בעזרת ה' יתברך - יום א' פרשת תצוה, ה' אדר, שנת תשפ"ו לפרט קטן
... נרו יאיר
פורים אינדערפרי גלייך נאכן דאווענען זאלסטו זען צו מקיים זיין די מצוה פון משלוח מנות איש לרעהו און די מצוה פון מתנות לאביונים.
געב פאר דיינע עלטערן משלוח מנות, פורים איז א גוטע צייט צו מאכן שלום מיטן שיקן א משלוח מנות, שלום מאכן מיט משפחה, שכנים און חברים וואס מען האט זיך אינמיטן יאר פארטשעפעט, עס דארף נישט זיין קיין טייערע זאכן, דער עיקר איז די הארץ, און מיט דעם מעקט מען אויס עמלק. ווייל המן און עמלק ווילן נאר מאכן פירוד לבבות, זיי ווילן נאר מקטרג זיין איינער אויפן צווייטן און מיט דעם וואס מען אנטלויפט פון מחלוקת און מען זוכט ווי מער צו פארמערן שלום און ליבשאפט - איז מען מקיים די מצוה פון אויסמעקן המן עמלק; דעריבער זאלסטו זיך איבערבעטן מיט דיין משפחה, שכנים און חברים, און זיכער מיט דיינע עלטערן. זאלסט זיי ארומנעמען און זיי איבערבעטן, מיט דעם וועסטו פועל'ן דיין ישועה.
ליבער ברידער היינט פורים איז א גוטע צייט זאלסט זיך איבערבעטן מיט דיינע עלטערן, נישטא קיין גרעסערע זאך ווי מכבד זיין עלטערן און מאכן א נחת רוח פאר עלטערן, און אויך ווען עס קומט אן שווער, מען האט עלטערן וואס איז שווער צו זיין מיט זיי וכו' - איז נאך מער חשוב די מצוה, אזוי ווי חכמינו זכרונם לברכה זאגן (אבות ה, כג): "לפום צערא אגרא"; זאלסטו היינט אינעם הייליגן טאג פורים זיך איבערבעטן מיט זיי, גיי ארויף צו זיי, ברענג זיי משלוח מנות און בעט זיך איבער, וועט דער אייבערשטער דיר מוחל זיין און דיר געבן אלע דיינע בקשות.
דער אייבערשטער זאל העלפן זאלסט האבן הצלחה אין אלע ענינים.