תוכן השאלה
לכבוד דער ראש ישיבה שליט"א,
איך פרוביר נישט צו מוטשען דעם ראש ישיבה שליט"א סתם אזוי, אבער עס איז שוין עק וועלט, מיין טאטע און מאמע רעדן נישט איינער צום צווייטן שוין א לאנגע צייט, און צוביסלעך ווערט עס ערגער און ערגער, ביז מען הויבט שוין אן פארלאנגען א גט רחמנא ליצלן, איך ווייס נישט אויב עס גייט טאקע אנקומען אזוי ווייט, אבער דער מצב איז זייער שווער און אנגעצויגן אין שטוב, איך ווייס נישט וואס מיינע אנדערע ברידער טראכטן, אבער איך וויל נאר אנטלויפן.
אויב דער ראש ישיבה שליט"א קען מיר עפעס העלפן, ווייל איך שפיר ווי איך קען מער נישט. מיין טאטע האט נישט צו וועמען צו רעדן, און דעריבער דערציילט ער מיר אלעס, און באמת דארף ער מיר גארנישט דערציילן, איך שפיר עס סיי ווי סיי אינדערהיים.
יישר כח פאר אלע שיעורים און חיזוק, איך בין מתפלל יעדן טאג פאר'ן ראש ישיבה שליט"א.
יישר כח
תשובה מאת הראש ישיבה שליט"א:
יום ב' פרשת ואתחנן, י' מנחם-אב, שנת תשפ"ה לפרט קטן
טייערער ... נרו יאיר
די צער פון קינדער וואס זעען די עלטערן קריגן זיך איז אזוי שרעקליך, מען קען פון דעם בארירט ווערן, עס איז א שרעקליכע ווייטאג, עס איז נישט צום אויסהאלטן; עס טוט מיר זייער וויי צו הערן דיין ווייטאג און צו זען ווי דו ווערסט געפייניגט.
איך בעט דיר זייער זאלסט זיך נישט אריינמישן און חס ושלום נישט נעמען קיין זייט אין די מחלוקת, דו זיי ביידע מכבד, און בזכות די מצוה פון מכבד זיין טאטע מאמע - וועסטו טרעפן דיין שידוך און לעבן מיט שלום און מיט ליבשאפט.
אויך זאלסטו דאווענען פאר זיי, בעט דעם אייבערשטן פאר זיי; עס זאל זיין ליבשאפט און שלום, ווייל תפילה איז אזוי שטארק, מען קען מיט תפילה אלעס איבערדרייען, מען קען מיט תפילה באקומען א שיינע זיסע שטוב מיט שלום און ליבשאפט.
דער אייבערשטער זאל העלפן זאלסט האבן הצלחה אין אלע ענינים.