תוכן השאלה
לכבוד דער ראש ישיבה שליט"א,
איך האב געוואלט פרעגן דעם ראש ישיבה שליט"א וואס צו טון, איך האב באשלאסן אז איך טו גארנישט אליין מיט מיין שכל, איך פרעג יעדע זאך פונעם ראש ישיבה שליט"א וואס צו טון.
ש'כח אייבערשטער אז מיין טאטע האט מיר שוין געקויפט א טיקעט צו פארן קיין אומאן אויף ראש השנה, איך וויל אבער אביסל העלפן מיין טאטע וואס האט געדארפט קויפן טיקעטס אויך פאר זיך און פאר מיינע אנדערע ברידער. איך האב געוואלט פרעגן צי איך מעג גיין נאך געלט און זאגן אז איך נעם צוזאם צדקה פאר אן אנדערע צוועק, צום ביישפיל פאר הכנסת כלה, אזוי וועלן מענטשן געבן צדקה.
נאכאמאל א גרויסן יישר כח פאר אלע עצות און חיזוק וואס דער ראש ישיבה שליט"א געבט מיר כסדר.
יישר כח
תשובה מאת הראש ישיבה שליט"א:
יום ב' פרשת דברים, ג' מנחם-אב, שנת תשפ"ה לפרט קטן
לכבוד ... נרו יאיר
איך האב ערהאלטן דיין בריוו.
אז דו ווילסט צאמנעמען געלט פאר שפעזן צו פארן צום רבי'ן - זאלסטו זאגן דעם אמת; בעט מענטשן ווער עס וויל דיר העלפן אנקומען קיין אומאן אויף ראש השנה, וועסטו ביז א קורצע צייט האבן דיין גאנצע געלט.
מוהרא"ש זאגט בשם רבי לוי יצחק אז מען קען זאגן הכנסת כלה ווען מען נעמט צוזאם צדקה פאר שפעזן צו פארן קיין אומאן, עס איז נישט קיין ליגנט; דאס איז געווען אמאל ווען מענטשן האבן געמיינט אז ברסלב איז א פלאץ פאר משוגעים וכו', היינט צו טאגס נעמען אלע חיזוק פון רבי'ן, אלע חסידות'ן, אלע קהילות זענען זיך שטילערהייט מחי' מיט די חיזוק פון רבי'ן, אלע הערן זיך שטילערהייט צו צו די שיעורים, און אזויפיל אינגעלייט ווילן פארן קיין אומאן, זיי זענען נאך אין די קטנות פון זיין באהאלטן, און ווען זיי זעען איינעם קלייבן צדקה פאר אומאן געבן זיי גרויסע סכומים צו האבן א חלק אין די הייליגע נסיעה.
דער אייבערשטער זאל העלפן זאלסט האבן הצלחה אין אלע ענינים.