בעזרת ה' יתברך - יום א' פרשת וארא, כ"ב טבת, שנת תשפ"ו לפרט קטן
... נרו יאיר
אז דו האסט די זכי' צו לערנען מיט בני הנעורים, דו רעדסט צו זיי פון מידות טובות און פון יראת שמים – זאלסטו געדעקנען דעם דיבור וואס דער רבי האט געזאגט פאר מוהרנ"ת: "ווען דו ביסט מחדש חדושי תורה און דו קומסט אן צו די צוויי זאכן, 'אמונה' אדער 'צדיק' – זאלסטו אויסברייטערן דיין פענע"; זאלסט מער אויסשמועסן די צוויי זאכן, ווייל אויף די צוויי זאכן "אמונה" און "אמונת חכמים" דארף מען האבן אסאך חיזוק.
דערפאר בעט איך דיר, אז דו רעדסט מיט בני הנעורים, דו ביסט זיי מחזק, דו לערנסט זיי אויס די וועג פון לעבן – זאלסטו אסאך רעדן פון אמונה; מען זאל וויסן און געדענקען אז אלעס איז פונעם אייבערשטן, א שאד זיך צו אויפרעגן און נערוועז ווערן ווען אלעס האט א פלאן פונעם אייבערשטן, קיין שום זאך ווערט נישט געטון פון זיך אליינס, אדער פון מענטשן, אלעס אלעס איז דער אייבערשטער, און אויך זאלסטו מחזק זיין די יוגנט אויף אמונת חכמים; פאלגן וואס א צדיק זאגט, דא רעדט מען נישט פון א רבי מיט א קאלירטע בעקיטשע וכו', דא רעדט מען פון א צדיק וואס פירט מיך צו לעבן מיט די תורה, צו לערנען, און צו אמונה, און צו האבן א זיס לעבן וכו' וכו'.