בעזרת ה' יתברך
ערב שבת קודש פרשת אמור, י"ב אייר, כ"ז לעומר, שנת תשפ"ב לפרט קטן
... גבאי בית המדרש עצתו אמונה, ליבערטי
איך האב ערהאלטן דיין פראגע.
וואויל איז דיר אז דו ביסט א משמש ביים רבי'ן. עס איז נישט גרינג צו זיין א שמש אין בית המדרש; פון איין זייט דארף מען אכטונג געבן אויף סדר, אין בית המדרש זאל נישט זיין קיין הפקרות, פון די אנדערע זייט דארף מען אכטונג געבן אויף מענטשן, קיינעם נישט וויי טון; מען דארף קענען גיין לרוחו של כל אחד ואחד, דעריבער דארף א גבאי שטענדיג בעטן דעם אייבערשטן צו וויסן ווי אזוי צו פירן דעם בית המדרש.
צדיקים זאגן, די ראשי תיבות פון גבאי איז א'נא ב'כח ג'דולת י'מינך, מען בעט דעם אייבערשטן מען זאל וויסן ווי אזוי זיך צו פירן.
די וואך שבת, א שבת פאר ל"ג בעומר, פירן מיר זיך צו טאנצן "בר יוחאי", אויך דעם שיר "אמר רבי עקיבא" - פאר מען זאגט כגוונא, דאס הייסט נאך קדיש יתום.
א פרייליכן שבת.