תוכן השאלה
לכבוד דער ראש ישיבה שליט"א,
איך קען שוין נישט אויסהאלטן צו זיין א בחור, א סינגל מענטש, איך בין אין זייער גרויסע תפיסה, איך וויל אנטלויפן.
יישר כח פאר די אידישע ניגונים, ווען נישט דעם ראש ישיבה שליט"א'ס ניגונים וואלט איך זיך גע'הרג'ט, צי דורך דראגס צי מיט עפעס אנדערש.
זאל דער ראש ישיבה שליט"א צוזען מיין פיין און ווייטאג, דער רבי זאגט אז א מנהיג דארף האבן רחמנות. זאל דער ראש ישיבה צוקוקן די ווייטאג פון אלע בחורים, מחזק זיין די בחורים, און טון דאס מערסטע עס זאל זיין שידוכים.
יישר כח
תשובה מאת הראש ישיבה שליט"א:
יום ד' פרשת חיי שרה, י"ט מר-חשון, שנת תשפ"ה לפרט קטן
לכבוד ... נרו יאיר
איך האב ערהאלטן דיין בריוו.
מוהרא"ש זאגט, קיינער ווייסט נישט די צער פון א בחור, עס איז נישטא אזא צער ווי די צער פון א בחור, א בחור וויל חתונה האבן, ער וויל זיין ערליך און ריין און עס גייט אים נישט, און וויפיל מאל ער וויל זיך אויפשטעלן און תשובה טון און אנהויבן פון פריש זיין ערליך - פאלט ער און טראסקעט אין עבירות, אין פגם הברית רחמנא לצלן, און דאס מאכט אים אזוי בעצבות השם ישמרינו, ביז מען טראכט פון נישט וועלן לעבן חס ושלום.
איין עצה איז דא, אנטלויפן צום אייבערשטן און צו די תורה. אנטלויף צום אייבערשטן, דערצייל אים אין דיין שפראך ווי דו שטייסט, וואס עס גייט אריבער אויף דיר, וויין זיך אויס צום באשעפער, בעט אים ער זאל רחמנות האבן אויף דיר, ער זאל דיר געבן א שידוך. קענסט זיך נישט פארשטעלן דאס גרויסקייט פון רעדן צום אייבערשטן, פון זיך אויס'טענה'ן מיטן אייבערשטן. דער הייליגער זוהר זאגט (פרשת בלק, קצה) ווען א מענטש וויינט זיך אויס צום אייבערשטן, זאגט דער אייבערשטער: "לֹא בָּעִינָא הָכָא בֵּי דִינָא דִיְדוּנוּן בֵּינָנָא", ווען דער מענטש קומט מיט זיינע טענות צו מיר - וויל איך נישט בית דין של מעלה זאל זיך אריינמישן, "אַנָא וְהוּא בִּלְחוֹדָנָא", איך וויל זיין אליינס מיט דעם מענטש, "וְלֵית תֵּיאוּבְתָּא לְקוּדְשָׁא בְּרִיךְ הוּא אֶלָּא כַּד מְקַבֵּל לוֹן וְאוֹשְׁדוּ קַמֵּיהּ", נישטא קיין גרעסערע פארגענוגן ביים אייבערשטן ווי ווען א מענטש וויינט זיך אויס פאר אים, "דְּהָא כָּל נִטוּרֵי תַּרְעִין לֹא שַׁבְקִין הָכִי לְמֵיְעַל כַּמָה דְשַׁבְקִין לְמִסְכְּנִין", אלע טירן פון הימל זענען אפן פאר א צעבראכענער מענטש וואס וויינט זיך אויס פאר'ן אייבערשטן, "דְּהָא בְּלֹא רְשׁוּתָא עָאֳלִין", און זיינע תפילות גייען ארויף אן קיין רשות; דאס הייסט, ווען א מענטש גייט אין א ווינקל וואו קיינער איז נישט דארט, ער רעדט זיך אויס זיין הארץ צום אייבערשטן און ער פארציילט אים אלעס - די תפילות גייען גלייך ארויף צום אייבערשטן, דער אייבערשטער ענטפערט פאר א צעבראכענע הארץ שנעלער ווי ער ענטפערט פאר דעם גרעסטן צדיק.
ביז דיין שידוך און אויך נאכן טרעפן דיין שידוך - זאלסטו זיך באהאלטן אין די תורה. אנטלויף צו די תורה, מאך זיך א שיעור אין משניות, זאג יעדן טאג אפאר פרקים משניות, און אויך אין די בלעטער פון די הייליגע גמרא, זאג גמרא אפילו אן פארשטאנד, דאס וועט דיר געבן כח זיך צו קענען דערהאלטן ביז דיין ישועה קומט.
דער אייבערשטער זאל העלפן זאלסט האבן הצלחה אין אלע ענינים.