תוכן השאלה
לכבוד דער ראש ישיבה שליט"א,
איך האב ברוך ה' חתונה געהאט מיט א גוטע וואויל איבערגעגעבענע פרוי, זי האט א גוט הארץ, זי שטעלט מיך צופרידן מיט אלעס וואס איך דארף, און איך האב איך ליב ברוך ה'.
איך האב געוואלט פרעגן ווי אזוי איך דארף זיך באגיין מיט די צניעות פון מיין ווייב? מיין ווייב איז מער מאדערן פון מיר, איך קוק עס נישט אן אלס א חסרון, פון איר זייט ווייל זי מער אן אפענע און מאדערענע שטוב, צום ביישפיל זי וויל האבן א סמארטפאון וכו'.
ווען עס קומט צו קליידער וויל איך פרעגן אויב איך דארף זיך בכלל אריינמישן אין וועלכע קליידער זי קויפט זיך; און אויב יא, ווען יא און ווען נישט?
די שאלה איז בכלליות ווי אזוי קען איך מאכן אז מיין שטוב זאל זיך פירן פונקט ווי אזוי דער ראש ישיבה שליט"א האלט אז עס דארף זיין, און וועגן די קליידער וואס יא און וואס נישט איר צו זאגן.
איך בעט אז דער ראש ישיבה שליט"א זאל מיר מדריך זיין אויף ריכטיגן וועג וועג, און איך וועל אי"ה אננעמען אלעס וואס דער ראש ישיבה שליט"א זאגט.
יישר כח
תשובה מאת הראש ישיבה שליט"א:
יום א' פרשת משפטים, י"ח שבט, שנת תשפ"ה לפרט קטן
לכבוד ... נרו יאיר
איך האב ערהאלטן דיין בריוו.
אז דו פארשטייסט נישט צו צניעות, דו ווייסט נישט וואס איז איידל און וואס נישט - זאלסטו זיך מאכן א כלל און אלץ קוקן אויף די עלטערן; אז דיין ווייב קויפט זיך א קלייד און זי פרעגט דיר: "עס איז גוט? עס איז איידל?" און דו ווייסט נישט וואס צו ענטפערן, פרעג איר: "דיין מאמע גייט אזוי? דיין מאמע וואלט געזאגט עס איז גוט? אפשר ווילסטו פרעגן דיין מאמע?" אזוי ווי עס שטייט אין פסוק (שיר השירים א, ח): "אִם לֹא תֵדְעִי לָךְ הַיָּפָה בַּנָּשִׁים", אויב דו ווייסט נישט וואס איז שיין פאר א פרוי, "צְאִי לָךְ בְּעִקְבֵי הַצֹּאן", זאלסטו גיין אין די וועגן פון די עלטערן.
זיי מחזק דיין ווייב זי זאל נישט גיין אנגעטון ווייניגער איידל ווי איר מאמע, דו זאלסט איר געבן אסאך גוטע ווערטער אויף בלייבן אנגעטון איידל ווי איר מאמע, נישט גיין א סענטימעטער קורצער, שמאלער, מער אויפפאלנד - ווי די מאמע. אז זי וויל טוישן פון איר מאמע – קען זי מאכן נאר מער איידל, אבער נישט אויף אראפ.
בנוגע די סמארטפאון; זאלסטו איר געבן גוטע ווערטער און זאגן אז עס איז ענדערש צו פאלגן צדיקים וואס זאגן מען זאל נישט ארייננעמען אין שטוב קיין טעלעפאן, אפילו עס איז נישט אזוי באקוועם - ווי איידער זיך באקוועם מאכן און נישט פאלגן די צדיקים, ווייל עס קען אמאל צעפאלן א גאנצע שטוב וועגן א טעלעפאן. די צדיקים זעען ווייטער, זיי זעען העכער, זיי ווייסן וואס וועט זיין אין צען יאר, אין צוואנציג יאר; עס לוינט צו פאלגן און בלייבן מיט א שיינע ערליכע שטוב.
גיי התבודדות יעדן טאג, שריי צום אייבערשטן: "רבונו של עולם העלף מיר, איך וויל זוכה זיין צו ערליכע דורות, הייליגע דורות, וואס וועלן גיין אין די וועג פון די תורה און אין די וועג פון צדיקים"; מען דארף אסאך בעטן דעם אייבערשטן אויף אן ערליכע שטוב און אויף ערליכע דורות.
דער אייבערשטער זאל העלפן זאלסט האבן הצלחה אין אלע ענינים.