תוכן השאלה
לכבוד דער ראש ישיבה שליט"א,
איך ליג זייער שטארק אין די וועטער, דאס איז מיין 'האבי' און הנאה, איך בין זייער מקושר צו דעם, צו פארשטיין און מיטהאלטן די וועטער.
איך פלעג האבן א לעפטאפ אינדערהיים מיט א פילטער נאר פאר די וועטער, באנק, און אימעיל, ביז איך בין מקורב געווארן און געהערט ווי דער ראש ישיבה שליט"א זאגט אז מען זאל נישט האבן קיין שום אינטערנעט אינדערהיים, האב איך דאס אויפגעהערט צו ניצן און אוועקגעלייגט.
למעשה האב איך נישט קיין מנוחה, עס שטערט מיר זייער אז איך קען נישט מיטהאלטן די וועטער, עס איז שווער מסביר צו זיין אויף טעקסט וואס וועטער איז, עס איז אסאך אסאך טיפער ווי צו אנרופן די וועטער האטליינס; האב איך געוואלט פרעגן אויב איך זאל קויפן א טעבלעט און האלטן נאר אין די קאר?
יישר כח
תשובה מאת הראש ישיבה שליט"א:
יום ג' פרשת חיי שרה, כ' מרחשון, שנת תשפ"ו לפרט קטן
לכבוד ... נרו יאיר
איך האב ערהאלטן דיין בריוו.
זוך דיר נישט קיין צרות, נעם נישט קיין טעבלעט פאר די זאכן, זע עס זאל נישט אריינקומען די רוח סערה ביי דיר אין קאפ. מען קען ווערן אומגליקליך דורך דעם קאמפיוטער, אזויפול אומשולדיגע אינגעלייט און בחורים זענען געפאלן פון האבן א טעבלעט נאר פאר דעם און נאר פאר יענץ.
זע צו זיין פרייליך. דער הייליגער רבי זאגט (לקוטי מוהר"ן חלק ב', סימן כד): "מִצְוָה גְּדוֹלָה לִהְיוֹת בְּשִׂמְחָה תָּמִיד, וּלְהִתְגַּבֵּר לְהַרְחִיק הָעַצְבוּת וְהַמָּרָה שְׁחֹרָה בְּכָל כֹּחוֹ, וְכָל הַחוֹלַאַת הַבָּאִין עַל הָאָדָם כֻּלָּם בָּאִין רַק מִקִּלְקוּל הַשִּׂמְחָה", עס איז א גרויסע מצוה צו זיין שטענדיג פרייליך, און זיך שטארקן מיט אלע כחות נישט צו זיין דעפרעסט. ווייל אלע מחלות און אלע קרענק קומען ווייל מען איז דעפרעסט און נישט פרייליך. און דער רבי זאגט דארט ווייטער: "גַם חַכְמֵי הָרוֹפְאִים אָמְרוּ, שֶׁכָּל הַמַּחֲלוֹת וְהַחֳלָאִים רָעִים בָּאִים רַק מַחֲמַת חִסָּרוֹן הַשִּׂמְחָה", אפילו די דאקטורים זאגן אז אלע מחלות קומען פון דיפרעסיע און פון זיין נישט פרייליך.
דער אייבערשטער זאל העלפן זאלסט האבן הצלחה אין אלע ענינים.