בעזרת ה' יתברך - יום א' פרשת בהר, י"א אייר, כ"ו לעומר, שנת תשפ"ד לפרט קטן
מרת ... תחי', קרית ברסלב
איך האב ערהאלטן אייער מעסעדזש.
די פרוי מרת ... תחי' האט איין גרויסע פראבלעם, זי איז נישט פרייליך; דאס מאכט איר טראכטן שלעכט אויף איר מאן, ווען באמת איז דער אינגערמאן א טייערע גאלדענע מענטש, זי האט א טייערע מאן, ער איז א פרייליכער, ער האט איר נאך קיינמאל נישט וויי געטון, ער האט נאר מעלות.
דאס וואס שטערט איר אז ער האט מער טראסט אין זיינע עלטערן ווי אין איר, דאס איז נישט זיין פראבלעם; מען דארף איר לערנען אז פריוואטע זאכן צווישן איר און איר מאן - דערציילט מען נישט פאר קיינעם, און אז זי וועט וויסן וואס מען רעדט יא און וואס נישט - וועט ער איר דערציילן אלעס, און צוביסליך באקומען א טראסט.
איך בעט אייך זייער, רעדט צו די פרוי, זייט איר מחזק, עס פעלט איר נאר די איין זאך, עס פעלט איר שמחה; וואלט זי געווען פרייליך - וואלט אלעס געווען הערליך. אסאך פרויען וואלטן זיך געווינטשן צו האבן אזא ערליכער מאן, א ירא שמים, מיט גאלדענע מידות וכו' וכו', אלעס אנדערש איז נארישקייטן; בעט איך אייך זייער איר זאלט רעדן צו איר און איר מחזק זיין זי זאל זיין פרייליך.
עס איז זייער א גרויסע מצוה צו מחזק זיין ווייבלעך וואס האלטן ביים אנהויב פון בויען זייער שטוב, זייער לעבן; זיי זאלן נישט ווערן אויסער זיך אויב דער מאן איז נישט פינקט ווי זייער חלום איז, זיי זאלן קוקן אויף די עיקרים אין לעבן; אויף יראת שמים און אויף דאס גוטס.
בזכות וואס מען טוט פארן אייבערשטנ'ס קינדער איז מען זוכה צו האבן נחת ביי די אייגענע קינדער.
דער אייבערשטער זאל העלפן איר זאלט האבן הצלחה אין אלע ענינים.