בעזרת ה' יתברך - יום ב' פרשת אמור, י' אייר, שנת תשפ"ו לפרט קטן
... נרו יאיר
בנוגע דיין זון וואס וויל גיין מיט קורצע ערמל און ביי ענק אין די משפחה גייט מען מיט לאנגע ערמל, דו פרעגסט וואס איז ריכטיג; פון איין זייט ווילסטו בלייבן מיט די וועג ווי אזוי מען גייט ביי ענק, און פון די אנדערע זייט ווילסטו וויסן וואס צו טון מיט דיין זון, ער קומט אהיים פון חדר מוטשען טאג נאך טאג אז ער וויל גיין ווי די אנדערע קינדער וכו'.
זיי קלוג און בעט דעם מלמד און מנהל און נאך - וואס זעען דיין זון – אז זיי זאלן אים פריוואט געבן א גוט ווארט פאר די וועג ווי אזוי ער גייט; ווייל עס איז נישט די קורצע ערמל אדער לאנגע ערמל, עס איז די מעכטיגקייט וואס די קינדער ווילן זיין, קינדער ווילן נישט זיין בטלנ'יש, און אז אין כיתה איז דא מעכטיגע קידער וואס גייען די סארט וועג - ווילן אלע דאס נאכמאכן; דארף מען זיין קלוג, זיי געבן גוטע ווערטער און זיי אויך מאכן מעכטיג.
דער אייבערשטער זאל העלפן זאלסט האבן הצלחה אין אלע ענינים.