בעזרת ה' יתברך
יום ה' פרשת ויגש, ה' טבת, שנת תשפ"ג לפרט קטן
לכבוד ... נרו יאיר
איך האב ערהאלטן דיין בריוו.
אוודאי לאכט דער משגיח פון ענק און ער קוקט ענק אן ווי נארישע בחורים. ווען ביי אונז גייט מען נישט מיט קיין קייטל, און פלוצלונג זעט ער בחורים אין ישיבה טראגן א קייטל מיט א קמיע.
אזוי איז אלע מעשיות וואס בחורים דערציילן אז מען רודפ'ט זיי אין ישיבה צוליב ברסלב. אז מען וועט גוט אריינקוקן אין די מעשה וועט מען זען אז משגיחים און ראשי ישיבות רודפ'ן נישט קיין בחורים פאר ברסלב, נאר ווען די בחורים דרייען איבער די ישיבה און טוען נארישע זאכן וכו' וכו'.
חסידי'שע בחורים גייען נישט מיט קיין קייטל אויפן האלז. איך גיי אויך מיט די קמיע פון מוהרא"ש, איך לייג עס אויפן שליסל האלטער, נישט אויפן האלז. זאלסטו אויסטון די קייטל און נישט מאכן קיין אינטערעסאנטע זאכן אויפן רבינ'ס נאמען. דער רבי זאגט (ספר המדות אות צדיק, סימן סט): "מִי שֶׁאוֹהֵב אֶת הַצַּדִּיק, צָרִיךְ לִשְׁמֹר אֶת הַצַּדִּיק, שֶׁלֹּא יֵצֵא עָלָיו שֵׁם רָע", ווער עס האט ליב דעם צדיק דארף אכטונג געבן עס זאל נישט ארויסגיין א שלעכטע נאמען אויפן צדיק.
לערן דיינע שיעורים כסדרן, זיי מכבד דיינע מגידי שיעורים, פיר זיך מיט דרך ארץ און לערן אסאך דעם רבינ'ס ספרים.
דער אייבערשטער זאל העלפן זאלסט האבן הצלחה אין אלע ענינים.