תוכן השאלה
לכבוד דער ראש ישיבה שליט"א,
איך האב געוואוסט אז דאס וועט פאסירן אויב מיין מאן באקומט א טעבלעט. ער קומט אהיים פון די ארבעט, מיר זיצן ביים טיש און ער קוקט נישט אויף מיר בכלל, נאר אויפ'ן טעבלעט, מיר גיין שלאפן און ער איז אויפ'ן טעבלעט, איך וויל רעדן צו אים און ער איז פארנומען מיט'ן טעבלעט, און זעט גארנישט עפעס אנדערש אויסער זיין טעבלעט.
איידער ער האט געהאט דעם טעבלעט, ווען ער האט מיר געזאגט א צייט ווען ער קומט אהיים, איז ער דעמאלט געווען אינדערהיים, אבער יעצט אויב וועל איך אים נישט רופן, קען ער בלייבן אינדרויסן פאר לאנגע שעות.
איך ווייס אז ער איז נישט שלעכטס, אבער עס הרג'ט מיר אוועק אינגאנצן. איך מוז באטאנען אז דער טעבלעט האט א פילטער, אבער ער איז ממש צוגעקלעבט צו די סקרין. איך שפיר ממש ווי אין גיהנום, איך בין ממש פארלוירן.
מיר ווארטן ברוך ה' א שמחה, אבער אנשטאט צו זיין פרייליך, איז מיר בכלל נישט אינטערעסאנט דאס לעבן, איך שפיר בכלל נישט ווי איך האב א מאן, זיין קאפ און מח איז ערגעץ אוועקגעפלויגן, נישט מיט מיר.
מיר דארפן זייער וויכטיג הילף, איך קען מער נישט אזוי אנגיין, אויב דער ראש ישיבה שליט"א קען מיר ביטע העלפן.
יישר כח
תשובה מאת הראש ישיבה שליט"א:
מוצאי שבת קודש פרשת לך לך, י"א מרחשון, שנת תשפ"ו לפרט קטן
מרת ... תחי'
איך האב ערהאלטן אייער בריוו.
וואס עס איז דא צו זאגן? דער טעבלעט, טעלעפאן, קאמפיוטער - מאכט חרוב שטובער, עס פארטרייבט די שכינה הקדושה. מוהרא"ש אין די בריוו רופט אן דעם קאמפיוטער - מכשף, כישוף מאכער, ווייל חכמינו זכרונם לברכה זאגן (סנהדרין סז:), וואס איז די נאמען כישוף? "שמכחישין פמליא של מעלה", זיי מאכן שוואך די כוחות פון די קדושה, און דאס איז די קאמפיוטער, טעבלעט, טעלעפאן וכדומה לזה.
בעטס דעם אייבערשטן אייער מאן זאל עס אפלאזן און אוועק ווארפן, בעטס ביי די שבת לעכט דעם אייבערשטן אז אייער שטוב זאל זיין אפגעהיטן פון אלע שלעכטס. נאר מיט תפילה קען מען זוכה זיין צו האבן א הייליגע שטוב, די טומאה כאפט זיך אריין אין די שענסטע שטיבער, ביי די שענסטע משפחות. ממש וואס דער נביא שרייט (ירמיה ט, כ): "כי עלה מות בחלונינו בא בארמנותינו להכרית עולל מחוץ בחורים מרחבות", עס מאכט חרוב די יוגנט, און נאר מיט תפילה פאר ערליכע דורות, מיט וויינען צום אייבערשטן - קען מען זוכה זיין צו האבן א ריינע שטוב.
איר מעגט זאגן אייער מאן שיינערהייט מיט שטארקע ליבשאפט: "אפשר איז בעסער פאר די שטוב עס זאל נישט זיין?" מען מעג רעדן, מען דארף רעדן, אבער עס מוז גיין מיט גרויס ליבשאפט און מיט איידלקייט, נישט דער מאן זאל שפירן ווי מען טיילט אים איין וואס צו טון, כאילו ער איז נישט בעל הבית; מען מוז צו דעם האבן גרויס חכמה.
דער אייבערשטער זאל העלפן איר זאלט האבן הצלחה אין אלע ענינים.