בעזרת ה' יתברך - יום א' פרשת חיי שרה, ט"ז מר-חשון, שנת תשפ"ה לפרט קטן
לכבוד מיין טייערער ... נרו יאיר
דיין עבודת השם איז – געבן א שמייכל און א גוט ווארט פאר יעדן איינעם וואס קומט אריין אין געשעפט, און אזוי אויך וועם דו באגעגנסט אין שול וכדומה.
וואלסטו געוואוסט וואס גייט אריבער אויף מענטשן, וואס פאר א ביטערנישן, וואס פאר א ווייטאג – השם ירחם, און מיט איין שמייכל, מיט איין גוטע ווארט – קען מען זיי אזוי מחי' זיין.
לאז זיך נישט צעברעכן פונעם יצר הרע וואס האקט דיר אין קאפ אז דו ביסט גארנישט ווערד, דו טו וואס דער רבי האט אונז געזאגט, דער רבי זאגט (שיחות הר"ן, סימן מג) מיר זאלן שמייכלען צו יעדן און באגרוסן יעדן איינעם, אזוי ווי די הייליגע חכמים זאגן (תענית כב.) פון די תְּרֵי בַּדְחֵי, "וּלְהַחֲיוֹת אָדָם אֵינוֹ דָּבָר רֵק".
דאס איז דיין זאך, דאס איז דיין תיקון, דאס איז דיין עבודת השם, געב יעדן א שמייכל, געב יעדן א גוט ווארט, בפרט פאר אנשי שלומינו, אויף זיי גייט איבער נאך מער, בבחינת (סוכה נב.): "כָּל הַגָדוֹל מֵחֲבֵירוֹ יִצְרוֹ גָדוֹל הֵימֶנוּ". זיי יעדן דן לכף זכות, פיר נישט מיט קיינעם קיין חשבונות, מיט קיינעם; רעד איידל, רעד שיין – וועסטו אלעס פאררעכטן, דו וועסט זוכה זיין צו עולם הבא.
ליין איבער די בריוו יעדע שבת.