תוכן השאלה
לכבוד דער ראש ישיבה שליט"א,
איך קען נישט טראכטן גראד, איך בין אזוי טרויעריג און דערשראקן, מיין מאן איז געזעסן די נאכט פאר אכט שעה מיט א סמארטפאון, איך ווייס נישט ווי אזוי דאס צו האנדלען.
איך האב אים געטראפן ניין דרייסיג אינדערפרי זיצן מיט'ן סמארטפאון אויפ'ן פארטש נאך פון נעכטן נאכט. איך האלט עס נישט אויס, איך הער נישט אויף צו וויינען א גאנצן טאג.
באמת איז עס מיין שולד, עס איז מיין ארבעט'ס טעלעפאן, עס האט טאקע א פילטער אבער איך בין זיכער אז אויב מען זיצט דערויף פאר אזוי לאנג קען מען עפעס טרעפן שלעכטס. יעצט וויין איך פארוואס איך האב נישט געפרעגט דעם ראש ישיבה שליט"א אויב איך זאל בכלל גיין אין קאנטרי און ארבעטן פון מיין באנגעלאו.
וואס טו איך יעצט? איך בעט דער ראש ישיבה שליט"א זאל מיר העלפן, איך וויל האבן א ריינע הויז, אפגעהיטן פון אלע סארט שלעכטס.
יישר כח
תשובה מאת הראש ישיבה שליט"א:
יום ג' פרשת מטות מסעי, כ"ד תמוז, שנת תשפ"ד לפרט קטן
מרת ... תחי'
איך האב ערהאלטן אייער בריוו.
די צדיקים פון אונזער דור און די צדיקים פון די פריערדיגע דור האבן אלע גערעדט פון די סכנה פון האבן אין שטוב א קאמפיוטער, טעבלעט, סמארטפאון וכדומה, ווייל אפילו מיט א פילטער קען מען אראפפאלן רחמנא לצלן און אלעס פארלירן, אזויפיל שטיבער זענען צעפאלן צוליב א קליינע טעלעפאן, און אזויפיל קינדער זענען אראפ פון וועג צוליב די כלים.
ווארפט ארויס פון שטוב די שעדליכע כלים, עס איז נישט ווערד די פרנסה - צוגרונד צו לייגן די שטוב. נעמט נישט אריין אין שטוב קיין שום כלי וואס מען קען זען אויף דעם עבירות רחמנא לצלן, און נעמט נישט אריין אין האנט קיין סמארטפאון.
בעטס דעם אייבערשטן פאר אייך, פאר אייער מאן און פאר אייערע דורות, זיי זאלן אלע זיין ערליך, אפגעהיטן פון עבירות, מיר לעבן היינט אין שווערע נסיונות, עס איז נישט מעגליך אן תפילות צו זיין אפגעהיטן, מען דארף אסאך בעטן פאר זיך, פאר די משפחה און פאר אלע אידן - צו זיין אפגעהיטן.
דער אייבערשטער זאל העלפן איר זאלט האבן הצלחה אין אלע ענינים.