בעזרת ה' יתברך - יום ג' פרשת ואתחנן, י"א מנחם-אב, שנת תשפ"ה לפרט קטן
... תחי'
נעמט אייערע טעכטער זיי זאלן אייך העלפן, לערנט זיי אויס העלפן, זיי זאלן אויספאקן די ארדער, צוזאמנעמען די שפילצייג, אויסקערן, אויפוועקיומען, אויפוואשן; סיי איר וועט נישט פאלן פון אייערע כוחות און סיי אייערע טעכטער וועלן אויפוואקסן געזונט, פארשטייט זיך איר זאלט זיי אויסרימען, דערציילן פאר אלעמען ווי שיין זיי העלפן, דערציילן פאר די לערערינס, דערציילן פאר די באבעס, דערציילן פאר אייערע געשוויסטער; קינדער דארפן אסאך גוטע ווערטער, קינדער דארפן אויפמערקזאמקייט, קינדער דארפן ווארעמקייט, און דאס וויכטיגסטע דארפן זיי דיסציפלין, זיי צוגעוואוינען צו העלפן.
איך באוואונדער אייער זכות מיטן נעמען א קינד פון א באקאנטע, א קינד וואס איז נאכנישט צוגעוואוינט צו גיין אין בית הכסא, און עס האט גענומען אסאך כח, און דאך האט איר נישט גערופן די טאטע צו קומען נעמען דאס קינד, איר האט געהאלטן דאס קינד אז די מאמע זאל זיך קענען אפרוען נאכן האבן די קינד; בזכות די מצוה זאלט איר זען נחת ביי אייערע קינדער, ערליכע דורות.