בעזרת ה' יתברך
יום ה' פרשת תזריע מצורע, כ"ט ניסן, שנת תשפ"ג לפרט קטן
... תחי', צפת
איך האב ערהאלטן אייער בריוו.
אז איר האט מורא פון הינט - זאלט איר זיך חזר'ן די ווערטער: "דער אייבערשטער איז מיט מיר, דער אייבערשטער איז דא, ער היט מיך, קיינער קען מיר גארנישט טון"; דאס וועט אייך געבן כח און אוועק נעמען די מורא.
ווען מען זעט א הונט און מען שרעקט זיך - איז נישט גוט אוועק צו לויפן, דאס צעטומלט די הינט און זיי קענען ווערן ווילד. מען דארף בלייבן שטיין און גיין ווייטער ווי מען גייט, און זיך חזר'ן 'אין עוד מלבדו'.
אויב מען האט מורא פון הינט - מיינט דאס נישט אז מען האט נישט קיין אמונה, מען האט אמונה אבער מען קען האבן שטערקער און שטערקער אמונה; אמונה איז א זאך וואס גייט אן קיין שיעור, ווי מער מען חזר'ט זיך 'ממלא כל עלמין וסובב כל עלמין', און ווי מער מען בעט דעם אייבערשטן אויף אמונה - אלץ שטערקער ווערט די אמונה.
בעטס יעדן טאג די תפילה:
"רבונו של עולם, העלף מיר איך זאל האבן א שטארקע אמונה, איך זאל נישט פארגעסן פון דיר, איך זאל נאר טראכטן פון דיר, איך זאל שטענדיג שפירן ווי דו ביסט מיט מיר. הייליגער באשעפער העלף מיר איך זאל נישט מורא האבן פון קיינעם, איך זאל נישט מורא האבן פון חיות, נישט מורא האבן פון הינט. איך זאל וויסן אז אלעס ביסטו, עס איז גארנישט דא אויף די וועלט אויסער דיר; דומם, צומח, חי און מדבר - הכל לכל איז עצם עמציות חיות אלוקותו יתברך, עס איז ממלא כל עלמין וסובב כל עלמין, אין שום מציאות מבלעדיך כלל, ובכל תנועה ותנועה שם אלופו של עולם".
דער אייבערשטער זאל העלפן איר זאלט האבן הצלחה אין אלע ענינים.