תוכן השאלה
לכבוד דער ראש ישיבה שליט"א,
וואס איז די ריכטיגע צוגאנג צו א געבורטסטאג פון א קינד? ביי מיינע עלטערן האט מען בכלל נישט געוואוסט פון אזא זאך, מען האט גארנישט געמאכט קיין שום עסק פון א געבורסטאג, ווידער ביי מיין ווייב'ס משפחה איז פונקט פארקערט, מען האט געמאכט גאר גרויסע און ערנסטע זאכן ביי א געבורטסטאג.
מיר פרעגן זיך אליין יעדעס מאל פון פריש, ספעציעל ווען די קינדער הויבן שוין אן מער אונטערצואוואקסן, וואס איז טאקע די ריכטיגע וועג ביי דעם, דארף מען מאכן א מצב פון א געבורטסטאג אדער נישט?
יישר כח
תשובה מאת הראש ישיבה שליט"א:
יום ד' פרשת במדבר, כ"ח אייר, מ"ג לעומר, שנת תשפ"ד לפרט קטן
טייערער ... נרו יאיר
איך האב ערהאלטן דיין בריוו.
ביי אונז מאכט מען נישט קיין עסק פון די געבורטסטאג, נאר ווען מען איז עלטער, מען איז פארשטענדליך - ניצט מען אויס דעם טאג פאר א טאג פון תשובה, מען בארעכנט זיך 'וואו בין איך אויף דער וועלט? וואס טו איך און וואס קען איך מאכן נאך בעסער?' דאס איז ביי אונז א יום הולדת.
ביי די קינדער'ס געבורטסטאג פירט מען זיך אז די עלטערן וואונטשן אן דעם קינד ער זאל זיין פרייליך און ערליך, און מען העלפט דעם קינד טראכטן עפעס א גוטע קבלה זיך צו אונטערנעמען.
עס איז וויכטיג צו וויסן אז דער ענטפער איז נאר אז ביידע, סיי דער מאן און סיי די ווייב - ווילן הערן וואס דא שטייט, אבער אז די ווייב וויל יא מאכן א סעודה און זי ווארט אויף א מתנה, דאס איז ביי איר ממש א שטיק לעבן וכו' - דעמאלט קען מען מאכן אין שטוב פריוואט א סעודה און געבן א מתנה.
העיקר זאל זיין שלום מיט ליבשאפט.