בעזרת ה' יתברך - יום א' פרשת בהר בחקותי, ט"ז אייר, שנת תשפ"ו לפרט קטן
לכבוד מיין ליבער טייערער ... נרו יאיר, תלמיד ישיבת היכל הקודש ירושלים
דער מגיד שיעור ר' משה שמואל זאגט מיר אז דו לערנסט און דאווענסט אפילו עס קומט דיר אן שווער. איך בין זייער איבערגענומען פון דאס הערן, איך וויל דיך מחזק זיין דו זאלסט ווייטער לערנען און דאווענען און דינען דעם אייבערשטן; קוק נישט אויף אנדערע, און אז דיר נעמט מער צייט צו לערנען איין פרק משניות, עס נעמט דיר אזוי ווי עס נעמט פאר אנדער צו לערנען אכצן פרקים משניות - זאלסט נישט ווערן צעבראכן דערפון, דו דין דעם אייבערשטן אויף דיין וועג, די הייליגע חכמים זאגן (מנחות קי.): "אֶחָד הַמַּרְבֶּה וְאֶחָד הַמַּמְעִיט, וּבִלְבַד שֶׁיְּכַוֵּן אָדָם אֶת דַּעְתּוֹ לַשָּׁמַיִם", דער וואס טוט אסאך און דער וואס טוט ווייניג - זענען ביידע חשוב ביים אייבערשטן; ווייל דער אייבערשטער קוקט אויף די הארץ פונעם מענטש.
אז דו וועסט זיין אין מירון - זאלסטו מתפלל זיין פאר מיר יואל בן רייצא רעכיל, און דו זאלסט נעמען התחזקות; קוק דער הייליגער רבי שמעון צו וואס ער האט זוכה געווען, וואס מיינסטו? רבי שמעון איז אראפגעקומען פון הימל? רבי שמעון איז אויך געווען א קינד, א בחור, עס איז אריבער אויף אים וואס איז אריבער, און נאר ווייל ער האט זיך דערהאלטן האט ער זוכה געווען צו קומען צו וואס ער איז געקומען; און דערפאר ל"ג בעומר זינגט מען: "בר יוחאי נמשחת אשריך שמן ששון מחבירך", אינטערעסאנט איז אז מען זינגט לכבוד רבי שמעון בר יוחאי, מען זינגט 'דער זון פון יוחאי', וואס איז דאס אז מען זינגט 'בר יוחאי' א זון פון יוחאי? נאר ווען מען הערט און מען לערנט פון דאס גרויסקייט פון צדיקים, ווי זיי האבן זוכה געווען צו קומען צו זייערע הויכע מדריגות, איז דא א טעות וואס מענטשן מאכן; אנשטאט מען זאל ווערן אויפגעפלאמט פון די גרויסקייט פון די צדיקים און טראכטן פון אויך אנהייבן דינען דעם אייבערשטן, זוכה זיין צו ווערן א צדיק, אנשטאט אזוי צו טראכטן, זאגט מען: 'מילא די צדיקים, זיי האבן זוכה געווען צו וואס זיי האבן זוכה געווען ווייל זיי זענען מלאכים, זיי זענען נישט קיין מענטשן, דערפאר האבן זיי זוכה געוען צו ווערן אזוי הייליג, אבער מיר וואס מיר זענען פשוט'ע מענטשן - קענען נישט זוכה זיין צו דעם'; דאס איז א גרויסער טעות, און דאס איז די טעם וואס מען זינגט אויף דעם הייליגן תנא רבי שמעון בר יוחאי - 'בר יוחאי' א 'זון פון יוחאי'; אז רבי שמעון בר יוחאי איז געבוירן געווארן ביי עלטערן, ער איז געווען א קינד ביי עלטערן, ער איז נישט געקומען פון הימל, 'בר יוחאי' א קינד פון א טאטע מאמע; און נאר דורכדעם וואס ער האט זיך אויסגעארבעט מיט תורה און תפילה - איז ער אנגעקומען צו וואס ער איז אנגעקומען.
דער הייליגער רבי פלעגט אסאך דערציילן פון זיינע מדריגות צו וואס ער האט זוכה געווען, בפשטות האט דאס דער רבי געטון ווייל דער רבי האט אונז געוואלט אנרייצן מיר זאלן אויך וועלן זוכה זיין צו דינען דעם אייבערשטן, מיר זאלן זיך נישט באגנוגן מיט וואס מיר טון, מיר זאלן אלץ שטרעבן אויף העכערס, און ווען דער רבי פלעגט רעדן פון זיינע מדריגות, האט מען געזאגט פארן רבי'ן אז דאס וואס ער האט זוכה געווען איז צוליב דעם וואס ער איז א יחסן, אן אייניקל פון הייליגן בעל שם טוב זכותו יגן עלינו, און אן איינקל פון די הייליגע צדיקים רבי נחמן הורודענקער זכותו יגן עלינו און אזוי ווייטער, אבער דער רבי האט דאס אוועק געמאכט, דער רבי האט געזאגט: "איך וואלט זוכה געווען צו קומען צו די אלע מדריגות אפילו איך וואלט ווען געבוירן געווארן ביי פשוט'ע עלטערן; דאס איז נישט צוליב זכות אבות, דאס איז ווייל איך האב פיל געהארעוועט, און יעדער איינער וואס וועט הארעווען, יעדער איינער, אפילו א פשוט'ער מענטש פון פשוט'ע עלטערן דארף וויסן, אז אויב וועט ער הערן די קול פון די צדיקים און טון זייערע עצות - האט ער אויך די מעגליכקייט צו קומען צו ווערן א גרויסער צדיק.
דער אייבערשטער זאל העלפן זאלסט האבן הצלחה אין אלע ענינים.