בעזרת ה' יתברך - יום א' פרשת ואתחנן, ה' מנחם-אב, שנת תשפ"ו לפרט קטן
לכבוד ... נרו יאיר
איך האב ערהאלטן דיין בריוו.
איך בין זייער דערשראקן צו הערן אז דו ביסט נכשל געווארן אין די גרויסע עבירה פון נדה וכו'; דאס ווייסטו אוודאי, אז אויף די עבירה באקומט מען כרת, די הייליגע חכמים זאגן (שבת יג.), אליהו הנביא האט דערציילט: "מַעֲשֶׂה בְּתַלְמִיד אֶחָד שֶׁשָּׁנָה הַרְבֵּה וְקָרָא הַרְבֵּה וְשִׁמֵּשׁ תַּלְמִידֵי חֲכָמִים הַרְבֵּה, וּמֵת בַּחֲצִי יָמָיו", עס איז געווען א מענטש וואס האט זייער פלייסיג געלערנט און ער איז געשטארבן זייער יונג, זיין ווייב האט דאס נישט אויסגעהאלטן, זי האט אנגעהויבן ארומלויפן צו אלע שולן און ישיבות און געפרעגט, ווי אזוי קען זיין אז מיין מאן איז געשטארבן יונג, עס שטייט דאך אין די תורה (דברים ל, כ): "כִּי הוּא חַיֶּיךָ וְאֹרֶךְ יָמֶיךָ", ווער עס לערנט תורה וועט לאנג לעבן, מיין מאן האט געלערנט אסאך תורה - חומש, משניות און גמרא, פארוואס איז ער נפטר געווארן אזוי יונג?! "וְלֹא הָיָה אָדָם מַחֲזִירָהּ דָּבָר", און קיינער האט נישט געוואוסט וואס איר צו ענטפערן, איינמאל - דערציילט אליהו הנביא - בין איך איינגעשטאנען ביי די פרוי און זי האט מיר דערציילט די גאנצע מעשה, און האב איך איר געפרעגט: "איר האט געהאלטן טהרת המשפחה?" האט זי געענטפערט: "אוודאי האבן מיר געהאלטן טהרת המשפחה", האט איר אליהו הנביא אויסגעפרעגט פינקטליך צי זי קען די הלכות פון טהרת המשפחה, ביז זי האט מודה געווען אז איר מאן האט נישט אכטונג געגעבן אויף די הלכות אין די שבעה נקיים; האט אליהו הנביא איר געזאגט: "בָּרוּךְ הַמָּקוֹם שֶׁהֲרָגוֹ", געלויבט איז דער אייבערשטער אז ער האט אים גע'הרג'עט, ווייל אין די תורה שטייט (ויקרא יח, יט): "וְאֶל אִשָּׁה בְּנִדַּת טֻמְאָתָהּ לֹא תִקְרַב".
טו תשובה, און נעם מסכת כריתות און זיי דאס גורס איינמאל און נאכאמאל, ביז דו וועסט דאס ענדיגן הונדערט און איין מאל. ווייל די הייליגע צדיקים האבן מגלה געווען אז לערנען מסכת כריתות איז א תיקון אויב חס וחלילה מען איז אריינגעפאלן אין עבירות וואס דער עונש אויף דעם איז כרת.
איך בעט דיר זייער, געב אכטונג צו היטן אלע הלכות פון הרחקות, זייער אכטונג געבן אויף יעדע הלכה, און נאר אזוי וועלן ענק זוכה זיין צו האבן געזונטע קינדער, געזונט פיזיש און געזונט גייסטיש, נאר אז מען היט די הלכות האט מען הייליגע קינדער.
אויך זאלסטו שוין באשטעלן א טיקעט צו קומען צום הייליגן רבי'ן קיין אומאן אויף ראש השנה הבא עלינו לטובה. ווייל דער הייליגער רבי האט מבטיח געווען מיט צוויי עדים אז דער וואס וועט קומען צו זיין ציון און זאגן די תיקון הכללי, די צען קאפיטלעך תהילים [קאפיטל טז, לב, מא, מב, נט, עז, צ, קה, קלז, קנ], "אֲפִילוּ אִם עָצְמוּ וְגָבְרוּ חֲטָאָיו וּפְשָׁעָיו" וועט ער אים מתקן זיין, און ער וועט אים ארויסנעמען פון שאול תחתית (חיי מוהר"ן, סימן רכה); נאך האט דער רבי געזאגט (שם, סימן תו), אז אפילו דעם וועם ער קען נישט העלפן א גאנץ יאר - זאל קומען ראש השנה קיין אומאן, ווייל ראש השנה קען ער יעדן איינעם מתקן זיין; זאלסטו שוין מאכן א טיקעט און אויסרעכענען די פלענער ווען צו פארן און מיט וועמען צו פארן. ווען דו וועסט קומען קיין אומאן זאלסטו גיין אין מקוה און גלייך גיין צום ציון און זאגן די צען קאפיטלעך, און זיך אויסוויינען ביים ציון פון רבי'ן, וועט דיך דער רבי מתקן זיין.
דער אייבערשטער זאל העלפן זאלסט האבן הצלחה אין אלע ענינים.