בעזרת ה' יתברך
יום ב' פרשת שמיני א', י"ב ניסן, שנת תשפ"ג לפרט קטן
לכבוד מיין ליבער ... נרו יאיר
איך האב ערהאלטן דיין בריוו.
ווען דו האסט ווייטאג, דו גייסט אריבער שווערע טעג - זאלסטו זאגן דעם פסוק (תהלים כה, יח): "רְאֵה עָנְיִי וַעֲמָלִי וְשָׂא לְכָל חַטֹּאותָי", מיט דעם וועט נמתק ווערן פון דיר אלע דינים.
קוק אריין בספר שאלות ותשובות ברסלב, איינער שרייבט פאר מוהרא"ש אז ער האלט מער נישט אויס זיינע יסורים. ענטפערט אים מוהרא"ש ער זאל זיך שטארקן מיט אלע כוחות און מוהרא"ש זאגט אים א שטארקע סגולה: "ויהיה הפסוק הזה שגור על פיך תמיד", דעם פסוק זאלסטו שטענדיג זאגן: "'רְאֵה עָנְיִי וַעֲמָלִי וְשָׂא לְכָל חַטֹּאותָי' (תהלים כה, יח), וזה מסוגל מאד להמתקת הדינים", דאס איז א סגולה אוועק צו נעמען די דינים, "כי באמירת הפסוק הזה הוא מצדיק עליו את הדין ומקבל הכל באהבה", ווייל מיטן זאגן דעם פסוק ווייזט ער אז ער נעמט אויף זיך אלעס וואס דער אייבערשטער טוט - מיט ליבשאפט און ער ווייזט אז ער האט נישט קיין טענות אויפן אייבערשטן, "ובזה בעצמו נמתק ממנו הדין והצרות שעוברים עליו, ונתהפך הכל לאהבה ולחסד גדול", און מיט דעם וועלן אוועקגיין אלע דינים.
דער אייבערשטער זאל העלפן מיר זאלן שוין זוכה זיין צו (פסחים קטז:): "וְנֹאכַל שָׁם מִן הַזְּבָחִים וּמִן הַפְּסָחִים"; און צו (מיכה ז, טו): "כִּימֵי צֵאתְךָ מֵאֶרֶץ מִצְרָיִם אַרְאֶנּוּ נִפְלָאוֹת", אמן.