בעזרת ה' יתברך - ד' פרשת משפטים, כ"ב שבט, שנת תשפ"ה לפרט קטן
מיין ליבער טייערער ... נרו יאיר
איך ווייס נישט וואס האט פאסירט מיט דיר, דו פלעגסט אמאל דאווענען די דריי תפילות מיט מנין, און יעצט זע איך אז דו ביסט מזלזל אין דאווענען.
איך וויל זיין דיין שדכן, און איך טראכט פון א גוטע שידוך פאר דיר, אבער איך וויל מיט דיר זיין אפן, איך קען זיין דיין שדכן נאר אז דו דאווענסט שחרית מנחה מעריב; אז מען דאווענט נישט די דריי תפילות - איז נישטא קיין טשענס מען זאל מצליח זיין, אזוי ווי א קאר קען נישט פארן נאר מיט געז, און אויך א לעקטערישע קאר קען נישט פארן נאר מיט בעטערי, אזוי אויך קען א איד נישט האבן הצלחה נאר אז ער גייט אין שול דאווענען די דריי תפילות.
הויב אן פונדאסניי צו גיין אין שול יעדן טאג דאווענען די דריי תפילות מיט מנין. אינדערפרי זאלסטו נישט גיין צו דיין ארבעט איידער דו דאווענסט, לאז די גאנצע וועלט קראכן, לאז אלעס צעפאלן, לאז די באנק אין א מיינעס, טו גארנישט פארן דאווענען, נאר נאכן דאווענען זאלסטו לויפן צו דיינע געשעפטן, אבער נישט פארן דאווענען. אזוי ווי דער הייליגער רבי האט געזאגט (שיחות הר"ן, סימן לא): "ראוי להזדרז להתפלל תמיד בבקר השכם בכל מה שיוכל", עס איז ריכטיג מען זאל זיך צואיילן צו דאווענען שטענדיג דאס פריסטע וואס מען קען נאר, "כי לפי גדל מעלת התפלה שיקרה מעלתה מאד מאד", ווייל דאווענען איז אזוי גרויס און טייער, אויב מען שטופט דאס אפ - קען מען דאס אינגאנצן פארלירן, "מי יודע אם יזכה אחר כך להתפלל", ווער ווייסט דען וואס וועט זיין, אויב מען וועט נאך קענען דאווענען, "על כן כל מה שיוכל להקדים עצמו ראוי לו לזרז מאד ולהקדים" דעריבער דארף מען דאווענען וואס פריער.
הלואי זאלסטו מיך אויסהערן, וועסטו נישט דערלייגן נישט אויף די וועלט און נישט אויף יענע וועלט.
דער אייבערשטער זאל העלפן זאלסט האבן הצלחה אין אלע ענינים.