו די טענות פון אלע וועם מען העלפט; דארף מען האבן אסאך סבלנות, מען דארף דאס אלעס נעמען פאר א תיקון, און זיך שטארקן מיט אלע כוחות און ווייטער טון די הייליגע ארבעט.
עס איז דא א סוד וואס מען קען טון ווען מען שפירט ווי מען האט נישט מער כח וכו', מען קען גיין א שפאציר אין א ליידיגע גאס און וויינען צום אייבערשטן, בעטן דעם אייבערשטן פאר כח און צו זען דאס שיינקייט פון יעדן איד.
דער אייבערשטער זאל העלפן זאלסט האבן הצלחה אין אלע ענינים.