תוכן השאלה
לכבוד דער ראש ישיבה שליט"א,
ברוך ה' איך האלט אין משניות מער ביים סוף, און איך מאך ברוך ה' התבודדות.
לעצטנס ווען איך גיי שלאפן קומט מיר ארויף אין קאפ נישט איידעלע בילדער און אויסגעלאסענע פרויען, און עס איז מיר שווער צו איינשלאפן, איך וויל פרעגן אויב דער ראש ישיבה שליט"א קען מיר געבן אן עצה אויף דעם.
אויך וויל איך בעטן אביסל חיזוק אויף לערנען גמרא, ביי משניות רוק איך זיך ברוך ה', ווייל איך זאג עס צופרי אויפ'ן באס, אבער גמרא זאג איך נישט געווענליך, וויל איך בעטן אביסל חיזוק אויף דעם.
אזוי אויך לעצטנס פיל איך זיך זייער אראפגעשלעפט און צעבראכן, איך רעג זיך אויף מיינע געשוויסטער, אבער איך ווייס נישט פארוואס, עס קען זיין אז אלעס האט א שייכות, אבער איך פיל זיך זייער צעבראכן.
איך וויל דאנקען דעם ראש ישיבה שליט"א פאר אלע שיעורים.
יישר כח
תשובה מאת הראש ישיבה שליט"א:
יום ב' פרשת דברים, ג' מנחם-אב, שנת תשפ"ה לפרט קטן
ליבער ... נרו יאיר
איך האב ערהאלטן דיין בריוו.
עס איז גוט זאלסט זיך לייגן שלאפן מיט א מעשה ביכל פון צדיקים, אדער מיט די בריוו פון התחזקות וואס מוהרא"ש האט געשריבן אין ספר אשר בנחל און דאס גלייכן, אויך קענסטו הערן א שיעור התחזקות און אזוי איינשלאפן, וועסטו האבן א הייליגע שלאף; עס איז גאר אנדערש ווען מען שלאפט איין מיטן רבינ'ס התחזקות, מיט אמונה און שמחה.
ווען דו גייסט אין גאס זאלסטו היטן דיינע אויגן, און ווען דו ביסט אונטערוועגנס זאלסטו אריינקוקן אין א ספר, נישט מפקיר זיין דיינע אויגן.
עס שטייט פון צדיקים, אויפן פסוק (בראשית לח, כא): "אַיֵּה הַקְּדֵשָׁה", ווי אזוי קען מען זוכה זיין צו קדושה? "הִוא בָעֵינַיִם עַל הַדָּרֶךְ", אז מען היט די אויגן אונטערוועגנס; ווייל אז מען היט די אויגן ווערט מען פרייליך, און מען איז זוכה צו ריינע מוחין, און מען איז פרייליך, מען קריגט זיך נישט מיט קיינעם, און צו אלעס גוטס.
זיי פרייליך, טו אלעס אבי צו זיין פרייליך.
פון דיין ראש ישיבה וואס האט דיך זייער ליב.