תוכן השאלה
לכבוד דער ראש ישיבה שליט"א,
איך ווייס אז דער ראש ישיבה שליט"א איז קעגן גיין צו טעראפי, איך שפיר אבער לעצטנס אז עס איז מיר זייער שווער, איך דארף הילף, עס איז מיר ממש שווער אנצוגיין, עס האלט מיר אין איין ארויפקומען שווערע זכרונות פון אמאל.
איך טראכט אז אפשר קען טעראפי מיר יא העלפן, איך ווייס אבער נישט אויב איך זאל דאס פרובירן אדער נישט.
יישר כח
תשובה מאת הראש ישיבה שליט"א:
יום א' פרשת צו, ד' ניסן, שנת תשפ"ו לפרט קטן
... תחי'
איך האב ערהאלטן אייער בריוו.
פארוואס זאגט איר אז איך בין קעגן גיין צו טעראפי? וואס עפעס? איך בין נישט קעגן גיין נעמען הילף, איך זאג נאר אז מען דארף זיך אכטונג געבן צו וועמען מען גייט, מען זאל נישט גיין צו נישט ערליכע וואס קענען אוועק שלעפן פון די תורה און פונעם אייבערשטן.
אז איר שפירט ווי איר דארפט הילף, איר דארפט רעדן צו איינעם – קענט איר גיין, און דער אייבערשטער זאל אייך העלפן איר זאלט זיין געזונט און שטארק פיזיש און גייסטיש.
יעצט גייט מען עסן די הייליגע מצה, דער זוהר הקדוש זאגט (פרשת תצוה, קפג:) אז מצה איז מעדעצין, מען קען ווערן אויסגעהיילט פון די מצה, מען דארף גלייבן אין דעם.
דער אייבערשטער זאל העלפן מיר זאלן זוכה זיין צו (פסחים קטז:): "וְנֹאכַל שָׁם מִן הַזְּבָחִים וּמִן הַפְּסָחִים"; און צו (מיכה ז, טו): "כִּימֵי צֵאתְךָ מֵאֶרֶץ מִצְרָיִם אַרְאֶנּוּ נִפְלָאוֹת", אמן.