בעזרת ה' יתברך - יום ד' פרשת בהעלותך, ט"ו סיון, שנת תשפ"ה לפרט קטן
לכבוד ... נרו יאיר
לאז שוין אפ יענעמ'ס רוחניות, ווער האט דיך געפרעגט? ווער האט דיך געבעטן זוכן חסרונות ביי אנדערע? אנשי שלומינו זאגן: "אז דו ווילסט יענעם העלפן זאלסטו יענעם העלפן אין זיין גשמיות, זוך יענעם א פרנסה, זוך יענעם א דירה, און זיי פארנומען מיט דיינע אייגענע חסרונות".
שוין דא א מלאך המוות וואס טויטעט און הרג'עט די גאנצע וועלט, מען דארף נישט נאך איינס; אנשטאט פארברענען מענטשן - זאלסטו קוקן גוט אויף יעדן איינעם. קומסט אין שול - זאלסטו זוכן דאס גוטס ביי אלעמען, און אנשטאט ציילן ווער עס איז שוין אוועק געגאנגען פון היכל הקודש און ווער עס גייט היינט אוועק פון היכל הקודש - זאלסטו זיך נאכקוקן אויב דו ביסט יא מקורב...
וואס גייט דיר אן ווער עס גייט אוועק פון היכל הקודש און ווער עס גייט אוועק פון שטעטל? ביסטו דען יא אין היכל הקודש? וואס איז דיין שייכות מיט היכל הקודש, אז דו קענסט יעדנ'ס שלום בית? דאס איז היכל הקודש? אז דו ווייסט ווער עס איז נאנט און ווער עס איז ווייט, דאס איז היכל הקודש? די הייליגע חכמים זכרונם לברכה זאגן (בבא בתרא טו:): "טוֹל קוֹרָה מִבֵּין עֵינֶיךָ", זיי דיך ערשט מקרב צום צדיק איידער דו בארעדסט דעם און יענעם.
די צווייטע טאג שבועות ביים ליינען די כתובה, ביים זיך געזעגענען פון יום טוב - האבן מיר גערעדט פון וואס דער רבי זאגט (שיחות הר"ן, סימן צא): "סגולה להתמדה" - נישט צו רעדן אויף קיין שום איד שלעכט, נישט האבן מיט קיין מחלוקת, מיט קיין קריגערייען, מיט קיין כעס, אויך אין שטוב זאל נישט זיין קיין שום כעס און קפידות. מיר האבן גערעדט וואס מוהרא"ש זאגט, אז מען מיז קוקן גוט אויף זיך, מען מוז האלטן פון זיך; נאר אזוי קען מען קוקן אויף א צווייטן גוט, און נאר אזוי קען מען האלטן פון א צווייטן; ווייל ווען א מענטש איז דערביטערט, ער האלט נישט פון זיך, ער גלייבט נישט אין זיך - מאכט ער יעדן אוועק און איז מבטל יעדן איינעם, און אזוי איז געווען אלע צייטן ביי מוהרא"ש, די דערביטערטע - די האבן געמאכט די מחלוקת, ביז זיי זענען אליין אוועק געגאנגען.
ווילסט מיר העלפן בויען די קהלה? זאלסטו מיר דערציילן נאר שיינע זאכן אויף אנשי שלומינו, און זוך ווי דו קענסט העלפן א איד מיט פרנסה, מיט א היטש, מיט שלעפן, טראגן, ברענגען, און נישט זוכן יענעמ'ס רוחניות.
איך דארף מקצר זיין.
דער אייבערשטער זאל העלפן זאלסט האבן הצלחה אין אלע ענינים.