בעזרת ה' יתברך - יום ב' פרשת ויקרא, ח' אדר ב', שנת תשפ"ד לפרט קטן
לכבוד ... נרו יאיר
איך האב ערהאלטן דיין בריוו.
איך פארשטיי נישט די מעשה, דיין שווער און שוויגער קומען דיר עפעס? און אז זיי האבן דיר געזאגט זיי גייען דיך אויסהאלטן און יעצט געבן זיי דיר נישט קיין שקל - זאלסטו צוריק גיין צום אייבערשטן און אים בעטן: "הייליגער באשעפער, איך קען נישט מער, איך שפיר ווי מיין מח פלאצט, איך דערטרונק זיך אין חובות, איך קען עס נישט אדורכטראגן".
צוקריג זיך נישט מיט דיין שווער און שוויגער, עס לוינט נישט די שקלים פאר מחלוקות, אויך קען עס שאדן מאכן דיין שלום בית, דיין ווייב וועט זיין צעריסן צווישן דיר און אירע עלטערן; פון איין זייט זעט זי וואס דא גייט פאר, די בלאף, די שקר, און פון די אנדערע זייט איז דאס אירע עלטערן; זאלסטו גארנישט רעדן מער פון די נושא.
דו גיי נאר צום אייבערשטן, נוסח היכל הקודש, בעט אים נאכאמאל און נאכאמאל. בעט מיט א שמייכל, דער רבי זאגט (ספר המדות אות תפלה, סימן פא): "תְּפִלָּה שֶׁהִיא בְּשִׂמְחָה", ווען מען בעט דעם אייבערשטן מיט א שמייכל, "הִיא עֲרֵבָה וּמְתוּקָה לַשֵּׁם יִתְבָּרַךְ", איז די תפילות זיס און איינגענעם פארן אייבערשטן.
די וועלט זאגט: "מיט א שווער עסט מען קוגל"; פון היינט און ווייטער זאלסטו נישט טון די נארישקייטן פון ארויסנעמען הלואות אויף דיין דירה פאר משפחה, וואס פעלט דיר אויס די צרות, האב שכל.
דער אייבערשטער זאל העלפן זאלסט האבן הצלחה אין אלע ענינים.