בעזרת ה' יתברך - יום ד' פרשת שמיני, כ"ד אדר ב', שנת תשפ"ד לפרט קטן
לכבוד ... נרו יאיר, קרית ברסלב
געב איבער פאר דיין ווייב אז איך באקום זייער גוטע גריסן אויף איר; די מנהלת זאגט, זי האט א ווייכע הארץ פאר די תלמידות, בפרט פאר די קינדער וואס ווערן באזייטיגט; זי געבט זייער אכטונג אויף זיי, איר הארץ איז מיט זיי.
געב איבער אין שטוב אז איך האב זייער הנאה צו הערן די זאך אז זי זארגט זיך פאר די קינדער; פאר די קינדער וואס פאלן ארויס ביי די שפילערייען, פאר די קינדער וואס בלייבן אינדרויסן ביי די שמועסן וכו' וכו'; ווייל דאס איז די וויכטיגסטע זאך פון א מלמד און טיטשער, אכטונג געבן אויף די קינדער, זיי זאלן אויסוואקסן געזונט בנפש, זיי זאלן נישט אויסוואקסן צעקלאפט און דערנידערט.
ווען דו גייסט צו דיין שווער און שוויגער זאלסטו זיך שטענדיג באדאנקען, און אויך זאלסטו ארויסטראגן די מיסט און זען אויב דו קענסט העלפן; עס איז אזוי שיין ווען די חתונה געהאטע קינדער קומען צו די עלטערן העלפן, נישט נאר צו עסן און צו זיך אנלייגן.
דער אייבערשטער זאל העלפן זאלסט האבן הצלחה אין אלע ענינים.