בעזרת ה' יתברך

יום ד' לסדר כי תבוא לאומאן, י"ז אלול, שנת תשפ"ה לפרט קטן

מרת ... תחי'

נעמט זיך פאר צו האלטן די גוטע קבלה פון פאריאר, צו מאכן עפעס א גוטע עסן לכבוד שבת, מען דארף נישט נעמען א נייע פרישע גוטע קבלה. נעמט זיך פאר דאס וואס איר האט זיך פארגענומען פאריאר; מאכט עפעס א גוטע עסן לכבוד שבת, מאכט עס מיט שמחה, דער רבי זאגט מאכן עסן פאר שבת איז א תיקון פאר אלעס.

דער אייבערשטער זאל העלפן איר זאלט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך

יום ד' פרשת ראה, כ"ו מנחם-אב, שנת תשפ"ה לפרט קטן

... תחי', תלמידה בית פיגא טבריה

איך פריי זיך צו הערן אז אין בית פיגא אין טברי' איז דא ליבשאפט צווישן די תלמידות, נאר דארט וואו עס איז דא ליבשאפט קען מען שפירן נשמת רבינו, דארט וואו מען האט זיך ליב שיינט די ליכטיגקייט פון די שכינה הקדושה. אז מען קוקט גוט זעט מען כל זמן עס איז דא צווישן א חבורה אנשי שלומינו ליבשאפט; א שול, א געגנט, א כולל, א כיתה אין א ישיבה - איז דארט דא א ליכטיגקייט, א זיסקייט.

נעם זיך פאר לכבוד דיין געבורטס טאג צו זאגן יעדן טאג די דרייצן אני מאמין'ס, דאס איז מסוגל צו שטארקן די אמונה. מוהרא"ש זאגט אז דער הייליגער צאנזער רב זכותו יגן עלינו פלעגט זאגן אפאר מאל א טאג די אני מאמין'ס מיט א גרויסע דביקות און ברען, דארפן מיר דאס זיכער זאגן כאטשיג איין מאל א טאג.

זאגט עס מיט די טייטש, אזוי וועט עס אריינגיין אין אייך, עס וועט ווערן איינגעקריצט טיף טיף אין די ביינער, איר וועט האבן א שטארקע אמונה.

די אני מאמין'ס טוט בארואיגן דעם מענטש; ווען מען זאגט די ווערטער: "אֲנִי מַאֲמִין בֶּאֱמוּנָה שְׁלֵמָה", איך גלייב מיט א שטארקע אמונה, "שֶׁהַבּוֹרֵא יִתְבָּרַךְ שְׁמוֹ הוּא בּוֹרֵא", אז דער אייבערשטער האט אלעס באשאפן, "וּמַנְהִיג לְכָל הַבְּרוּאִים", און דער אייבערשטער אליינס פירט דער וועלט, "וְהוּא לְבַדּוֹ עָשָׂה וְעוֹשֶׂה וְיַעֲשֶׂה לְכָל הַמַּעֲשִׂים", נאר ער האט אלעס געטון, ער אליין טוט אלעס און ער וועט טון אלעס.

דער אייבערשטער זאל העלפן איר זאלט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך

יום א' פרשת דברים, ב' מנחם-אב, שנת תשפ"ה לפרט קטן

טייערער ליבער ... נרו יאיר

וואויל איז דיר אז דו ביסט מקיים די מצוה פון כיבוד אב ואם, דו רופסט דיינע עלטערן יעדן טאג. ביים אייבערשטן איז זייער חשוב די מצוה פון כיבוד אב ואם, דער אייבערשטער זאגט (קידושין ל:): "בזמן שאדם מכבד את אביו ואת אמו, אמר הקדוש ברוך הוא, מעלה אני עליהם כאילו דרתי ביניהם וכבדוני", ווער עס איז מכבד טאטע מאמע איז אזוי ווי מען איז מיך מכבד; די מצוה פון כיבוד אב ואם איז אזוי גרויס, "הוקש כיבוד אב ואם לכבודו של מקום" (בבא מציעא לב.), עס איז די זעלבע זאך ווי מכבד זיין דעם אייבערשטן.

לכבוד דיין פיר און צוואנציגסטע געבורטס טאג זאלסטו זיך מקבל זיין צו טון וואס דער הייליגער רבי אלימלך זכותו יגן עלינו זאגט אין צעטל קטן (סעיף יא): "בחזרת הש"ץ השמונה עשרה", ווען דער בעל תפילה גייט איבער די שמונה עשרה, "יעיין בסידור", זאל מען אריינקוקן אין סידור; זיי זיך מקבל ביי הויכע שמונה עשרה אריינצוקוקן אין סידור.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום א' פרשת מטות מסעי, כ"ד תמוז, שנת תשפ"ה לפרט קטן

לכבוד מיין טייערער ... נרו יאיר

נעם זיך פאר לכבוד דיין געבורטס טאג נישט צו רעדן ביי קדיש, ביי קריאת התורה און ביי הויכע שמונה עשרה. אין אנהויב וועט דיר דאס זיין שווער, אבער נאך א קורצע צייט וועסטו שפירן ביים דאווענען אין שול א זיסע טעם, און די תפילות וואס דו בעטסט וועלן נתקבל ווערן.

איך ווינטש דיר לאנגע געזונטע יארן מיט נחת פון דיינע קינדער.

בעזרת ה' יתברך

יום ה' פרשת דברים, ד' מנחם-אב, שנת תשפ"ד לפרט קטן

מיין טייערער ... נרו יאיר

איך האב ערהאלטן דיין בריוו.

נעם זיך פאר לכבוד דיין געבורטסטאג צו רופן דיינע עלטערן יעדן טאג.

מען דארף נישט רעדן לאנג, מען דארף נישט שמועסן לאנג; רוף זיי יעדן טאג, דערצייל זיי עפעס א שיינע זאך פון דיין משפחה און אינטערעסיר זיך וואס זיי מאכן; דאס איז די שענסטע קבלה וואס דו זאלסט מאכן.

אמאל האט דער חזון איש זכותו יגן עלינו פארהערט קינדער, א קינד האט אויפגעהויבן די האנט ער וויל פרעגן א פראגע, דער חזון איש פרעגט אים: "וואס ווילסטו פרעגן?" זאגט דער אינגל: "ווי אזוי וואקסט מען אויף א חזון איש?" דער חזון איש האט זיך פארטראכט און זיך אנגערופן: "דורך די מצוה פון כיבוד אב ואם".

וואויל איז דעם וואס איז שטארק אין די מצוה, וועט ער זוכה זיין צו די וועלט און צו יענע וועלט.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ד' פרשת במדבר, כ"ח אייר, מ"ג לעומר, שנת תשפ"ד לפרט קטן

טייערער ... נרו יאיר

איך האב ערהאלטן דיין בריוו.

ביי אונז מאכט מען נישט קיין עסק פון די געבורטסטאג, נאר ווען מען איז עלטער, מען איז פארשטענדליך - ניצט מען אויס דעם טאג פאר א טאג פון תשובה, מען בארעכנט זיך 'וואו בין איך אויף דער וועלט? וואס טו איך און וואס קען איך מאכן נאך בעסער?' דאס איז ביי אונז א יום הולדת.

ביי די קינדער'ס געבורטסטאג פירט מען זיך אז די עלטערן וואונטשן אן דעם קינד ער זאל זיין פרייליך און ערליך, און מען העלפט דעם קינד טראכטן עפעס א גוטע קבלה זיך צו אונטערנעמען.

עס איז וויכטיג צו וויסן אז דער ענטפער איז נאר אז ביידע, סיי דער מאן און סיי די ווייב - ווילן הערן וואס דא שטייט, אבער אז די ווייב וויל יא מאכן א סעודה און זי ווארט אויף א מתנה, דאס איז ביי איר ממש א שטיק לעבן וכו' - דעמאלט קען מען מאכן אין שטוב פריוואט א סעודה און געבן א מתנה.

העיקר זאל זיין שלום מיט ליבשאפט.

בעזרת ה' יתברך

יום ד' פרשת חיי שרה, כ"ד מר-חשון, שנת תשפ"א לפרט קטן

לכבוד ... נרו יאיר.

איך האב ערהאלטן דיין בריוו.

די בעסטע זאך וואס דו קענסט טון אין דיין געבורטס טאג - איז דאנקען און לויבן דעם אייבערשטן; ווען מען דאנקט דעם אייבערשטן, מען לויבט דעם אייבערשטן - שפירט מען די טעם וואס צדיקים זענען זוכה צו שפירן אין גן עדן.

דער הייליגער רבי זאגט (ליקוטי מוהר"ן, חלק ב', סימן ב): "כִּי זֶה עִקָּר שַׁעֲשׁוּעַ עוֹלָם הַבָּא, לְהוֹדוֹת וּלְהַלֵּל לִשְׁמוֹ הַגָּדוֹל יִתְבָּרַךְ וּלְהַכִּיר אוֹתוֹ יִתְבָּרַךְ", די תענוג פון עולם הבא איז צו דאנקען דעם אייבערשטן און אים צו לויבן, וויסן אז אלעס איז ער און ער איז אלעס, "שֶׁעַל יְדֵי זֶה סְמוּכִים וּקְרוֹבִים אֵלָיו יִתְבָּרַךְ", ווי מער מען דאנקט דעם אייבערשטן איז מען נענטער צו אים, "כִּי כָּל מַה שֶּׁיּוֹדְעִין וּמַכִּירִין אוֹתוֹ יִתְבָּרַךְ בְּיוֹתֵר", ווייל ווי מער מען ווייסט אז אלעס איז בלויז דער אייבערשטער אליין, "סְמוּכִים אֵלָיו בְּיוֹתֵר", איז מען נענטער צו אים.

דער ריי"צ, דער פריערדיגער ליובאוויטשער רבי זכותו יגן עלינו ברענגט אין ספר היום יום (יא ניסן): "ביום ההולדת, על האדם להתבודד ולהעלות זכרונותיו ולהתבונן בהם, והצריכים תקון ותשובה - ישוב ויתקנם", אינעם געבורטס טאג זאל מען זיך מתבודד זיין און אריין טראכטן וואס מען דארף פאררעכטן פון די פריערדיגע יארן, לעבן מיט חשבון הנפש.

דער אייבערשטער זאל העלפן זאלסט האבן הצלחה אין אלע ענינים.