בעזרת ה' יתברך - יום ה' פרשת נח, ד' מר-חשון, שנת תשפ"ד לפרט קטן
מרת ... תחי'
איך האב ערהאלטן אייער בריוו.
איך זאג נישט אייער מאן איז גערעכט מיט דעם וואס ער קומט נישט אהיים ביינאכט, מיטן טרינקען אלקאהאל און מיט נעמען פון די שעדליכע דראגס, אבער מען דארף אריינקוקן 'פארוואס טוט ער דאס?'
ער איז א טייער קינד, א גאלדענער מענטש; איך האב גערעדט מיט אים, ער זאגט אז די אלע יארן וואס ער לעבט מיט אייך פון די חתונה – האט איר אים אויפגעגעסן די קישקעס. ער זאגט זיין מח איז אויסגעברענט, איר פירט זיך צו אים ווי א מאמע צו א קינד, עס איז אים אזוי נמאס דאס לעבן, ער וויל זיך פשוט הרג'ענען, דעריבער לויפט ער צו עבירות, ער לויפט טרינקען און נעמט דראגס, אלעס נאר ווייל איר שאפט אויף אים ווי א האר שאפט אויף א קנעכט.
נאכאמאל, איך געב אים נישט גערעכט, אבער א אידישע פרוי טאר נישט שאפן אויפן מאן, א אידישע פרוי מיט אביסל שכל ווייסט דעם סוד ווי אזוי מען קען האבן א לעבן פון גן עדן; זי הייבט אויף איר מאן, זי שעצט אים, זי איז נישט פארנומען מיט זיין רוחניות, מיט זיין אידישקייט, און בכלל ווי אזוי מען רעדט, די באנעמונג (עדיטוד).
א שאד אז מען לערנט נישט אין די סקולס די נושא, מען לערנט מיט די קינדער הבל הבלים, זאכן וואס האט גארנישט מיט די לעבן. מען וואלט ווען געדארפט רעדן דרשות אויף דרשות פאר די קינדער פון יונגערהייט ווי אזוי מען רעדט צו א מאן, ווי אזוי מען רעדט צו עלטערן, ווי אזוי רעדט מען אפילו מיט א חברט'ע, נישט רעדן מיט זלזול, נישט גרינגשעצן אין א צווייטן, אוועק מאכן, מאכן יענעם שפירן ווי מיסט - וואלט מען געקענט איינשפארן אזויפיל פראבלעמען, עס וואלט נישט געווען קיין גיטין.
איר וועט פרעגן 'וואס קען מען יעצט טון?' מען קען נאך יעצט ראטעווען, עס ווענדט זיך נאר אין אייך; איך ווייס פעלער פון קלוגע פרויען, ברסלב'ער פרויען וואס זיי זענען אריבער שווערע צייטן, דער מאן האט געהאט שווערע טעג אין אידישקייט, זיי זענען געבליבן פאר זיך שטארק אין אידישקייט, אבער פארן מאן זענען זיי געווען אזוי ווייך, מיט אזויפיל חכמה, גארנישט געזאגט, זיך פארמאכט דאס מויל, געביסן די ליפן און שטילערהייט געוויינט, שטילערהייט געבעטן דעם אייבערשטן עס זאל אריינגיין א רוח טהרה אינעם מאן, און ביים סוף האבן זיי מצליח געווען, זיי פירן היינט שיינע משפחות.
מיין הארץ איז אזוי צעריסן, איך בעט פאר ענק די שטוב זאל נישט צעפאלן, עס זאל בלייבן א גאנצע שטוב, און אז איר וועט תשובה טון, איר וועט אנהויבן רעדן צו אייער מאן מיט שעצונג - קען מען עס נאך ראטעווען.
דער אייבערשטער זאל העלפן איר זאלט האבן הצלחה אין אלע ענינים.