תוכן השאלה
לכבוד דער ראש ישיבה שליט"א,
איך האב געוואלט דערציילן פאר'ן ראש ישיבה שליט"א א גוטע בשורה, אז איך האב זיך היינט אפגעשוירן די האר פון קאפ.
דאס קומט נישט פון מיין משפחה, און אויך נישט פון מיין מאנ'ס משפחה, ביי זיי איז גאר דא א פארקערטע ענין, דוקא זיך נישט צו שערן.
איך האב געהערט אזויפיל ווי דער ראש ישיבה שליט"א רעדט פון דעם, שרייבט פון דעם, איך האב אבער געווען זיכער עס גייט נישט קיינמאל געשען ביי מיר. אין אנהויב האב איך נאר געהערט, א צייט שפעטער האב איך שוין אנגעהויבן בעטן דעם אייבערשטן אז איך זאל עס וועלן טון, נאך שפעטער האב איך שוין געוואלט עס טון און איך האב שוין אנגעהויבן בעטן אז איך זאל מצליח זיין עס צו טון, מיין מאן האט מיר נישט געזאגט ניין אבער אויך נישט געזאגט יא, עס איז מיר געווען זייער זייער שווער עס צו טוהן. אבער יישר כח אייבערשטער אז איך האלט שוין דערנאך.
ווי נאר איך האב געענדיגט זיך אפשערן, האבן מיינע ליפן נישט אויפגעהערט צו דאווענען און בעטן דעם באשעפער אויף אלעס וואס איז מיר ארויס פון מויל צעמישט. אן וויסן וואס מיין מאן גייט זאגן, און ווי אזוי גיי איך פילן.
ביים צוזאמנעמען די האר אין א זעקל, האב איך געזאגט, "באשעפער, איך לייג אריין דא אלע קליפות פון מיר און פון מיין מאן און פון אלע, איך לייג דא אריין תימן, איראן, איראק און אלע שונאי ישראל, אז זיי זאלן נישט האבן קיין שליטה אויף אונז, עס זאל מער נישט זיין קיין מלחמות.
איך האב געקוקט אויף די האר און געזאגט, "אייבערשטער, דאס איז א קרבן פאר דיר! אייבערשטער, איך האב נאך אין מיין לעבן נישט געפילט אז איך בין מקריב אזא שווערע קרבן אזוי ווי יעצט, עס איז נאר פאר דיר, און אין דעם זכות זאלן מיר אינגיכן הערן דעם שופר של משיח און תשעה באב זאל ווערן צו א יום טוב, איך זאל האבן שלום בית, א רפואה אויף מיינע אויגן, א רפואה אויף מיינע פחדים, איך מיט מיין מאן זאלן זיך ליב האבן, איך זאל נישט האבן קיין פחדים, נישט האבן קיין לחצים, האבן פרנסה בריווח, אפצאלן חובות, האבן נאר אידיש נחת פון אלע קינדער, און האבן נאך קינדער גרינגערהייט און געזונטערהייט, הייליגע געזונטע לעכטיגע דורות, יראי ה' מיט גוטע מידות, היטן און לערנען די הייליגע תורה, אלע רפואות, געזונט, און אזוי ווייטער און ווייטער.
איך וויל נאר בעטן א ווארעמע ברכה פונעם ראש ישיבה שליט"א.
יישר כח
תשובה מאת הראש ישיבה שליט"א:
יום ב' פרשת דברים, ראש חודש מנחם-אב, שנת תשפ"ד לפרט קטן
מרת ... תחי'
איך האב ערהאלטן אייער בריוו.
אלע ברכות וואס דער הייליגער תנא האלוקי רבי שמעון בר יוחאי וואונטשט פאר די פרויען וואס שערן זיך אפ זייער האר, זאלן קומען צו אייך, און אלע ישועות וואס די צדיקים האבן צוגעזאגט פאר די נשים צדקניות וואס שערן זיך זייער האר זאלן קומען צו אייך.
מען קען זיך נישט פארשטעלן דאס גרוסקייט פון זיך אפשערן די האר, דער זוהר הקדוש זאגט (נשא קכה:): "תּוּנְבָא לֵיתֵי" א קללה זאל קומען, "עַל הַהוּא בַּר נָשׁ" אויף דעם מענטש, "דְּשָׁבַק לְאִנְתְּתֵיהּ" וואס לאזט זיין ווייב, "דְּתִתְחַזֵי מִשַׂעֲרָא דְּרֵישָׁה לְבַר" אז איר האר פון קאפ זאל זיך ארויסזען. "וְדָא הוּא חַד מֵאִינּוּן צְנִיעוּתָא דְּבֵיתָה" און דאס איז פון די יסודות פון א אידישע שטוב, אז מען זאל נישט זען די האר פון די פרוי. "וְאִתְּתָא דַּאֲפִּיקַת מִשַׂעֲרָא דְּרֵישָׁה לְבַר" און א פרוי וואס גייט מיט אויפגעדעקטע האר, "לְאִתְתַּקְּנָא בֵּיהּ" זיך שיין צו מאכן, "גָּרִים מִסְכְּנוּתָא לְבֵיתָא" איז זי גורם אז עס זאל זיין ארעמקייט אין שטוב, "וְגָרִים לִבְנָהָא דְּלָא יִתְחַשְּׁבוּן בְּדָרָא" און זי איז גורם אז אירע קינדער וועלן נישט מצליח זיין און זיי וועלן נישט זיין חשוב, "וְגָרִים מִלָּה אַחֲרָא דְּשַׁרְיָא בְּבֵיתָא" אזוי אויך איז זי איז גורם אז דער סמ"ך מ"ם און די נישט גוטע זאלן זיין אין איר שטוב, "מַאן גָּרִים דָּא" ווער איז דאס אלעס גורם? "הַהוּא שַׂעֲרָא דְּאִתְחֲזֵי מֵרֵישָׁהּ לְבַר" די פרוי וואס איר האר זעט זיך ארויס; און פארשטייט זיך אז פארקערט איז נאך מער, א פרוי וואס געבט אכטונג אז אירע האר זאל זיך נישט ארויסזען, זי שערט זיך די האר - וועט זי האבן אלע ברכות, און זי וועט האבן נחת פון אירע קינדער.
אזוי ווי איר שרייבט - אזוי איז, יעדעס מאל ווען די פרוי שערט זיך די האר - איז זי מקריב א קרבן פארן אייבערשטן; זי קען דעמאלט בעטן פאר זיך און פאר אנדערע, זי קען פועל'ן ישועות און רפואות פאר גאנץ כלל ישראל.
דער אייבערשטער זאל העלפן איר זאלט האבן הצלחה אין אלע ענינים.