בעזרת ה' יתברך
יום ה' פרשת בהעלותך, ט"ז סיון, שנת תשפ"א לפרט קטן
לכבוד מיין טייערער ... נרו יאיר, קרית ברסלב
וואויל איז דיר און וואויל איז דיין חלק אז דו לייגסט אריין אין דיינע קינדער די הייליגע עבודה פון התבודדות; דו גייסט מיט זיי אין פעלד, דו מאכסט מיט זיי התבודדות, דו לערנסט זיי אויס ווי אזוי צו דאנקען דעם אייבערשטן אויף יעדע פרט און פרט.
איך האב דערציילט פאריגע וואך שבת פאר די אינגעלייט אין שטעטל דיין הנהגה, אז דו גייסט מיט דיין זון אין פעלד, דו זעצט זיך אוועק אויף די גראז מיט אים און דו דאנקסט דעם אייבערשטן מיט אים אויף אלעס. דו הייבסט אן ביים קאפל, דו דאנקסט דעם אייבערשטן: "יישר כח אייבערשטער איך האב א קאפל, האר און א קאפ; אויערן, נאז, מויל, באקן, פיאות", און אזוי ווייטער; די אינגעלייט זענען זייער נתעורר געווארן פון דעם, עטליכע האבן מיר געשריבן אז זיי האבן דאס אנגעהויבן טון מיט זייערע קליינע קינדער.
דער אייבערשטער זאל העלפן אז אלע משפחות אין שטעטל זאלן אזוי טון, די גאנצע שטעטל האט נאר די איין מעלה, אז מען קען לעבן מיט'ן אייבערשטן. די קינדער וואקסן אויף מיט אמונה, די מלמדים און טיטשערס פילעווען אמונה, די לופט איז ריין; נישטא קיין הסתכלות אסורות.
וואויל איז דער וואס נוצט אויס די פלאץ אויף גוטע זאכן.