תוכן השאלה
לכבוד דער ראש ישיבה שליט"א,
עס איז נישטא קיין ווערטער צו דאנקען דעם ראש ישיבה שליט"א אויף אלעס וואס מיר באקומען פון די שיעורים און בריוו, אין אלע תחומים פון לעבן, דער אייבערשטער זאל ווייטער געבן אסאך כח פאר'ן ראש ישיבה שליט"א צו ממשיך זיין מיט די הייליגע ארבעט.
איך בין ברוך ה' אלץ געגאנגען אנגעטון צניעות'דיג מיט נאר מיט שווארצע שעסלעך, שווארצע שטרומפ, און שווארצע שיך; לעצטנס האב איך געהערט א שיעור אין צניעות, ווי ווייט הארב עס איז צו מכשיל זיין א צווייטן איד, און ווי ווייט א פרוי דארף אכטונג געבן ווי אזוי זי גייט אנגעטון, און דאס האט מיר טראכטן אז אפשר דארף איך גיין נאך א טריט ווייטער, אז אויך די אויבערשטע טייל פון קערפער זאל זיין אנגעטון נאר אין שווארץ.
האב איך געוואלט פרעגן אויב דאס איז א ריכטיגע זאך, נישט אנצוטון קיין שום קליידונג וואס האט קאלירן, נאר אינגאנצן שווארץ?
יישר כח
תשובה מאת הראש ישיבה שליט"א:
יום א' פרשת שמות, ט"ו טבת, שנת תשפ"ו לפרט קטן
... תחי'
וואויל איז אייך און וואויל איז אייער חלק אז איר פירט זיך איידל, איר גייט אנגעטון איידל און באשיידן, די שענסטע מתנה וואס דער אייבערשטער האט געגעבן פאר אידישע טעכטער איז די זאך פון זיין איידל און באשיידן, און מען באקומט גאר שכר דערויף, אזוי ווי די הייליגע חכמים זאגן (מגילה יג:): "בִּשְׂכַר צְנִיעוּת שֶׁהָיְתָה בָּהּ בְּרָחֵל זָכְתָה וְיָצָא מִמֶּנָהּ שָׁאוּל", רחל אמינו האט זוכה געווען אז פון איר איז ארויס געקומען דער גרויסער צדיק שאול המלך וויבאלד זי האט זיך געפירט בצניעות, "וּבִשְׂכַר צְנִיעוּת שֶׁהָיָה בּוֹ בְּשָׁאוּל זָכָה וְיָצָאת מִמֶּנּוּ אֶסְתֵּר", און שאול המלך האט זוכה געווען - דורכדעם וואס ער האט זיך געפירט בצניעות - אז פון אים איז ארויסגעקומען די גרויסע צדיקת אסתר המלכה; און דער רבי זאגט (ספר המדות אות בנים, סימן ט): "הַצְּנִיעוּת שֶׁבְּאִשָּׁה מְזַכֶּה לָהּ לְבָנִים הֲגוּנִים", א פרוי וואס גייט אנגעטון צניעות'דיג וועט זוכה זיין צו גוטע קינדער.
עס זענען דא משפחות וואס ביי זיי גייט מען שווארץ, נאכדעם איז דא משפחות וואס ביי זיי גייט מען יא מיט קאלירן, ביידע זענען ריכטיג, און אז ביי אייך גייט מען מיט קאלירטע קליידער – קענט איר ווייטער גיין מיט קאלירטע קליידער, דער עיקר איז עס זאל זיין איידעלע קאלירן, און באשיידן.
דער אייבערשטער זאל העלפן, אין די זכות וואס איר טוט זיך אן איידל און באשיידן, זאלסט איר זוכה זיין צו די ברכה וואס חכמינו זכרונם לברכה זאגן (תנחומא וישלח, ו), אויפן פסוק (תהלים קכח, ג): "אֶשְׁתְּךָ כְּגֶפֶן פּוֹרִיָּה", ווען איז א פרוי ווי א וויינשטאק, ווען איז א פרוי זוכה צו זיין "כְּגֶפֶן פּוֹרִיָּה", אויפצושטעלן א שטוב מיט קינדער? ווען זי איז "בְּיַרְכְּתֵי בֵיתֶךָ", ווען זי פירט זיך איידל און גייט אנגעטון איידל; דעמאלט וועט זי זוכה זיין צו די ברכה פון "בָּנֶיךָ כִּשְׁתִילֵי זֵיתִים", זי וועט אויפשטעלן קינדער וואס וועלן געזאלבט ווערן מיטן שמן המשחה, עיין שם.
דער אייבערשטער זאל העלפן איר זאלט האבן הצלחה אין אלע ענינים.