בעזרת ה' יתברך - יום ד' פרשת וזאת הברכה א', צווייטע אות פון שם הוי"ה, י"ב תשרי, שנת תשפ"ז לפרט קטן
... נרו יאיר
זאגסט מיר שטענדיג איך זאל דיר זאגן מוסר, איך זאל דיך אויסבעסערן וכו'; איך וויל דיר זאגן, עס האט מיר זייער פארדראסן צו זען ווי דו האסט געברענגט ביכער אין שול צו האבן וואס צו טון א גאנץ יום הקדוש; איך האב עס נישט געקענט גלייבן, אז מען קומט לכתחילה צוגעגרייט נישט אויסצוהערן און מיט דאווענען, נאר זיצן מיטן טלית און קיטל נאר לפנים, עס זאל אויסזען ווי מען איז א וואוילער וואס זיצט אין שול, און אונטערן טלית ליינען ביכער השם ירחם, און פארדעם וואלסטו נישט געדארפט איבערלאזן דיין ווייב און קומען צו מיר, דאס איז נישט ריכטיג.
מילא מען פארקוקט זיך אין א ספר, מילא מען פארקוקט זיך אין בריוו פון מוהרא"ש, אשר בנחל – איז אויך יום הקדוש, און מען דארף דאווענען און אויסהערן דאס דאווענען; אבער ברענגען לכתחילה ביכער און נאך זיין א (מזכה) את השכנים, געבן פאר בחורים און אינגעלייט צו ליינען – דאס איז נישט ריכטיג.
מער פון דעם האב איך דיר נישט וואס צו זאגן.