בעזרת ה' יתברך - יום ד' פרשת בחוקותי, כ"א אייר, ל"ו לעומר, שנת תשפ"ד לפרט קטן
מרת ... תחי', קרית ברסלב
התקרבות לצדיק מיינט יעדן טאג רעדן צום אייבערשטן; זיך אראפנעמען א מינוט, צוויי מינוט, דריי מינוט - און זיך אויסשמועסן דאס הארץ מיטן אייבערשטן, אים דערציילן אלעס וואס גייט אריבער, די נסיונות, די מידות רעות און די פלאקערדיגע תאוות, ווי שטארק מען וויל זיין גוט און ווי שווער די מלחמה איז; נאר דאס איז התקרבות לצדיק, אלעס אנדערש איז טשאדעלע באדעלע.
וועגן דאס אז עס גייט אייך נישט אן צניעות אזוי ווי אמאל וכו' וכו'; זאלסטו בעטן דעם אייבערשטן: "הייליגער באשעפער העלף מיר איך זאל האבן א געפיל אין צניעות, הייליגער באשעפער זיי מיך מקרב צו דיר, העלף מיר איך זאל געדענקען אז באלד גיי איך צו די שיינע וועלט, צו די אייביגע וועלט, איך וועל דארט זיצן מיט אלע צדיקים און צדקניות, איך זאל נישט פארשעמט ווערן"; אזוי זאלט איר בעטן דעם אייבערשטן, וועט צוריק קומען די געפיל.
בנוגע ארויסקומען פון שטוב מיט שטוב קליידער; דאס דארף מען וויסן, עס זיצט א אינגערמאן אויפן באס און אים איז שוין אזוי אויך גענוג שווער, דארף מען אכטונג געבן אים נישט שווערער מאכן, אויף דעם גייט ארויף די כלל (שבת לא.): "דְּעַלָּךְ סָנֵי, לַחֲבֵרָךְ לָא תַעֲבֵיד", איר וואלט דאך נישט געוואלט איינער זאל אויסרייסן אייער מאנ'ס אויגן אז ער זאל באקומען שלעכטע געדאנקען פון טראכטן פון אנדערע, דארף מען אכטונג געבן נישט גיין מיט שטוב קליידער נאר אין שטוב פריוואט פארן מאן.
דער אייבערשטער זאל העלפן איר זאלט האבן הצלחה אין אלע ענינים.