תוכן השאלה
לכבוד דער ראש ישיבה שליט"א,
צום אלעם ערשט א גרויסן יישר כח פאר די שיעורים, גליונות, און קונטרסים.
אין מיין הויז קוקט מען ברוך ה' נישט קיין שום ווידיאס און דאס גלייכן, אבער איך בין לעצטנס געוואויר געווארן אז מיינע קינדער קוקן ווידיאס ביי מיינע שכנים, און זיי האבן מיר גארנישט דערציילט דערוועגן ביז יעצט.
מיין שאלה איז אויב איך זאל זיי אנהויבן ווייזן אליין אינדערהיים כשר'ע זאכן, וואס אזוי קען איך קאנטראלירן וואס זיי זעען יא אדער נישט, ווייל ביי די שכנים קען איך נישט וויסן וואס זיי זעען דארט, אדער זאל זיך נישט וויסנדיג מאכן פון די גאנצע זאך?
יישר כח
תשובה מאת הראש ישיבה שליט"א:
ב' פרשת קדושים, כ"ט ניסן, י"ד לעומר, שנת תשפ"ד לפרט קטן
לכבוד ... נרו יאיר
איך האב ערהאלטן דיין בריוו.
זיי מחנך דיינע קינדער נישט צו קוקן קיין שום ווידיאוס און קיין שום קליפס, אפילו וואס מען רופט כשר'ע, און אז די קינדער דערציילן אז זיי קוקן די ווידיאוס ביי שכנים - זאלסטו זיי זאגן נישט צו גיין צו די שכנים; זאלסט אכטונג געבן זיי זאלן נאר גיין צו שכנים וואס די שטוב פירט זיך ערליך.
עס איז אזוי געפערליך די סכנה פון קוקן ווידיאוס, מען דארף זייער היטן די קינדער פון דעם, מען דארף רעדן צו די קינדער זיי זאלן זיך דערווייטערן פון דעם און נישט צורירן צו דעם.
בעט דעם אייבערשטן פאר יעדן קינד עקסטער זיי זאלן אויסוואקסן ערליכע אידן. מוהרא"ש זכרונו לברכה דערציילט, עס איז געווען ביי איינעם פון אנשי שלומינו, ער האט געהאט זייער ערליכע קינדער, אלע זענען געווען ערליכע אידן און בעלי מידות טובות וכו'; ווען מען האט אים געפרעגט: "ווי אזוי האט איר זוכה געווען צו דעם?" האט ער געזאגט: "וואס מיינט איר, איך האב זיי אראפגעריסן פון בוים? איך האב יעדע נאכט געוויינט צום אייבערשטן, איך האב אנגעפילט מיין קאפל מיט מיינע טרערן און איך האב זיך אפגעוואשן מיין פנים מיט די טרערן".
דער אייבערשטער זאל העלפן זאלסט האבן הצלחה אין אלע ענינים.