בעזרת ה' יתברך - יום ב' פרשת מקץ, כ"ב כסליו, שנת תשפ"ה לפרט קטן
מיין טייערער ליבער הארציגער ... נרו יאיר
היט די הלכות פון טהרת המשפחה, מען מוז היטן די הלכות, און אז דיין ווייב וויינט וכו' - זאלסטו ווייטער בלייבן היטן די הלכות; וויינען איז נישט שטערקער פון די תורה. אויב מען היט די הלכות בלייבט די שטוב גאנץ, און אויב נישט, גט מען זיך ביים סוף חס ושלום.
ווען דו ביסט געווען ביי מיר מיט דיין ווייב און דערציילט וכו' - האב איך זיך זייער דערשראקן, ווייל איך ווייס וואס דער סוף איז אויב מען היט נישט קיין הלכות, די תורה זאגט (ויקרא יח, כט): "וְנִכְרְתוּ", מען ווערט פארשניטן פון די וועלט און פון יענע וועלט.
די הייליגע חכמים זאגן (שבת יג.), אליהו הנביא האט דערציילט: "מַעֲשֶׂה בְּתַלְמִיד אֶחָד שֶׁשָּׁנָה הַרְבֵּה וְקָרָא הַרְבֵּה וְשִׁמֵּשׁ תַּלְמִידֵי חֲכָמִים הַרְבֵּה, וּמֵת בַּחֲצִי יָמָיו", עס איז געווען א מענטש וואס האט זייער פלייסיג געלערנט און ער איז געשטארבן זייער יונג, זיין ווייב האט דאס נישט אויסגעהאלטן, זי האט אנגעהויבן ארומלויפן צו אלע שולן און ישיבות און געפרעגט, ווי אזוי קען זיין אז מיין מאן איז געשטארבן יונג, עס שטייט דאך אין די תורה (דברים ל, כ): "כִּי הוּא חַיֶּיךָ וְאֹרֶךְ יָמֶיךָ", ווער עס לערנט תורה וועט לאנג לעבן, מיין מאן האט געלערנט אסאך תורה - חומש, משניות און גמרא, פארוואס איז ער נפטר געווארן אזוי יונג?! "וְלֹא הָיָה אָדָם מַחֲזִירָהּ דָּבָר", און קיינער האט נישט געוואוסט וואס איר צו ענטפערן, איינמאל - דערציילט אליהו הנביא - בין איך איינגעשטאנען ביי די פרוי און זי האט מיר דערציילט די גאנצע מעשה, און האב איך איר געפרעגט: "איר האט געהאלטן טהרת המשפחה?" האט זי געענטפערט: "אוודאי האבן מיר געהאלטן טהרת המשפחה", האט איר אליהו הנביא אויסגעפרעגט פינקטליך צי זי קען די הלכות פון טהרת המשפחה, ביז זי האט מודה געווען אז איר מאן האט נישט אכטונג געגעבן אויף די הלכות אין די שבעה נקיים; האט אליהו הנביא איר געזאגט: "בָּרוּךְ הַמָּקוֹם שֶׁהֲרָגוֹ", געלויבט איז דער אייבערשטער אז ער האט אים גע'הרג'עט, ווייל אין די תורה שטייט (ויקרא יח, יט): "וְאֶל אִשָּׁה בְּנִדַּת טֻמְאָתָהּ לֹא תִקְרַב".
טו תשובה, און זע צו פארן מיט דיין ווייב קיין אומאן צום רבינ'ס ציון און זאגן דארט די תיקון הכללי, און מהיום והלאה זאלסטו זיין פעלזן פעסט צו היטן די הלכות.