תוכן השאלה
לכבוד דער ראש ישיבה שליט"א,
איך בין א אינגערמאן וואס ווארט אויף א שמחה קיין עין הרע, מיר האלטן ביים ערשטן קינד מיט'ן אייבערשטנ'ס הילף בשעה טובה ומוצלחת, און מיט'ן אייבערשטנ'ס הילף גייט מיין ווייב קימפעטן ביי מיין שוויגער און מיר גייען זיך אריינציען צו מיין שוויגער אינדערהיים פאר א שיינע פאר וואכן; וויל איך בעטן אויב דער ראש ישיבה קען מיר צוגרייטן ווי אזוי מען פירט זיך אויף ווען מען וואוינט ביי די שוויגער, בכלל ווי אזוי מ'דרייט זיך ארום אין די הויז, צי קען מען זיך דרייען מיט נאכט קליידער, און ווי אזוי מען רעדט מיט די שוויגער אז מען באגעגנט זיך אזויפיל מאל, און אזוי ווייטער.
א גרויסן יישר כח פאר די שיעורים אויף קול ברסלב, און ספעציעל פאר די שיעור וואס דער ראש ישיבה שליט"א געבט פאר אינגעלייט יעדן דאנערשטאג נאכט.
יישר כח
תשובה מאת הראש ישיבה שליט"א:
יום ה' פרשת ויחי, ט' טבת, שנת תשפ"ה לפרט קטן
לכבוד ... נרו יאיר
איך האב ערהאלטן דיין בריוו.
דאנק און לויב דעם אייבערשטן אז מען האלט שוין דא, מען גרייט זיך אויף א שמחה; וויפיל משפחות שטייען און ווארטן עס זאל זיי שוין ליכטיג ווערן, זיי זאלן זוכה זיין צו קינדער; וויפיל עלטערן וויינען און בעטן דעם אייבערשטן אז זייערע חתונה געהאטע קינדער זאלן שוין זוכה זיין צו קינדער, און אז מען איז זוכה, מען גייט האבן א קינד - דארף מען טאג און נאכט זאגן: "שכוח אייבערשטער, איך דאנק דיך אייבערשטער, ביסט אזוי גוט צו מיר אייבערשטער", און בעטן פאר אידישע קינדער, אלע זאלן זוכה זיין צו קינדער און צו נחת פון די קינדער.
אז דיין ווייב'ס עלטערן נעמען דיך אריין פאר אפאר וואכן - דארפסטו זיי זייער דאנקען. ווען דו קומסט אהיים צו זיי זאלסטו זיי גרוסן און זאגן שכוח, קיינמאל נישט אריינקומען אן קלאפן, און ווארטן מען זאל דיר עפענען; אפילו מען מאכט דיר שפירן היימיש וכו' - זאלסטו זיך פירן מיט דרך ארץ.
ווען דו גייסט ארויס פון שטוב זאלסטו זען צי דו קענסט עפעס העלפן, ווי למשל ארויס טראגן די מיסט וכדומה לזה. אזוי אויך, ווען מען געבט דיר עסן זאלסטו זיך באדאנקען אויף די עסן. דריי זיך נישט ארום מיט די נאכט קליידער, פיר זיך אויף אזוי ווי מען פירט זיך אין די פרעמד, און אפילו זיי וועלן דיר באקוועם מאכן און דיר זאגן זאלסט זיך פירן היימיש, זאלסטו זיי באדאנקען אבער זיך ווייטער פירן מיט דרך ארץ. א שוויגער גריסט מען, און אז מען פרעגט שאלות ענטפערט מען, מען פירט זיך מיט שכל און מיט יראת שמים.
קוק אוועק אויף דיינע באקוועמליכקייטן, און אז עס איז דיר באקוועמער צו זיין אין דיינע אייגענע ד' אמות - זאלסטו געדענקען אז א קימפעטארין דארף זיך אפרוען, בפרט ביי די ערשטע קינד דארף מען האבן די מאמע זיך אפצורוען, זאלסטו נישט זאגן און אויך נישט מרמז זיין אז עס איז דיר נישט אזוי באקוועם, זאלסט זיך פרייען אז דיין ווייב קען זיך אפרוען, און ווען עס וועט קומען די צייט וועסטו צוריק אהיים גיין.
דער אייבערשטער זאל העלפן זאלסט האבן הצלחה אין אלע ענינים.