תוכן השאלה
לכבוד דער ראש ישיבה שליט"א,
איך וויל זיך זייער באדאנקען פאר די שיעורים און חיזוק, וואס האבן שטארק געטוישט מיין לעבן צום גוטן. איך קום פון די 'היילינג' וועלט, פון ארומלויפן צו אלע וואס זאגן אז זיי קענען היילן, אבער זיי האבן מיר געפירט אויף זייער א שלעכטע וועג, און יעצט פרוביר איך צו פאררעכטן די שאדן דורך די חיזוק וואס איך באקום דא ביים הייליגן רבי'ן.
מיין שאלה איז וועגן מיין דאווענען אינדערפרי, נאכ'ן זאגן ברכות השחר און קריאת שמע, האב איך נאך א 10-15 מינוט ביז ווען איך דארף גיין צו די ארבעט, איז ענדערש צו זאגן דעמאלט אן אייגענע פערזענליכע תפלה אויף אידיש צום אייבערשטן, אים צו בעטן אלעס וואס איך דארף, איך ליין דאס פון א צעטל וואס איך האב זיך פארגעשריבן, און דאס ברענגט אריין אין מיר א רואיגקייט וויסנדיג אז איך האב זיך אויסגעשמועסט מיט'ן אייבערשטן אלעס וואס ליגט מיר אויפ'ן הארץ; אדער איז ענדערש צו דאווענען א פארקורצערטער שחרית, דאס הייסט אביסל פון פסוקי דזמרא און שמונה עשרה?
יישר כח
תשובה מאת הראש ישיבה שליט"א:
מוצאי שבת קודש פרשת לך לך, י"א מרחשון, שנת תשפ"ו לפרט קטן
מרת ... תחי'
איך האב ערהאלטן אייער בריוו.
איך פריי זיך זייער צו הערן אז איר זענט זיך זייער מחזק מיט די עצות פון הייליגן רבי'ן, די חיזוק וואס דער רבי געבט אונז שטארקט אונז מיר זאלן קענען אלעס אריבערגיין.
יעדן אינדערפרי ווען איר ענדיגט ברכות השחר מיט קריאת שמע און איר האט נאך א צען פופצן מינוט פאר איר גייט צו די ארבעט, זאלט איר אפאר מינוט רעדן צום אייבערשטן. נעמט א צעטל און שרייבט אראפ אלעס וואס איר דארפט, אלע אייערע בקשות, אלע געברויכן, און דאס זאלט איר יעדן טאג דורכשמועסן מיטן אייבערשטן אויף אייער אייגענע שפראך. דאס איז די העכסטע זאך וואס קען נאר זיין, דער רבי זאגט (לקוטי מוהר"ן חלק ב', סימן כה): "התבודדות הוא מעלה עליונה וגדולה מן הכל", דאס רעדן צום אייבערשטן אויף די אייגענע שפראך - איז די העכסטע און גרעסטע זאך, העכער פון אלעס; דאס איז וואס משיח וועט אויסלערנען פאר די גאנצע וועלט, מען זאל שמועסן מיטן אייבערשטן אזוי ווי מען רעדט צו א גוטע פריינד, און אזוי ווי א קינד רעדט צו זיין טאטע.
דער אייבערשטער זאל העלפן איר זאלט האבן הצלחה אין אלע ענינים.