בעזרת ה' יתברך - יום ג' פרשת תרומה, שובבי"ם, ד' אדר א', שנת תשפ"ד לפרט קטן
לכבוד מיין טייערע ... נרו יאיר, קרית ברסלב
א גרויסן יישר כח פארן אהערשטעלן אזא באקוועמע געשמאקע גראסערי פאר אנשי שלומינו פאר א גאנץ יאר, די גאנצע שטעטל איז זיך זייער מחי' און יעדער דאווענט פאר דיין הצלחה.
איך בעט דיר זאלסט דן זיין לכף זכות אלע אנשי שלומינו, אפילו די וואס קויפן נישט איין ביי דיר און זיי קומען נאר מיט טענות, דאס פעלט, און דאס דארף ער ביליגער; זיי דן לכף זכות אלעמען, קיינער וויל נישט זיין שלעכט, קיינער איז נישט שלעכט, עס גייט איבער אויף יעדן איינעם, עס איז דא וואס האבן עניות ודחקות און זיי האלטן שוין ביי מעבירין דעתו של אדם.
איך האף דו וועסט זיך דערהאלטן, דו וועסט קיינעם נישט וויי טון אדער חס ושלום פארשעמען, וסוף הכבוד לבוא. געב זיך איבער צום אייבערשטן, שפאציר אין די געשעפט מיט התבודדות ותפילה, גיי ארום צווישן די איילס און זינג צום אייבערשטן, דאנק און לויב אים, און טו קיינעם נישט וויי.
זיי דו דער וואס בארואיגט און רעדט שיין צו יעדעם, און אז עס ווערט א שמועס פון ווייטאג, דער איז פארווייטאגט אז מען נעמט אים נישט צו שארן די שניי, און א צווייטער עסט זיך אז מען קויפט נישט די פיש ביי אים – זאלסטו נישט זיין דער וואס גיסט אויל און זאגן 'און ער קויפט נישט ביי מיר וכו'', נאר דו גיס וואסער, לעש אויס אלע שמועסן ווי מען בארעדט מענטשן.