בעזרת ה' יתברך
יום ה' פרשת וארא, י"ב שובבי"ם, כ"ו טבת, שנת תשפ"ג לפרט קטן
לכבוד מיין טייערער ... נרו יאיר
זע צו לערנען יעדן טאג דיינע שיעורים כסדרן; מקרא, משנה, גמרא, הלכה, מדרש וספרי רבינו, עס זאל נישט אריבערגיין אפילו איין טאג אן לערנען די הייליגע תורה.
חכמינו זכרונם לברכה זאגן (ירושלמי ברכות פרק ט, הלכה ה): "יום תעזבני", אויב מען לאזט אפ די תורה פאר איין טאג, "ימים אעזבך", וועט די תורה דיך אפלאזן צוויי טעג; אזוי גייט עס, אז מען לערנט נישט היינט - לערנט מען שוין נישט מארגן.
מיטן סדר דרך הלימוד פון רבי'ן, לערנען אפילו אן פארשטיין (שיחות הר"ן, סימן עו) - קען מען באווייזן צו לערנען יעדן טאג אפילו מען איז פארנומען מיט ברענגען פרנסה וכדומה.
לערן סיי אין שול און סיי אין שטוב, עס איז וויכטיג ביידע, ווייל די ווייב און קינדער, אז זיי זעען דעם טאטע לערנען טאג נאך טאג - איז דאס גאר אן אנדערע שטוב, די קינדער וואקסן אויף גאר אנדערש.