בעזרת ה' יתברך - יום א' פרשת נצבים וילך, י"ז אלול, שנת תשפ"ו לפרט קטן
... נרו יאיר
נאך א יאר איז אריבער, מיר גייען שוין זאגן סליחות; ווען מען זאגט סליחות און מען גייט נאכאמאל זאגן די י"ג מידות של רחמים זאלסטו זיך זייער פרייען און זיך אויפוועקן מיט א געשמאק צו זאגן די דרייצן מידות של רחמים, ווייל די הייליגע חכמים זאגן (ראש השנה יז:): "ברית כרותה לי"ג מדות שאינן חוזרות ריקם", דער אייבערשטער האט געמאכט א בונד אז ווען אידן זאגן די דרייצן מידות של רחמנים נעמט מען אן זייער געבעט; דערפאר, יעדע מאל ווען מען זאגט: "קֵל הוֹרֵיתָ לָּנוּ לוֹמַר שְׁלשׁ עֶשְׂרֵה, וּזְכָר לָנוּ הַיּוֹם בְּרִית שְׁלשׁ עֶשְׂרֵה" וכו', - זאלסטו דאס זאגן מיטן ספעציעלן תנועה און מיט די גאנצע הארץ, און דו זאלסט תשובה טון, זאלסט זיך מקבל זיין אז: 'גענוג איז גענוג, עד כאן, איך גיי מער נישט טון קיין עבירות', און זאג צו פארן אייבערשטן אז דו גייסט מער נישט צוריק גיין צו דיינע אלטע נישט גוטע מעשים, דו גייסט שוין זיין גוט, און בעט אים ער זאל דיר פארשרייבן א שנה טובה, א גוטע יאר, א יאר פון לערנען תורה יעדן טאג, א יאר פון דאווענען יעדן טאג די דריי תפילות שחרית, מנחה און מעריב, א יאר פון עוסק זיין אין טון חסד און העלפן בויען מוסדות התורה, חדרים, ישיבות, כוללים.
וויסן זאלסטו, אויך א גאנץ יאר קען מען בעטן דעם אייבערשטן און פועל'ן וואס מען דארף פועל'ן, אבער ווען עס קומען די הייליגע טעג פון סליחות, און ווייטער, די ימים נוראים – דעמאלט איז אן עת רצון, דעמאלט קען מען פועל'ן וואס מען קען א גאנץ יאר נישט פועל'ן; וואויל איז דעם מענטש וואס ניצט אויס די טעג מיט תשובה ותפילה, וועט ער האבן א שנה טובה ומבורכת.
א כתיבה וחתימה טובה.