בעזרת ה' יתברך - יום א' פרשת קרח, כ"ט סיון, שנת תשפ"ג לפרט קטן
לכבוד מיין טייערער ... נרו יאיר, קרית ברסלב
געב איבער א גרויסן דאנק פאר דיין ווייב תחי'; זי העלפט זייער געטריי אונזערע מוסדות, דער אייבערשטער זאל ענק בענטשן מיט בני, חיי ומזוני רויחי.
איך בין געווען פאריגע וואך אין שטעטל, איך וואונדער זיך אויב נאר איך זע דעם פראבלעם אדער איז דאס א נאכגעלאזטקייט; עס איז דא א שווערע גערוך ווען מען קומט אריין אין שול, און איך וואונדער זיך, שוין אזויפיל מאל האב איך געבעטן דאס צו פאררעכטן און נאכאלץ שפירט מען א גערוך.
דו ביסט נישט קיין בטלן, אפשר דו וועסט מיר קענען העלפן פאררעכטן, אוועקנעמען דעם גערוך; און אז דאס וועט קאסטן געלט - וועל איך עס באצאלן.
אויך אויב דו קענסט אנשמירן די טירן מיט אויל; עס זאל נישט מאכן קיין גערודער.
וואויל איז דעם וואס איז משמש דעם רבי'ן, וועט ער זוכה זיין אויך אויף יענע וועלט צו זיין ביים רבי'ן.
ווען דו שפאצירסט אין שטעטל צווישן די גראז און ביימער - זאלסטו זאגן פארן אייבערשטן: "טאטע איך בענק זיך צו דיר, איך וויל נאר טראכטן פון דיר, איך וויל נאר זען דיך, איך וויל נאר דיך".