בעזרת ה' יתברך - ערב שבת קודש פרשת ויקרא, ו' ניסן, שנת תשפ"ה לפרט קטן
מיין טייערער ... נרו יאיר
איך האב ערהאלטן דיין בריוו.
דאס איז א ווייטאגליכע מעשה, ווען דיין טאטע אליין איז אנטלאפן פון שטוב אלס בחור און געקומען לערנען ביי מוהרא"ש מיט עזות דקדושה, און ער האט אויף קיינעם נישט געקוקט, ער האט געקוקט וואס איז גוט פאר זיין נשמה, פאר זיין תכלית, פאר זיין נצחיות, און יעצט ווען ענק האבן געוואלט קומען לערנען אין ישיבת היכל הקודש לאזט מען נישט; די וואונדער איז נאך מער, ווען דיין טאטע נרו יאיר לעבט אויף די התחזקות פון וואס מען לערנט דא ביי אונזער חדר, אבער ביז די קינדער.
דער הייליגער רבי האט דאס שוין געזאגט: "איך בין א וואונדער, א טאטע פארט צו מיר, גלייבט ער דאך אין מיר, און ווען זיין זון וויל קומען - לאזט ער אים נישט קומען". דאס איז געווען ווען דעם רבינ'ס תלמיד ר' יודל פון דאשוב וואס איז געווען א גרויסער צדיק האט נישט געלאזט זיין זון קומען צום רבי'ן, און ווען ער איז אנגעקומען צום רבי'ן האט אים דער רבי געזאגט די ווערטער: "איך בין א וואונדער, א טאטע קומט צו מיר, גלייבט ער דאך אין מיר, וואלט ער ווען געדארפט מיט נעמען די קינדער צו מיר; ניין, די קינדער נישט".
יעצט זעסטו קלאר אז דאס נישט לאזן קומען איז נישט קיין שכל, עס איז א זאך וואס מקורבים, תלמידים - מוזן אריבערגיין, ווייל נאר אזוי קען מען מקבל זיין פון צדיק, נאר אז עס איז דא א חשק, און חשק ווערט נאר דורך מניעות, און אזוי קענען דיר מעיד זיין אן א שיעור מענטשן וואס זיי זענען אריבער פון די עלטערן ביים קומען צום רבי'ן, בכלל נישט קיין שכל, דאס איז נאר להגדיל החשק, אזוי ווי דער רבי זאגט (לקוטי מוהר"ן חלק א, סימן סו).
זיי מחזק דיין ברודער ער זאל מתפלל אויף קענען קומען לערנען ביים רבי'ן אין ישיבה, מיט תפילה קען מען אלעס פועל'ן.
דער אייבערשטער זאל העלפן מיר זאלן זוכה זיין צו (פסחים קטז:): "וְנֹאכַל שָׁם מִן הַזְּבָחִים וּמִן הַפְּסָחִים"; און צו (מיכה ז, טו): "כִּימֵי צֵאתְךָ מֵאֶרֶץ מִצְרָיִם אַרְאֶנּוּ נִפְלָאוֹת", אמן.