תוכן השאלה
לכבוד דער ראש ישיבה שליט"א,
צום ערשט האב איך געוואלט זיך זייער באדאנקען פאר אלע שיעורים און בריוו און גליונות וואס זענען אזוי מחזק. ווען איך שפיר זיך צעבראכן, אנטלויף איך צו די שיעורים, און דאס געבט מיר אזויפיל כח.
אין זכות פונעם ראש ישיבה שליט"א האב זיך זוכה געווען מקורב צו ווערן צו היכל הקודש, אנגעהויבן רעדן צום אייבערשטן, זיך מתבודד זיין, מכבד זיין מיינע עלטערן, דאווענען אסאך, זאגן תהלים, און נאך אזויפיל זאכן, און ספעציעל זיך צו קענען דערהאלטן אין שווערע צייטן ווען איך שפיר אזוי צעבראכן.
איך האב געוואלט פרעגן אויב ווען מען זאגט די קריאת שמע שעל המטה של האריז"ל, אזוי ווי עס שטייט אינעם סידור פון מוהרא"ש, וואס מען זאגט דארט אויך די ברכה פון המפיל, אויב מען מעג נאכדעם זיך מתבודד זיין און רעדן צום אייבערשטן ווען מען גייט אריין אין בעט ביז מען שלאפט איין, אדער טאר מען שוין גארנישט רעדן נאך המפיל?
יישר כח
תשובה מאת הראש ישיבה שליט"א:
יום א' פרשת כי תבוא לאומאן, י"ב אלול, שנת תשפ"ד לפרט קטן
...
איך האב ערהאלטן אייער בריוו.
עס איז אזוי גוט ווען מען איז מקורב צום צדיק, מען הויבט אן שפירן דעם אייבערשטן, מען שפירט ווי מען איז ארומגענומען מיטן אייבערשטן, דער צדיק לערנט אונז וואס צו טון בעת צרה, מען זאל אנטלויפן צום אייבערשטן; ווען עס גייט אריבער שווערע טעג - זאל מען זיך נישט פארלירן, נאר זיך באהאלטן ביים אייבערשטן, רעדן מיט אים און שמועסן מיט אים, עס איז אזוי גוט ווען מען האט א צדיק, עס איז אזוי געשמאק מיטן הייליגן רבי'ן.
מען מעג שמועסן מיטן אייבערשטן נאך קריאת שמע און ברכת המפיל; אדרבה, דאס איז די בעסטע וועג איינצושלאפן, רעדנדיג צום אייבערשטן. מוהרא"ש זאגט בשם רבי אברהם בן רבי נחמן זכר צדיק לברכה, אז מען שלאפט איין אינמיטן זיך מתבודד זיין - איז דאס אן אנדערע סארט שלאף, א הייליגע שלאף.
נאך האט דער גרויסער צדיק רבי אברהם בן רבי נחמן געזאגט, אז מען שלאפט איין אינמיטן רעדן צום אייבערשטן זאגט מען נישט "איך גיי שלאפן", נאר "איך גיי רעדן צום אייבערשטן, און אינמיטן בין איך איינגעשלאפן".
דער אייבערשטער זאל העלפן איר זאלט האבן הצלחה אין אלע ענינים.
א כתיבה וחתימה טובה, א גוט געבענטשט יאר.