תוכן השאלה
לכבוד דער ראש ישיבה שליט"א,
איך האב געוואלט פרעגן וואס איך זאל זיך פארנעמען לכבוד מיין 24'סטע געבורטסטאג וואס גייט זיין ... מיט'ן אייבערשטנ'ס הילף.
פאריגע יאר האט דער ראש ישיבה שליט"א מיר געזאגט איך זאל זיך מקבל זיין צו רופן מיינע עלטערן יעדן טאג, ש'כח אייבערשטער אז איך האב דאס מקיים געווען כמעט יעדן טאג, וויל איך יעצט פרעגן וואס איך זאל זיך מקבל זיין דאס יאר.
א גרויסן יישר כח פאר אלעס, דער אייבערשטער זאל העלפן דער ראש ישיבה שליט"א זאל ווייטער האבן אסאך כח און סייעתא דשמיא.
יישר כח
תשובה מאת הראש ישיבה שליט"א:
יום א' פרשת דברים, ב' מנחם-אב, שנת תשפ"ה לפרט קטן
טייערער ליבער ... נרו יאיר
וואויל איז דיר אז דו ביסט מקיים די מצוה פון כיבוד אב ואם, דו רופסט דיינע עלטערן יעדן טאג. ביים אייבערשטן איז זייער חשוב די מצוה פון כיבוד אב ואם, דער אייבערשטער זאגט (קידושין ל:): "בזמן שאדם מכבד את אביו ואת אמו, אמר הקדוש ברוך הוא, מעלה אני עליהם כאילו דרתי ביניהם וכבדוני", ווער עס איז מכבד טאטע מאמע איז אזוי ווי מען איז מיך מכבד; די מצוה פון כיבוד אב ואם איז אזוי גרויס, "הוקש כיבוד אב ואם לכבודו של מקום" (בבא מציעא לב.), עס איז די זעלבע זאך ווי מכבד זיין דעם אייבערשטן.
לכבוד דיין פיר און צוואנציגסטע געבורטס טאג זאלסטו זיך מקבל זיין צו טון וואס דער הייליגער רבי אלימלך זכותו יגן עלינו זאגט אין צעטל קטן (סעיף יא): "בחזרת הש"ץ השמונה עשרה", ווען דער בעל תפילה גייט איבער די שמונה עשרה, "יעיין בסידור", זאל מען אריינקוקן אין סידור; זיי זיך מקבל ביי הויכע שמונה עשרה אריינצוקוקן אין סידור.
דער אייבערשטער זאל העלפן זאלסט האבן הצלחה אין אלע ענינים.